Ձեր վստահելի աղբյուրը

 «Human Rights Watch» միջազգային իրավապաշտպան կազմակերպությունը կոչ է անում Ադրբեջանի իշխանություններին ազատ արձակել «Ընտրությունների մոնիթորինգի և ժողովրդավարության հետազոտությունների կենտրոնի» ղեկավար Անար Մամեդլիին հետ վերցնել բոլոր քաղաքական դրդապատճառներով առաջադրված մեղադրանքները, ասվում է կազմակերպության կայքում:

Կազմակերպությունը ընդգծել է, որ Մամեդլիի ձերբակալությունը բացահայտում է կառավարության քննադատներին լռեցնելու` Ադրբեջանի իշխանությունների ջանքերը, և որ Մամեդլիին պետք է ազատ արձակվի ձերբակալելու օրինական հիմքերի բացակայության պայմաններում:

«Մոնիտորինգ անցկացնող անձի ձերբակալությունը Ադրբեջանի կառավարության վերջին հարվածն էր անկախ ակտիվիստներին: Մամեդլիին ձերբակալելով` իշխանությունները բացահայտորեն տեղեկացնում են, որ նրանց ավելի շատ հետաքրքրում է իրենց համար անհարմարություններ ստեղծող մարդկանց լռեցնելը, քան ընտրակեղծիքների բացահայտմամբ զբաղվելը»,- ասել է «Human Rights Watch» կազմակերպության Հարավային Կովկասի հարցերով ավագ գիտաշխատող Գեորգի Գոգիան:

Նա նշել է, որ ընտրությունների դիտորդին մեղադրելը այն բանում, թե իբր նա փորձում է ազդել քվեարկության արդյունքների վրա ուղղակի քաղաքական հաշվեհարդար տեսնելու ծիծաղելի պատճառ է: Նա ընդգծել էր, որ դատաքննության ժամանակ Մամեդլիին նույնիսկ թույլ չեն տվել, որ ինքն իր փաստաբանին ընտրի: Մամեդլիի փաստաբանը կարողացել է այցելել իր պաշտպանյալին միայն դատաքննության հաջորդ օրը:

Մամեդլիի փաստաբանը «Human Rights Watch»-ին պատմել էր, որ դատախազության Մամեդլիին նախնական կալանքի տակ պահելու միակ ներկայացրած պատճառը այն էր, որ նա լայնածավալ կապեր ունի արտասահանում և կարող էր փախչել, կամ եթե նույնիսկ մնար ազատության մեջ, կշարունակեր զբաղվել «անօրինական ձեռնարկատիրությամբ»:

Դատախազի այս վերացական պնդումները ավելի շատ նպատակաուղղված էին պատժելու Մամեդլիին, քան թե կանխելու միջամտությունը դատաքննությանը, ասվում է «Human Rights Watch»-ի հայտարարությունում:

«Ադրբեջանի միջազգային գործընկերները պետք է ստիպեն երկրի ղեկավարությանը ազատ արձակել Մամեդլիին և հետ վերցնել նրա դեմ առաջադրված մեղադրանքները»,- ասել է Գոգիան:

Հիշեցնենք, որ «Ընտրությունների մոնիթորինգի և ժողովրդավարության հետազոտությունների կենտրոնը» հոկտեմբերի 9-ին իրականացրել էր Ադրբեջանի նախագահական ընտրությունների մոնիթորինգը, որի արդյունքում օրենքի բազմաթիվ խախտումներ էր գրանցել: Ավելի ուշ Ադրբեջանի գլխավոր դատախազությունը քրեական գործ էր հարուցել և հետաքննություն սկսել ԸՄԺՀ-ի դեմ: Այս գործի վերաբերյալ «Ժողովրդավարական ընտրությունների եվրոպական հարթակ» կազմակերպությունը հանդես է եկել հայտարարությամբ, որում ասում է, որ ԺԸԵՀ-ը բողոքի հայց է նեկայացնում ԸՄԺՀ-ի նախագահ Անար Մամեդլիի նկատմամբ կիրառվող կամայական և անօրինական հետապնդումների դեմ:

Նշենք նաև, որ հոկտեմբերի 9-ին Ադրբեջանում կայացել էին նախագահական ընտրությունները, որտեղ գործող նախագահ Իլհամ Ալիևը հաղթել էր` հավաքելով ձայների 85%-ը` վերընտրվելով երրորդ անգամ: ժողովրդական ուժերի ազգային խորհրդի նախագահ Ջամիլ Հասանլին երկրորդ տեղն էր զբաղեցրել` ստանալով ձայների 5.5%-ը: Ընդդիմությունը հայտարարել էր, որ չի ընդունում ընտրությունների արդյունքները, քանի որ դրանք ամբողջովին կեղծված էին: ԵԱՀԿ Ժողովրդավար հաստատությունների և մարդու իրավունքների գրասենյակը, ԱՄՆ Պետդեպարտամենը, Բրիտանիայի արտաքին գործերի նախարարությունը և Եվրախորհրդարանը ընտրությունները գնահատել են ոչ ժողովրդավար և ԵԱԿՀ չափորոշիչներին անհամապատասխան: