Ձեր վստահելի աղբյուրը

Այս տարի պետական գույքի մասնավորեցումից գոյացել է ավելի քան 447 մլն դրամ` նախորդ տարվա համեմատ ապահովելով 26%-ի աճ, իսկ պետական գույքի օտարումից գոյացել է 1 մլրդ 260 մլն դրամից ավելի`անցած տարվա ցուցանիշը գերազանցելով 56%-ով: Այս մասին այսօր, ամփոփելով 2013թ. գործունեությունն, ասաց ՀՀ կառավարությանն առընթեր պետական գույքի կառավարման վարչության պետ Արման Սահակյանը:

Նրա խոսքերով` վարչության կողմից մշակվել և այս տարի ընդունվել են մի շարք իրավական ակտեր, որոնք թույլ են տալիս արմատական բարեփոխումներ իրականացնել պետական սեփականություն համարվող անշարժ գույքի կառավարման ոլորտում և համալիր լուծում տալ տարիներով կուտակված շատ խնդիրների:

Անդրադառնալով պետական գույք վարձակալությանը, Ա.Սահակյանը նշեց, որ հաստատվել է պետական ոչ առևտրային կազմակերպություններին ամրացված գույքը մեկ տարվանից ավելի ժամկետով վարձակալության տրամադրելու նոր կարգը: Որոշմամբ սահմանվում են միասնական մոտեցումներ, հստակ մեխանիզմներ վարձակալության գործընթացների կազմակերպման, վարձավճարների մեծության հաշվարկման, կիրառման հարցում:

«Գործընթացը դարձել է հրապարակային և թափանցիկ` գույքը ուղղակի ձևից բացի նաև մրցույթով կամ աճուրդով վարձակալության տրամադրելու շնորհիվ: Այս կարգը նպաստելու է ներդրումների ներգրավմանը և այդ ճանապարհով նաև՝ պետական գույքի բարելավմանը»,- ասաց նա` հավելելով, որ վարչական քաշքշուկները բացառելու նպատակով գործառույթը, ինչպես նաև՝ աճուրդների ու մրցույթների կազմակերպումը, պայմանագրերի կնքումն ու պարտավորությունների վերահսկողությունը կենտրոնացվել են ՊԳԿ վարչությունում:

Բացի այդ, որոշմամբ որոշակի սահմանափակումներ են դրվել գիտական, կրթական, առողջապահական և այլ ոլորտներում գործունեություն ծավալող ՊՈԱԿ-ների գույքի վարձակալության ժամանակ. այն կարող է տրամադրվել միայն այդ ոլորտներում գործունեություն ծավալելու նպատակով:

Ինչ վերաբերում է ՊՈԱԿ-ներին ամրացված գույքը մինչև մեկ տարի ժամկետով վարձակալության տրամադրելու կարգին, Ա.Սահակյանն ասաց, որ հատկացումը արվում է հրապարակային` միայն աճուրդների միջոցով: Խոսքն, օրինակ դպրոցական ճաշարանների կամ մարզադահլիճների մասին է: Այս դեպքում գոյություն ունեցող ստվերային շրջանառությունն է վերացվել, ինչի արդյունքում ավելի քան կրկնակի ավելացել են ՊՈԱԿ-ների մուտքերը, դրանից նաև՝ նաև պետբյուջե վճարվող հարկերը:

Ա.Սահակյանը նշեց նաև, որ 2013 թ-ի ընթացքում վարչություն է ներկայացվել 111 ՊՈԱԿ-ների ամրացված անշարժ գույքից մինչև մեկ տարի ժամկետով վարձակալությամբ տարածք տրամադրելու 155 հայտ, արդյունքում տարեկան ՊՈԱԿ-ների բյուջե կմուտքագրվի մոտ 107 մլն դրամ: Իսկ նախորդ երկու տարում միասին վերցրած՝ 187 պետական ոչ առևտրային կազմակերպություններին ամրացված գույքի վարձակալության մուտքերը կազմել են ընդամենը 93 մլն դրամ:

Ա.Սահակյանը հայտնեց, որ կանոնակարգվել է պետական սեփականություն հանդիսացող շենքերի և շինությունների տանիքներին ու ձեղնահարկերում կապի սարքավորումներ տեղակայելու և սպասարկելու վերաբերյալ համաձայնություն տալու և պայմանագրերի կնքման կարգը: Ըստ նրա` նախկինում իրավահարաբերությունները կարգավորված չէին և վարձակալական, սպասարկման վճարների միասնական սկզբունքներ և մոտեցումներ չկային:

«Հունվարի 1-ից կկանոնակարգվի նաև այս գործընթացը՝ այն կդառնա ավելի թափանցիկ և հասկանալի, տարածքների օգտագործումը` օպտիմալ: Վարձավճարների ձևավորումը միասնական սկզբունքով կլինի՝ կախված շենքի կադաստրային արժեքից և զբաղեցրած մակերեսի մեծությունից»,- ընդգծեց Ա.Սահակյանը` ավելացնելով, որ պետական բյուջեի մուտքերի տեսանկյունից այս որոշումը նույնպես դրական կլինի, քանի որ վարձավճարների որոշ մասը կուղղվի պետական բյուջե, որ նույնպես նախկինում չի եղել:

Նշվեց նաև, որ այսուհետ բոլոր պայմանագրերը կհաշվառվեն և կստեղծվի հաշվառման միասնական բազա:
Ա.Սահակյանը ներկայացնելով այլ ցուցանիշներ, նշեց, որ պետական գույքի վարձակալությունից 2013թ. պետական բյուջե է մուտքագրվել 293 մլն դրամից ավելի՝ նախատեսված 214-ի փոխարեն կամ ավելի՝ 37 տոկոսով: Իսկ Լուծարման հանձնաժողովների գործունեության արդյունքում այս տարի մարվել է շուրջ 51 մլն դրամ կրեդիտորական պարտք, իսկ 2012թ-ին` մոտ 43 մլն դրամ: Նշվեց նաև, որ ներկայումս լուծարման գործընթացում են 59 կազմակերպություն:

Ինչ վերաբերում է ՊԳԿ վարչության հարուցած հայցերին, Ա.Սահակյանը նշեց, որ արդյունքում պետական բյուջե է վերադարձվել ավելի քան 73մլն դրամ գումար:

«Ցուցանիշները դեռ գոհացնող չեն և մենք փորձելու ենք անել առավելագույնը, որպեսզի պետական գույքի կառավարման ոլորտում այլևս չլուծված հարցեր չլինեն»,- ասաց Ա.Սահակյանը: