Ձեր վստահելի աղբյուրը

Համաշխարհային բանկի խմբի անդամ IFC-ն այսօր թողարկել է 2 միլիադ դրամի (մոտ 5 միլիոն ԱՄՆ դոլար) պարտատոմս՝ նպատակ ունենալով ամրապնդել Հայաստանի կապիտալի շուկան և խթանել մասնավոր հատվածի վարկավորումը:

Կազմակերպության երևանյան գրասենյակից հայտնում են, որ պարտատոմսը հանդիսանում է IFC-ի առաջին դրամային թողարկումը: Այն նաև առաջին պարտատոմսն է, որտ թողարկվել է ՀՀ ոչ ռեզիդենտի կողմից, ինչպես նաև Հայաստանի կապիտալի շուկայում թողարկված առաջին օտարերկրյա կորպորատիվ պարտատոմսն է:

Հայաստանի ամենամեծ լճի անվանումը կրող «Սևան» պարտատոմսերը հանդիսանում են IFC-ի կողմից իրականացվող 8 միլիարդ դրամ ընդհանուր արժողությամբ ծրագրի մաս, որի շրջանակներում IFC-ն կարող է պարտատոմսեր թողարկել այն ժամանակ, երբ համընկնեն շուկայական հնարավորությունները և երկրի մասնավոր հատվածի ֆինանսավորման կարիքները:

«Խորը և իրացվելի ներքին կապիտալի շուկան երկարատև աճի և համընդհանուր բարգավաճման հիմք է հանդիսանում, քանի որ այն մասնավոր հատվածի համար հասանելի է դարձնում ֆինանսավորման հնարավորությունները», -ասել է IFC-ի փոխնախագահ և գանձապետ Ջինգդոնգ Հուան: «IFC-ի նպատակն է՝ աջակցել ներքին շուկաների զարգացմանը Հայաստանում: Մենք հույս ունենք, որ այս պարտատոմսերի թողարկումը հստակ ազդանշան կհանդիսանա բարձր վարկանիշ ունեցող արտասահմանյան այլ թողարկողների համար, որ Հայաստանը պատրաստ է ողջունել նրանց:»

Պարտատոմսի գնորդների մեծամասնությունը հանդիսանում են հայկական ֆինանսական կազմակերպություններ, որոնք իրենց հերթին աջակցում են երկրում մասնավոր հատվածի զարգացմանը:

«IFC-ի կողմից թողարկված «Սևան» պարտատոմսը՝ բարձր որակի ներդրումների այլընտրանքային տարբերակ է առաջարկում ինստիտուցիոնալ ներդրողներին՝ միաժամանակ տրամադրելով ֆինանսական միջոցներ, որոնք կարող են կիրառվել տեղական տնտեսությանը աջակցելու նպատակով,» - ասել է IFC–ի Հարավային Կովկասի տարածաշրջանի ղեկավար Թոմաս Լյուբեքը: «IFC-ն ուրախ է աջակցել Հայաստանի կապիտալ շուկաների ամրապնդմանը:»

«Էյչ-Էս-Բի-Սի Բանկ Հայաստան» ՓԲԸ-ն և «Ամերիաբանկ» ՓԲԸ-ն հանդիսացել են պարտատոմսերի գլխավոր տեղաբաշխողներ:

Տարիների ընթացքում, IFC-ի կողմից թողարկվել է 14 տեղական արժույթով պարտատոմս՝ ներառյալ բրազիլիական ռեալը, չինական ռենմինբին, նիգերիական նայրան և ռուսական ռուբլին: Հաճախ՝ IFC-ն հանդիսանում է շուկայում տեղական արժույթով թողարկվող պարտատոմսերի միջազգային կամ կորպորատիվ առաջին թողարկողը:

Տեղական արժույթով պարտատոմսերի թողարկման գործընթացն իրականացնելիս IFC–ն սերտորեն համագործակցում է շուկայի կարգավորողների և մասնակիցների հետ՝ նպատակ ունենալով կարգավորել իրավական դաշտը՝ խթանելով ավելի ակտիվ մասնակցություն տեղական շուկաներում և օրինակ հանդիսանալով այլ միջազգային թողարկողների համար:

Այն պահից, երբ 1995թ. Հայաստանը դարձավ IFC-ի անդամ, IFC-ն ներդրել է 271 մլն. դոլար 44 ծրագրի իրականացման համար մի շարք ոլորտներում, այդ թվում ֆինանսական շուկաներ, արտադրություն և հանքարդյունաբերություն: IFC-ի խորհրդատվական ծառայություններն իրականացվում են ծրագրերի միջոցով, որոնք ուղղված են սննդի անվտանգության բարելավմանը, ֆինանսական հատվածի ամրապնդմանը, կայուն էներգետիկային զարգացմանը և կանոնակարգման դաշտի պարզեցմանը: