Ձեր վստահելի աղբյուրը

 «Մոսկվայում Եվրասիական բարձրագույն խորհրդի նիստը վերհանեց հետաքրքիր ինտեգրացիոն նախադեպ: Պարզվեց, որ Հայաստանը, որը նոր միությանն անդամակցելու ուղին է բռնել Ղրղզստանից ուշ, ամենայն հավանականությամբ ավելի շուտ կմիանա Մաքսային միությանը: Այս մասին իր հոդվածում գրել է «Однако. Евразия» պարբերականի գլխավոր խմբագիր Սեմյոն Ուրալովը:

Վերլուծաբանի խոսքով, եթե Մաքսային միությանն անդամակցելու «ճանապարհային քարտեզը« Հայաստանի դեպքում թե՛ Մինսկի, թե՛ Մոսկվայի և թե՛ Աստանայի մոտ որևէ հարց չի հարուցել, ապա «հատուկ արտոնություններ պոկելու» Բիշքեկի փորձը չէր կարող հարցեր չառաջացնել:

«Տրամաբանական է, որ հարցեր առաջացան Ղազախստանի մոտ, ով սահմանակցում է Ղրղզստանին: Բանը նրանում է, որ Ղրղզստանում մինչև վերջին պահը պատրանքներ ունեին, որ իրենց կհաջողվի պահպանել տնտեսության մաքսանենգ մոդելը և այդպես մտնել ինտեգրացիոն առևտրային տարածություն: Էժանագին և փաստացի չվերահսկվող չինական ապրանքների ներմուծմամբ է սնվում Ղրղզստանի մայրաքաղաքի կեսը: Բիշքեկի Դորդոյ շուկան վերածվել է մաքսանենգության կենտրոնի: Հանրապետության ապաինդուսրալիզացիան համեմատելի է թերևս Մոլդովայի հետ: Պետությունը դադարել է լինել խաղացող տնտեսության գրեթե բոլոր ոլորտներում»,- նշել է հոդվածագիրը:

Վերջինս ընդգծել է, որ անգամ Մաքսային միությանն անդամակցելուց հրաժարվելը չի կարող երկար ժամանակ երաշխավորել տնտեսության մաքսանենգ մոդելի պահպանումը, քանի որ Չինաստանից ներմուծվող չվերահսկվող ապրանքները որտե՞ղ պետք է իրացնել:

«Մաքսային միությունը Եվրասիական տնտեսական միության ինտեգրվելուն զուգահեռ միայն խստացնելու է մաքսային սահմանները: Չկա այլ ելք, բացի նոր ինդուստրալիզացիայից: Միայն դա է ստեղծում նոր աշխատատեղեր»,- ընդգծել է վերլուծաբանը:

Հիշեցնենք, որ դեկտեմբերի 16-ին Ղրղզստանի նախագահ Ալմազբեկ Աթամբաևը հայտարարել է, որ չի ստորագրի Մաքսային միությանը միանալու «ճանապարհային քարտեզը», քանի որ չեն բավարարվել Բիշքեկի պահանջներ, իսկ Մոսկվայի առաջարկած պայմաններն անընդունելի են, կարող են վտանգել երկրի տնտեսության հեռանկարները:

Դեկտեմբերի 24-ին Մոսկվայում տեղի է ունեցել Եվրասիական տնտեսական բարձրագույն խորհրդի նիստը, որին մասնակցել է նաև ՀՀ նախագահ Սերժ Սարգսյանը: Եվրասիական տնտեսական բարձրագույն խորհուրդը՝ պետությունների ղեկավարների մակարդակով հաստատել է Մաքսային միությանը և Բելառուսի, Ղազախստանի ու Ռուսաստանի Միասնական տնտեսական տարածքին Հայաստանի միանալու միջոցառումների ծրագիրը («ճանապարհային քարտեզը»):

Նախորդող՝

Ի. Շուվալով. Հայաստանն ինստիտուցիոնալ առումով գերազանցում է Մաքսային միության անդամ պետություններին