Ալեքսանդր Մալայան. «Մարդկանց վերաբերմունքը բժիշկների հանդեպ փոխվել է. բժիշկներին սկսել են գնահատել, վստահել և հավատալ»
«Ակնաբուժության ոլորտում այս տարի ունեցել ենք և հաջողություններ, ինչու չէ նաև անհաջողություններ, սակայն հաջողությունները գերակշռում են»: Այս մասին այսօր լրագրողների հետ հանդիպման ժամանակ ասաց Ս.Վ.Մալայանի անվան ակնաբուժական կենտրոնի տնօրեն, ՀՀ առողջապահության նախարարության գլխավոր ակնաբույժ Ալեքսանդր Մալայանը:
«Մենք ունենք նվաճումներ և խոսքը գնում է ոչ միայն նոր բացված հիվանդանոցների, բաժանմունքների կամ ներդրված տեխնոլոգիաների մասին, այլ վիրաբուժական ոլորտում գիտական նորամուծությունների մասին»,- ասաց ակնաբույժը: Սակայն Ա.Մալայանի համար կարևոր ձեռքբերումը բժիշկների հանդեպ մարդկանց վստահությունն է: «Ընդհանրապես առողջապահության ոլորտում կարևոր ձեռքբերումներից կարելի է համարել այն, որ մարդկանց վերաբերմունքը բժիշկի հանդեպ փոխվել է: Բժիշկներին սկսել են գնահատել, վստահել, հավատալ, և նրանց աշխատանքին սկսել են թերահավատորեն չմոտենալ: Բժիշկի անձը աստիճանաբար ընկալելի և ընդունելի է դառնում բնակչության կողմից, ինչը շատ կարևոր է, քանի որ եթե մարդիկ բժշկին չհավատան, ապա որքան էլ ներդրումներ արվեն, բժշկությունը չի զարգանա»,- նշեց Ա.Մալայանը` հավելելով, որ իրենք ևս պետք է ամեն ինչ անեն, որ մարդկանց մոտ վերականգնենք բժիշկների հանդեպ կորցրած հավատը:
Ինչ վերաբերում է նորամուծություններին, ակնաբույժը նկատեց, որ այս տարի էլ ավելի են զարգացրել նախորդ տարիներին ներդրած ծրագրերը: Մասնավորապես, Գլաուկոմայի բաժանմունքում կիրառվում է ամերիկյան Այ-Ստենտ տրաբեկուլար միկրո իմպլանտը ( iStent Trabecular Micro-Bypass), որը գլաուկոմայի առաջխաղացման կանխարգելման նոր հեղափոխական մեթոդ է: Բացի այդ, ըստ նրա, կարճատեսության և հեռատեսության վիրահատական միջոցների զարգացման արդյունքում արդեն հնարավորություն ունեն վիրահատել մինչև 16 դիոպտրի կարճատեսություն և 8-10 դիոպտրի հեռատեսություն: Կլինիկայում իրականացվում է նաև ցանցաթաղանթի բնածին պատալոգիայի հայտնաբերում և բուժում: «Սա նորություն է: Այդպիսի թերհաս ծնված երեխաները կյանքի առաջին իսկ տարիներից կուրանում են, հիմա հնարավոր է կանխել, իսկ ամենակարևորը` հայտնաբերել»,- ընդգծեց Ա.Մալայանը:
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
