Ձեր վստահելի աղբյուրը

Դեկտեմբերի 2-ից մեկնարկած զորակոչը նախորդներից ոչ միայն տարբերվում է նրանով, որ չմեկնարկեց աշնանը, այլև այս զորակոչի ընթացքում ներդրվեց զինծառայության վայրի ընտրությունը վիճակահանությամբ կատարելու սկզբունքը:

Նախկինում «Զինվոր» համակարգող խորհուրդը զորակոչի վերաբերյալ բազմաթիվ դիմում-բողոքներ էր ստանում: Խորհրդի ղեկավար Մարգարիտա Խաչատրյանի խոսքով, իրենք այդ դիմումներն ուղղել են Պաշտպանության նախարարություն:

«Հանդիպումների ժամանակ ևս մարդիկ գանգատվում էին, որ հարևանը գումար տվեց, երեխան մոտիկ զորամասում է ծառայում, արտոնություններից է օգտվում և այլն: Պաշտպանության նախարարի նախաձեռնությամբ որոշվեց կոռուպցիայի դեմ պայքարելու համար զորակոչը կատարել վիճակահանությամբ»- Panorama.am-ի թղթակցի հետ զրույցում ասաց նա:

Պաշտպանության նախարարության տարածած հաղորդագրության համաձայն` նորակոչիկների զինծառայության վայրի ընտրությունը վիճակահանության սկզբունքով կատարելը հնարավորություն կընձեռի առավելագույնս կանխել միջնորդավորված միջամտությունները և անօրինական գործողությունները, կապահովվի առավել օրինական, արդար և թափանցիկ զորակոչ:

Այն, որ այս տարբերակով կոռուպցիոն ռիսկերը բավական նվազում են, ասում է նաև Մարգարիտա Խաչատրյանը. «Մի կին ինձ մոտեցավ, ասաց` մեկը ինձանից գումար է վերցրել, երկու տարի է` չեմ կարողանում հետ վերցնել: Ես կոչ եմ անում մեր մայրերին, որ գործարքի մեջ չմտնեն: Այդ տարբեր մարդիկ, երբ գալիս, ասում են` փող տուր, տղայիդ այստեղ կգցեմ, կօգնեմ, որ այս վայրում ծառայի, թող չխաբնվեն: Բանակում չկա այդպիսի հասկացություն, որ կկարողանա այդ մարդը փողով իր տղայի հարցը լուծել»:

Մարգարիտա Խաչատրյանը նշեց, որ զինվորական ծառայության վայրի որոշման համար տարբեր արկղեր են դրված` մասնագիտություն ունեցողների, թեթև առողջական խնդիրներ ունեցողների և մասնագիտացված. «Գովաբանելի երևույթ է: Պայմանավորվածություն ձեռք բերեցինք, որ հավաքակայանում գտնվող ծնողները մասնակցեն վիճակահանությանը: Հիմա իրենք իրենց կարծիքը հայտնում են վիճակահանության վերաբերյալ, գալիս են, օրինակ, ասում` դե ի՞նչ անեմ, գնաց «Եղնիկներ»: Արդեն իրենք ընկալում են, որ իրենց տղան է քաշել, իրենց աչքի դեմ է եղել, իր բախտը դա էր»:

«Զինվոր» համակարգող խորհրդի նախագահը նկատեց, որ համակարգը նոր է ներդրվել, որևէ մեկը չի ասում, որ խնդիրներ չկան ու առաջընթացներ դեռ կլինեն: «Հիմնականում կազմակերպչական հարցեր են: Ծնողներ կան, որ ասում են` չհասցրեցի, ներս չմտա: Այդտեղ խուճապ է լինում: Կամ ծնողը մտածում է, որ իր երեխայի զորակոչի վայրը երեկոյան պիտի հայտնեն, բայց տղան արդեն զորամասի ճանապարհին է»,- ասաց նա:

Panorama.am-ը զորակոչման նոր համակարգի վերաբերյալ փոքրիկ հարցում անցկացրեց նաև նոր զորացրվող երիտասարդների շրջանում: Շատերը հիմնականում դրական են վերաբերվում վիճակահանությանը` նշելով, որ այսպիսով ամեն մեկի ծառայության վայրն իրենից է կախված, մեծ հաշվով:

Սակայն կարծիքներն այնքան էլ միանման չէին: Մի երիտասարդ կասկածներ հայտնեց, որ նախապես հնարավոր է ինչ-որ բան արված լինի. «Կարող են նախապես արկղում միայն էն զորամասերի անունները գցել, որ իրենց է պետք: Ես այնքան էլ չեմ վստահում, բայց մեկ է ուր կլինի»:

Մեկ այլ երիտասարդ, ով շատ էր ոգևորված վիճակահանությամբ, ասաց. «Ես միշտ հաջողակ եմ եղել ու հույս ունեմ, որ իմ քաշած թղթի վրա կլինի իմ ուզած զորամասի անունը»:

Մեզ հետ զրույցում տղաներից մեկն էլ հայտարարեց, որ ինքն իր պարտքն է կատարելու, նշանակություն չունի, թե որտեղ կլինի. «Ծառայություն է էլի, պիտի գնանք ծառայենք, գանք: Ավելի լավ, որ հեռու զորամասում լինեմ, տնեցիքին շուտ-շուտ տեսնելու մասին անընդհատ չեմ մտածի, շուտ կանցնի»:

Նշենք, որ հարցումների ընթացքում երիտասարդների մեծ մասն ընդգծում էր, որ բանակում վերջին տարիներին վիճակը ավելի է բարելավվել: Ոմանք օրինակ էին բերում եղբոր, ընկերոջ փորձը, ոմանք էլ` լրատվամիջոցների հրապարակումները: Տղաներից մեկը նաև նշեց, որ խիստ ցավալի են բանակում զինվորների մահվան մասին լուրերը:

Հավելենք նաև, որ ամենաբարդ խնդիրը, ըստ «Զինվոր» համակարգող խորհրդի նախագահ Մարգարիտա Խաչատրյանի, այն է, որ հասարակությունը տեղեկացված չէ. « Օդ ու ջրի նման պարտադիր է, որ զինակոչիկի ծնողը պարբերաբար տեղեկացվի իր կարգավիճակի, պարտականությունների մասին: Այնուամենայնիվ, առկա խնդիրների կողքին, մեր բանակն այսօր հզոր է ու կայացած: Պակասել է թե զոհերի, թե ինքնասպանությունների քանակը: Բայց մեր համար մի կորուստն էլ շատ շատ է»:

Նա շեշտեց, որ մեր ամենամեծ ձեռքբերումը բանակ հասկացությունն է. «Եթե որևէ մեկն ինչ-որ բանով կարող է օգնել բանակին, եկեք օգնենք, որ մեր նորակոչիկները բարձր տրամադրությամբ և լավ հոգեբանությամբ զորակոչվեն բանակ»:

Նախորդիվ`

Այսօր պարտադիր ժամկետային զինվորական ծառայության կմեկնեն առաջին նորակոչիկները