Ձեր վստահելի աղբյուրը

«Կարճատեսության դեպքերը ոչ թե ավելացել են, այլ մարդիկ հիմա սկսել են ավելի հաճախ դիմել բժշկի»: Այս մասին այսօր լրագրողների հետ հանդիպման ժամանակ ասաց Ս.Վ.Մալայանի անվան ակնաբուժական կենտրոնի տնօրեն, ՀՀ առողջապահության նախարարության գլխավոր ակնաբույժ Ալեքսանդր Մալայանը:

Ըստ նրա` 20 տարի առաջ գյուղերում տասնյակ մարդիկ կատարակտից կուրանում էին, բայց այդպես էլ բժշկի չէին դիմում: Մինչդեռ կատարակտի վիրահատությունը տևում է ընդամենը 10 րոպե: «Հիմա մարդիկ դիմում են բժիշկների օգնությանը, բայց դա չի նշանակում, որ կարճատեսության կամ կատարակտի դեպքերն ավելացել են: Մարդկանց հոգեբանությունն է փոխվել, այժմ ավելի զգոն են դարձել և ավելի շուտ են դիմում բժշկի»,- ընդգծեց նա:

Նրա խոսքերով` տարիների առաջ ևս ծնողները չէին ցանկանում, որ իրենց երեխաները ակնոցների կրեին` մտածելով, որ երեխաները դպրոցում ծաղրի առարկա կդառնան: «Իրականում այդպես էր, ակնոց կրող երեխաներին ձեռք էին առնում, մականուններ էին կպցնում, իսկ հիմա նման բան չկա: Հիմա հասկանում են, որ ակնոցը հագուստի նման մի բան է»,- ասաց Ա.Մալայանը` հավելելով, որ եթե տարիներ առաջ ակնոց կրելը կոմպլեքսներ, բարդույթներ էր առաջացնում շատերի մոտ, ապա այսօր նույնիսկ խնդիրներ չունեցող մարդիկ են ակնոց կրում, քանի այն նաև նորաձև է համարվում: «Հատկապես կանայք են սիրում ակնոցներ կրել: Դե կինը մնում է կին»,- նշեց ակնաբույժը:

Ա.Մալայանի նաև հայտնեց, որ դասերի ծանրաբեռնվածությամբ է պայմանավորված դպրոցներում տեսողական խնդիրներ ունեցող երեխաների ավելացումը: «Երեխաները հիմա ավելի լարված գրաֆիկով են օրն անցկացնում: Գնում են դպրոց, դաշնամուրի, անգլերենի, օգտվում են համակարգչից, կարդում են, այսինքն` երեխաների ծանրաբեռնվածությունն է ավելացել»,- ասաց նա:
 

Նախորդող` Ալեքսանդր Մալայան. «Մարդկանց վերաբերմունքը բժիշկների հանդեպ փոխվել է. բժիշկներին սկսել են գնահատել, վստահել և հավատալ»