Ձեր վստահելի աղբյուրը

«Իրանահայերի 40 տոկոսը Հայոց Ցեղասպանությանը զոհ դարձած հայերի ժառանգներն են»,-այդ մասին իրանական «ԻՍՆԱ» լրատվական գործակալությանը տված հարցազրույցում՝ նշել է ԻԻՀ Մեջլիսի հայազգի պատգամավոր Կարեն Խանլարյանը:

Հայազգի պատգամավորը, անդրադառնալով Իրանի կրոնական փոքրամասնությունների, այդ թվում՝ իրանահայերի իրավունքներին, մասնավորապես նշել է. «Բարեբախտաբար կրոնական փոքրամասնությունների իրավունքները պաշտպանվել են բոլոր նախագահների օրոք, քանի որ նրանց իրավունքներն ամրագրված են ԻԻՀ Սահամադրությամբ»:

Կ.Խանլարյանը, անդրադառնալով իրանահայերի խնդիրներին, նշել է, որ Իրանի հայ համայնքի կարևորագույն խնդիրը Հայոց Ցեղասպանության հարցն է: Նրա տեղեկացմամբ՝ իրանահայերի 40 տոկոսը Ցեղասպանությանը զոհ դարձած հայերի ժառանգներն են:

Անդրադառնալով Հայոց ցեղասպանության վերաբերյալ Իրանի իշխանությունների ունեցած դիրքորոշմանը՝ ԻԻՀ Մեջլիսի հայազգի պատգամավորը մասնավորապես նշել է. «Բարեբախտաբար իսլամական հեղափոխության առաջին տարիներին Էմամ Խոմեյնին դատապարատել է Ցեղասպանությունը, նախկին նախագահ Խաթամին Հայաստան կատարած այցի ժամանակ այցելել է Ցեղասպանության զոհերի հուշահամալիր, Մահմուդ Ահմադինեժադն իր պաշտոնավարման տարիներին ևս երկու անգամ դատապարտել է այն. Հուսով ենք, որ Ցեղասպանության 100-ամյակին վշատկցություն հայտնող իրանցի պաշտոնյաների թիվը կավելանա»:

Պատգամավորը, անդրադառնալով Հայ Առաքելական Եկեղեցու հետևորդների թվին, նշել է. «Իրանահայերի 98-99 տոկոսը Առաքելական Եկեղեցու հետևորդներ են, իսկ 1-2 տոկոսը՝ Կաթոլիկ և Բողոքական եկեղեցիների հետևորդներ: Ներկայում ողջ աշխարհում Հայաստանի բնակչության հետ միասին 13-14 միլիոն հայ է բնակվում: Իրանում Հայ Առաքելական եկեղեցու հետևորդների թիվը հասնում է 100 հազարի»:

Նշենք, որ Հայ Առաքելական Եկեղեցին Իրանում ներկայացված է երեք՝ Ատրպատականի, Թեհրանի և Էսֆահանի հայոց թեմերով, իսկ ԻԻՀ Մեջլիսում իրանահայությանը շահերը ներկայացնում են երկու պատգամավորներ Կարեն Խանլարյանը և Ռոբերտ Բեգլարյանը:

Թեմայի առնչությամբ վերլուծություն՝

Հայկական «լոբբին» կօգնի՞ արդյոք Իրանին ճանաչել Հայոց ցեղասպանությունը