Ձեր վստահելի աղբյուրը

ԲՀԿ-ական Տիգրան Ուրիխանյանի մոտ վերջին իրադարձությունները ասոցացվեցին հայտնի պատմության հետ, երբ իմպրեսիոնիստներից մեկը խնդիր ունենալով արագ անուն հանելու , ընկերների հետ միասին որոշում է հայտարարել, թե մահացել է և վաճառել կտավները:

«Առաջինը սա հիշեցի նախօրեին տեղի ունեցածի հետ կապված, երբ տեսա ճիգեր են գործադրում իրականություն դարձնելու շատ ցանկալին» ,- Panorama.am-ի հետ զրույցում հայտարարեց պատգամավորը:

Բնութագրելով անցած լարված արտահերթ նստաշրջանը, Տ.Ուրիխանյանը թվարկեց` խառը իրավիճակ, «զոռով, ի հեճուկս հանրության ու մնացած քաղաքական ուժերի, ի հակառակումն տրամաբանության ու այն բոլոր պահանջների, որ գոյություն ունեն» քաղաքական մեծամասնությունը որոշեց, որ կամայականորեն, առանց ոչ մի բանի հետ հաշվի նստելու իր գործն անել:

Նշելով, որ ամեն չարամտություն ունի ինչ-որ աստիճան, որն անցնել չի կարելի և հիշատակելով նույն իմպրեսիոնիստներին, որոնք, օրինակ, ճիշտ պահը գտան, հասկացան ու որոշեցին «վերակենդանացնել» իրենց իբրև թե մահացած գործընկերոջը, Տ.Ուրիխանյանն ասաց. «Ժամանակն է, որ քաղաքական մեծամասնությունը սթափվի, դանակը ոսկորին է հասնում արդեն, չի կարելի.... Եթե գեղարվեստական ձևակերպումներից զերծ մնանք ու ներկայացնենք, թե ինչ տեղի ունեցավ, ապա մեր իրականության մեջ տեղի ունեցավ ապօրինություն, տեղի ունեցավ ինչ-որ քվեարկություն, որի հաշվարկն իրականացրեց ինչ-որ մարմին` իրավասություն չունեցող և կայացվեց ինչ-որ որոշում, որին կարծես թե օրենքի ուժ ու տեսք են տալիս»:

Հիշեցնենք, ԲՀԿ-ական պատգամավորը, հաշվիչ հանձնաժողովի անդամ է:

Ի դեպ, ինչ վերաբերում է հաշվիչ հանձնաժողովի իր անդամությանը, պատգամավորը շեշտեց` «չունենալով հնարավորություն ու նաև ցանկություն մասնակցելու քաղաքական մեծամասնության կողմից իրականացված հատուկ օպերացիային, ընդ որում իրականացված էքսպրոմտ, չմասնակցեց նաև հաշվիչ հանձնաժողովի այսօրվա գործունեությանը, ինչի կապակցությամբ էլ հայտնում է իր զարմանքը` ինչպես կարելի է որոշումը համարել ընդունված»:

Ինչ վերաբերում է հաշվիչ հանձնաժողովի նախագահ, ՀՀԿ-ական Սուքիաս Ավետիսյանի այն հայտարարությանը, թե հաշվիչ հանձնաժողովը իր լիազորությունների շրջանակում է գործել, Տ.Ուրիխանյանը պնդեց. «Հանձնաժողովը իրավասու չի եղել որոշում կայացնելու, որովհետև հենց հանձնաժողով չի եղել, չէ որ հանձնաժողովը կոլեգիալ մարմին է և դրա աշխատանքները կարող են իրականացվել միայն քվորումի ապահովման դեպքում»,- ընդգծեց նա:

Հանձնաժողովի աշխատանքներին մասնակցել է ընդամենը երեք անդամ` երկուսը ՀՀԿ-ից, մեկը` ՕԵԿ-ից:

Տ.Ուրիխանյանը հիշեցրեց, որ «Բարգավաճ Հայաստան» կուսակցության պաշտոնական, նաև իր անձնական տեսակետն է` բազմակողմանիորեն զարգացնել հարաբերությունները ՌԴ հետ բոլոր ուղղություններով` և' քաղաքական, և' տնտեսական առաջին հերթին: Եվ պատմական հանգամանքները դրա համար լավ հիմք են:

«Բայց, պատմականորեն ապահովված հանգամանքների ներկայիս իրողության մեջ եղած փոխադարձ շահերի ու հետաքրքրությունների հետ մեկտեղ Հայաստանի ապագա շահերն ու հետաքրքրություններն են, որոնց մեջ ես կողմնակից եմ, մեր շահի համատեքստում դիտարկելու գործընկեր պետության շահերը, այլ ոչ հակառակը: Իսկ ՀՀ կառավարություն- Գազպրոմ հարաբերությունները ինձ համար միևնույնը չեն, ինչ Հայաստան-Ռուսաստան հարաբերություններն են»,- ընդգծեց նա:

Այն հարցին, թե գուցե խորհրդարանական ընդդիմությունը ինչ-որ նոր գործելաոճ որդեգրի, քանի որ սա առաջին դեպքը չէ, երբ անկախ իրենց համառ դիմադրության մեծամասնությունը ցանկացած օրինագիծն անցկացնում է ԱԺ-ում, Տ.Ուրիխանյանն արձագանքեց. «Այո, կլինի նոր բան, այո, վաղ թե ուշ ընտրողը կտա գնահատական քաղաքական մեծամասնությանը, այո, կլինի նոր քաղաքական կուրսի իրականացում` ՀՀ-ն նոր ուղղությամբ, ՀՀ քաղաքացիների կյանքը նոր որակով ապահովելու ուղղությամբ»:

Նախորդիվ` 

Արտահերթն ավարտվեց, գազային համաձայնագրերը վավերացվեցին

«Գազային համաձայնագրի» քվեարկությունը օրինական էր. Դավիթ Հարությունյան