Ձեր վստահելի աղբյուրը

Կոտայքի մարզի Պռոշյան համայնքի նախկին ղեկավար Հրաչ Մուրադյանի սպանության մեջ Արայիկ Պետրոսյանի մեղսակցությունը չհաստատվելու հիմքով քննիչի որոշմամբ, շուրջ 10 ամիս կալանքի տակ մնալուց հետո Արայիկ Պետրոսյանը այսօր, քիչ առաջ ազատ է արձակվել: Այդ մասին Panorama.am-ի թղթակցի հետ զրույցում տեղեկացրեց Պետրոսյանի փաստաբան, Փաստաբանների պալատի անդամ Նորայր Նորիկյանը:

«Արայիկ Պետրոսյանը իր հարազատների հետ քիչ առաջ գնաց տուն, Պռոշյան համայնք»,- փոխանցեց փաստաբանը:

Նորիկյանը ներկայացրեց, որ ֆորմալ առումով նրա նկատմամբ քրեական հետապնդումը չի դադարեցվել, և նա շարունակվում է համարվել մեղադրյալ: «Օպերատիվ հետախուզական քննչական գործողությունների հիմքում Արայիկ Պետրոսյանի կողմից Հրաչ Մուրադյանին ապօրինաբար կյանքից զրկելու հանգամանքը չի հաստատվել»,- փաստաբանի փոխանցմամբ, նշված է քննիչի որոշման մեջ:

Փաստաբանը վստահ է, որ որոշ ժամանակ հետո նրա նկատմամբ քրեական հետապնդումը կդադարեցվի: «Արայիկ Պետրոսյանը չէր կարող գործ ունենալ այս առանձնապես ծանր հանցագործության հետ և նրա նկատմամբ: Այս ամիսների ընթացքում քրեական գործի նյութերում նրա նկատմամբ որևէ վերաբերելի ապացույց ի հայտ չի եկել և չէր կարող լինել», -փոխանցեց փաստաբանը:

Պռոշյանի գյուղապետ Հրաչ Մուրադյանը սպանվել էր այս տարի ապրիլի 2-ին, գյուղապետարանի դիմաց: Սպանությունը կատարելու կասկածանքով նույն օրը ձերբակալվել, այնուհետև կալանավորվել է պռոշյանցի Արայիկ Պետրոսյանը, որին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 2-րդ կետով (Սպանությունը, որը կատարվել է անձի կամ նրա մերձավորի՝ կապված այդ անձի կողմից իր ծառայողական գործունեության կամ հասարակական պարտքի կատարման հետ) և 235-րդ հոդվածի 1-ին մասով (Ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):


Հարակից հրապարակումներ

Պռոշյանի գյուղապետ Հրաչ Մուրադյանի սպանության գործով ստեղծվել է համատեղ օպերատիվ-քննչական նոր խումբ

Պռոշյանի գյուղապետի սպանության մեջ կասկածվողը պահվում է որպես պատանդ. Փաստաբաններ

Հրաչ Մուրադյանի սպանությունը կազմակերպված խումբ է կատարել. Փաստաբան Առուստամյան

Պռոշյանի գյուղապետի սպանության գործով բաց նամակ Գևորգ Կոստանյանին