Ձեր վստահելի աղբյուրը

 Ռուսաստանի հետ դիվանագիտական հարաբերությունների վերականգնման մասին խոսք լինել չի կարող, քանի դեռ ռուսական զորքերը գտնվում են Աբխազիայում և Հարավային Օսեթիայում: Այս մասին «Նովոստի Գռուզիա»  լրատվական գործակալության փոխանցմամբ, հայտարարել է Վրաստանի արտգործնախարար Մայա Փանջիկիձեն:

«Ռուսաստանի հետ դիվանագիտական հարևաբերությունների վերականգնում չի լինի, քանի դեռ մեր տարածքի 20%-ը բռնազավթված է, և Ռուսաստանն այդ մասին գիտի»,- նշել է Մ. Փանջիկիձեն:

Ինչ վերաբերում է Ռուսաստանի հետ առանց մուտքի արտոնագրերի ռեժիմի հաստատմանը, Վրաստանի արտաքին գերատեսչության ղեկավարը համարում է դա «վերջին տարում Վրաստանի վարած քաղաքականության արդյունք»: Միևնույն ժամանակ նա ընդգծել է, որ Վրաստանը որևէ զիջման չի գնա իր տարածքային ամբողջականության հարցում:

«Երբեք վիզային ռեժիմի դյուրացման համար Վրաստանը չի զիջի իր տարածքները, և մենք միշտ Աբխազիան և Հարավային Օսեթիան կհամարենք մեր տարածքը»,- շեշտել է Մ. Փանջիկիձեն:

Հիշեցնենք, որ ՌԴ նախագահ Վլադիմիր Պուտինը չի բացառել Վրաստանի հետ վիզային ռեժիմը վերացնելը և անհրաժեշտ է համարել քննարկել հարցը փորձագիտական մակարդակով: Վրաստանը 2012թ.-ի փետրվարին միակողմանի վերացրել է վիզային ռեժիմը:

Վրաստանի և Ռուսաստանի միջև դիվանագիտական հարաբերությունները դադարեցվել են 2008թ.-ի օգոստոսյան պատերազմից հետո, ինչի արդյունքում Ռուսաստանը ճանաչել է Աբխազիայի և Հարավային Օսեթիայի անկախությունը: 2000թ.-ին Ռուսաստանը վիզային ռեժիմ է հաստատել Վրաստանի հետ՝ հայտարարելով Վրաստանի տարածքից, Պանկիսի կիրճից դեպի Ռուսաստան ահաբեկիչների տեղափոխման վտանգի մասին:

2012թ.-ի հոկտեբերի խորհրդարանական ընտրություններից հետո Վրաստանում իշխանության է եկել «Վրացական երազանք» դաշինքը: Ընտրությունների արդյունքում ձևավորված կառավարությունը առաջնահերթություն է հռչակել Ռուսաստանի հետ հարաբերությունների կարգավորումը: