Ձեր վստահելի աղբյուրը

«Ես ավելի շուտ մտածում եմ,  նախարարը, շատ լավ հասկանալով, որ մեծամասնության ձայները լիովին բավարար են, նման արտահայտություն արեց: Այդ արտահայտությունը կարող է իմիջիայլոց շպրտվի օդ, միևնույն է վավերացվելու են համաձայնագրերը»,- Panorama.am-ի հետ զրույցում ասաց ԲՀԿ անդամ, ԱԺ նախկին պատգամավոր Վարդան Բոստանջյանը` մեկնաբանելով  Էներգետիկայի նախարարի այն արտահայտությունը, թե` չեք ուզում, մի վավերացրեք, գնանք բանակցությունների: Պարոն Բոստանջյանից մասնավորապես հետաքրքրվել էինք` արդյոք, իր կարծիքով, նախարար Արմեն Մովսիսյանը պատրաստ էր դեպքերի նման զարգացմանը և հավանական համարում է իսկապես նոր բանակցությունները, թե դա ուղղակի «նախարարական բլեֆ» էր:

«Դա ուղղակի օդ շպրտված արտահայտություն էր, որովհետև տեսեք` քվեարկությունը տեղափոխեցին այլ օր, ինչի համար: Որովհետև մարդ չկարողացան հավաքել, այսինքն վստահ են, որ երբ մեծամասնությունը կազմով ներկա լինի, կողմ կքվեարկեն: Այնպես,  որ ընդամենը քայլ էր»,- նշեց տնտեսագետ Վ.Բոստանջյանը և ավելացրեց, որ նույն իրավիճակին ականատեսն ենք լինում բոլոր այլ դեպքերում` երբ պետք է բյուջե ընդունել, կամ այլ որոշում, որը միայն մեծամասնության ձայներով էլ հնարավոր է անցկացնել:

Ինչ վերաբերում է գազային համաձայնագրերին, որոնք դեռ երկուշաբթի Ազգային Ժողովը կշարունակի քննարկել, ապա ըստ Վ.Բոստանջյանի, այս խնդիրը՝ Հայաստանն այսօր ստիպված է վաճառել «ՀայՌուսգազարդի» 20 տոկոս բաժնեմասը, ծագել է  սխալ կառավարումից, ու հարցն այսօր լուծել, ցավոք, չի լինի.  ընդդիմությունը բողոք ներկայացնելով հարցը չի կարող լուծել: 

Ըստ Բոստանջյանի, հարկավոր է կառավարումը վերցնել սեփական ձեռքը, այլապես բողոքի ձայնը լուծում չի. «Ռուսաստանը գազի երկիր է, իսկ մենք տևական ժամանակ այն սպառել ենք միջազգային գներից նկատելիորեն ցածր գներով: Ու եթե այսօր ծագել է այս ահռելի պարտքը, ապա դա պայմանավորված է միայն տեղում կառավարողների գործելաոճից»,- հավելեց մեր զրուցակիցը: