Ձեր վստահելի աղբյուրը

Վճարովի ավտոկայանատեղիներում մեքենայի կայանման համար տուրք չվճարած քաղաքացիները քաղաքապետարանից ստացել են քաղաքապետի արձանագրությունը, ըստ որի, իրենք իրավախախտում են կատարել: Խմբագրություն զանգահարած քաղաքացիների խոսքով, արձանագրությանը կից ներկայացված լուսանկարներն արված են մեքենայի տեսախցիկից:

Հետևաբար հարց է առաջանում, ինչպես է «Փարկինգ Սիթի Սերվիս» ընկերությունը պատրաստվում տրամադրել տեսագրությունը, ինչը խոստացել էր անել, եթե կայանած մեքենային ինչ-որ բան պատահի:

Ընկերության տնօրեն Վազգեն Հարությունյանը Panorama.am-ին ասաց, որ իրենք տուգանքներից գործ չունեն: Ընկերությունը վճարում չկատարածների վերաբերյալ միայն տեղեկություններ է ներկայացնում քաղաքապետարանին, դրանից հետո բոլոր որոշումները կայացնում է քաղաքապետարանը` իրականացրած վարչական վարույթի հիման վրա:

«Ներկա պահին, կարծում եմ, այդքան շատ վճարում չկա տուգանքներից, դրա համար չենք անդրադարձել հարցին, թե տուգանքներից ընկերությունը գումարներ ստանալու է, թե ոչ»,-ասաց Հարությունյանը:

Ինչ վերաբերում է տեսագրության տրամադրմանը, ապա ընկերության տնօրենը պնդում է, որ իրենք կարող են և պատրաստ են տրամադրել տեսագրությունը:

«Տեսախցիկները տեղադրված են բացառապես անվտանգության երաշխիքներով, իսկ վերահսկողությունը` վճարման հետ կապված, իրականացվում է բացառապես շրջիկ մեքենաների միջոցով»,-ասաց Հարությունյանը, ավելացնելով, որ այն ավտոկայանատեղիներում, որտեղ կահավորումն ամբողջությամբ չի իրականացվել, կայանած ու չվճարած քաղաքացիների նկատմամբ պատասխանատվություն չի կիրառվում:

«Կենտրոնում մի 2-3 փողոց կա` Խանջյան, Կորյուն, Ալեք Մանուկյան, երևի այդքանը»,-դեռևս ամբողջությամբ չկահավորված ավտոկայանատեղիների հասցեները մատնանշեց ընկերության տնօրենը:

Նախորդող հրապարակում`
«Փարկինգ Սիթի Սերվիս». Տուրք վճարողները բոլոր դեպքերում էլ կարող են ստանալ անդորագիր