Ձեր վստահելի աղբյուրը

Panorama.am-ը զրուցել է Հայաստանի ազգային մրցունակության հիմնադրամի գործադիր տնօրեն Արման Խաչատրյանի հետ, ով ամփոփում է 2013թ-ին հիմնադրամի կատարած աշխատանքները, արձանագրված հաջողությունները, ինչպես նաև ներկայացնում է հաջորդ տարի սպասվելիք ծրագրերը:

- Պարոն Խաչատրյան, անցնող տարում լրատվական դաշտում ամենաշատ քննարկվող կառույցներից մեկը Հայաստանի ազգային մրցունակության հիմնադրամն էր, և տարին կարծես թե ձեռքբերումներով լի էր Ձեր ղեկավարած կառույցի համար: Կառանձնացնեիք թիրախային ոլորտներում ձեր գործունեության այն կարևոր հատվածները, որոնք բարձրացրել են մեր երկրի մրցունակությունը միջազգային հարթությունում:

Մեր կողմից իրականացվող բոլոր ծրագրերն ուղղված են` խթանելու Հայաստանի ազգային մրցունակությունը համաշխարհային հարթությունում` միևնույն ժամանակ ձևավորելով այնպիսի տնտեսական կենսահամակարգեր, որոնք կնպաստեն քաղաքացիների կյանքի բարելավմանը: Դիցուք` զբոսաշրջության խթանման արդյունքում հավելյալ զբոսաշրջիկների ներհոսքը հանգեցնում է հավելյալ ծառայությունների սպասարկման անհրաժեշտությանը և դրանով իսկ հավելյալ աշխատատեղերի ստեղծմանը: Մյուս` Տաթևի վերածնունդ ծրագրի, համալիր իրականացումը կհանգեցնի համայնքային ունակությունների զարգացմանն ու հավելյալ ենթակառուցվածքների ստեղծմանը` դրանով իսկ կրկին նպաստելով համայնքի բնակչի կենսակերպի բարելավմանը: Բացի այդ, իրականացվող Բաց երկնքի քաղաքականության արդյունքում նվազելու են ավիատոմսերի գները 10-50 տոկոսով, ավելանալու է ուղևորաշրջանառությունը շուրջ 25 տոկոսով, ինչը նշանակում է ավելի շատ զբոսաշրջիկներ են այցելելու Հայաստան, և որի արդյունքում ստեղծվելու է շուրջ 20 հազար աշխատատեղ:

- Խոսեցիք Բաց երկնքի քաղաքականության մասին: ՀՀ և ՌԴ միջև դեկտեմբերի 24-ին կնքվեց օդային ծառայությունների ազատականացման մասին պայմանագիր: Նույն օրը ռուսական «Կոմերսանտի» հետ հարցազրույցում նշել էիք, որ ԱՊՀ երկրները և Մաքսային միության անդամ երկրները առանձնակի կարևորություն ունեն բաց երկնքի քաղաքականության մեջ: Ինչո՞վ է պայմանավորված այս հանգամանքը, և Հայաստանն այս համաձայնագրից ի՞նչ ակնկալիքներ ունի:

Ստորագրված համաձայնագրով վերացվում են առկա բոլոր սահմանափակումները` կապված թռիչքներ իրականացնող ավիաընկերությունների քանակի, չվերթների հաճախականության, ուղղությունների աշխարհագրության և ինքնաթիռների տիպերի հետ: Եվ ուզում եմ նշել, որ նմանատիպ համաձայնագրեր են կնքվելու մեր բոլոր գործընկեր երկրների հետ: Առաջինը կնքվեց Ռուսաստանի հետ, քանի որ վերջինս ռազմավարական նշանակություն ունի մեզ համար ինչպես պատմականորեն ձևավորված կապերի, այնպես էլ այնտեղ ապրող հայկական մեծ սփյուռքի, ինչպես նաև առևտրի ու ապրանքաշրջանառության տեսանկյուններից: Ռուսաստանի հետ բաց երկնքի քաղաքականության իրականացումը էլ ավելի կնպաստի մեր ունեցած կապերի աշխուժացմանը, իսկ Մաքսային միությանն անդամագրման համատեքստում երկնքի ազատականացումը փոխլրացնող կարևոր բաղադրիչ կծառայի: Հարկ է նշել, որ արդեն իսկ բաց երկնքի քաղաքականության շրջանակներում սահմանափակումները չվերթների հաճախականությունների մասով մասամբ վերացվել են: Մասնավորապես, նախատեսված շաբաթական 42 չվերթի փոխարեն դեպի Մոսկվա իրականացվում է 79 չվերթ, իսկ այլ 9 ուղղություններով նախատեսված շաբաթական 27 չվերթի փոխարեն` 40 չվերթ: Նախորդ տարվա նույն ժամանակահատվածի հետ համեմատած, չվերթների հաճախականությունների համարյա կրկնապատկման արդյունքում Երևան-Մոսկվա տոմսերի միջին գները նվազել են` 200 հազար դրամից դառնալով 125 հազար դրամ. առաջարկվում է նաև 95 հազար դրամ սակագին այդ ուղղության համար: Նախորդ տարվա համեմատ, ուղևորաշրջանառությունը Ռուսաստանի հետ մեծացել է շուրջ 40 տոկոսով: Սրանք արդեն շոշափելի արդյունքներ են:

-Զբոսաշրջության խթանման ասպարեզում նույնպես գրանցել եք հաջողություններ: Օրինակ` «National Geographic» ամսագրի կողմից Հայաստանն այս տարի հաղթող ճանաչվեց Տարվա հայտնություն անվանակարգում:

Այդ օրինակ փաստերը բազում են: Այս տարվա ապրիլին Հայաստանում հյուրըանկալեցինք հեղինակավոր «National Geographic Россия» ամսագրի խմբագրակազմին, ինչի արդյունքում Հայաստանն ընդգրկվեց ամենամյա մրցույթում և ինչպես նշեցիք, մենք բավականին նշանակալից արդյունք ապահովեցինք. 65 հազար մարդ է մասնակցել մրցույթին: Տարվա սկզբին Լոս Անջելեսի միջազգային զբոսաշրջային ցուցահանդեսին Հայաստանն հաղթող ճանաչվեց «Լավագույն նոր տաղավար» անվանակարգում, իսկ ՄԱԿ-ի Զբոսաշրջային համաշխարհային կազմակերպության 2013թ. Vettor Giusti զբոսաշրջային պաստառների մրցույթում` ներկայացված Հայաստանի «Քարերի Սիմֆոնիա» պաստառը «UNWTO»-ի 20-րդ Գլխավոր Ասամբլեայի նստաշրջանին ճանաչվեց լավագույնը Եվրոպա անվանակարգում, այսինքն` Եվրոպայի հանձնաժողովի 44 անդամ-երկրների շարքում: Հայաստանի զբոսաշրջության խթանման նպատակով այս տարում ապահովվել է Հայաստանի մասնակցությունը 15 զբոսաշրջային և այլ միջազգային ցուցահանդեսներում: Իրականացրել ենք շուրջ 7 լրագրողական-ճանաչողական այցեր արտասահմանյան հեղինակավոր ԶԼՄ-ների մասնակցությամբ, և կազմակերպել ենք շուրջ 4 այց զբոսաշրջային գործակալների համար:

Հյուրընկալել ենք ՄԱԿ-ի Զբոսաշրջային համաշխարհային կազմակերպության (UNWTO) կողմից կազմակերպված «Մետաքսի ճանապարհի մարտահրավեր» բլոգերների միջազգային մրցույթի հաղթողներին. ինչպես գիտեք, Հայաստանն, ի դեմս ՀԱՄՀ-ի, հանդիսանում է մրցույթի գլխավոր հովանավորը: Բլոգերներն իրենց տպավորություններն ու բացահայտումները արտացոլել են իրենց բլոգերում՝ բարձրացնելով Հայաստանի ճանաչելիության մակարդակը միջազգային բլոգոլորտի, ինչպես նաև հասարակության լայն շրջանակներում: Ըստ այդմ՝ արդեն հրապարակվել են շուրջ 18 հոդվածներ:

Ցանկանում եմ նշել, որ զբոսաշրջության խթանման ոլորտում վերը նշված հաջողությունները նաև մեր գործընկերների համագործակցության արդյունքն է: Մասնավորապես, ՀՀ էկոնոմիկայի նախարարությունը, ԱՄՆ Միջազգային զարգացման գործակալությունը (ԱՄՆ ՄԶԳ), ԱՄՆ ՄԶԳ «Ձեռնարկությունների զարգացման և շուկայի մրցունակության» («Ի-Դի-Էմ-Սի») ծրագիրը, «Արմենիա Մարիոթ» հյուրանոցը և այլք մեծ ներդրում են ունեցել այս գործում:

-Ի՞նչ ծրագրեր է նախատեսում հիմնադրամն իրականացնել 2014թ-ին: Կլինե՞ն որակապես նոր ծրագրեր:

Մրցակցային առավելություն ունեցող թիրախային ոլորտներում գործունեության շարունակականությունն է ապահովում երկարաժամկետ և կայուն արդյունքներ:

Ըստ այդմ` շարունակելու ենք մեր բանակցությունները նոր ավիափոխադրողներ Հայաստան ներգրավելու և բաց երկնքի քաղաքականության իրականացման համար բարենպաստ իրավիճակի ձևավորման ուղղությամբ:

Գալիք տարի նաև նախատեսում ենք իրականացնել 2 շատ կարևոր ծրագրեր: Առաջինը` իրականացվելու է երկրի բրենդավորում, որն իր բնույթով ու էությամբ եզակի է լինելու ինչպես Հայաստանի պատմության, այնպես էլ այլ երկրների հետ համեմատության համատեքստում: Նպատակն է ստեղծել հայկական աշխարհի այնպիսի ընկալման համակարգ, որը գրավիչ կլինի զբոսաշրջիկների և ներդրումների համար և կվերաիմաստավորի մեր դերն ու նշանակությունը համաշխարհային քարտեզի վրա: Երկրորդ ծրագիրը նախատեսում ենք իրականացնել ՀԲԸՄ հետ. ստեղծելու ենք համահայկական տեղեկատվական կենտրոններ աշխարհի տարբեր անկյուններում: Այդ կենտրոնները կկատարեն տեղեկատվական/իրազկեման գործառույթ, կծառայեն որպես հայկական կամուրջ աշխարհասփյուռ հայկական համայնքների միջև, և ի վերջո կհավաքագրեն մեր ազգի ինտելեկտուալ ներուժը` ուղղորդելով այն Հայաստանի տնտեսական զարգացման ծրագրերում: Կստեղծվի նաև վիրտուալ հայկական ցանց, որում կմեկտեղվեն տեղակայված բոլոր կենտրոնները և տեղեկատվական ռեսուրսները:

-Փաստորեն գալիք տարում շեշտը դնելու եք Սփյուռքի ուղղությամբ իրականացվող ծրագրերի վրա:

Իրականում մեր գործունեության հենքը հայաստանակենտրոնության ընկալման ու դրա բովանդակային զարգացման համար համապատասխան գործոնների ու պայմանների ստեղծումն է. հայաստանակենտրոն ինչպես Սփյուռքի, այնպես էլ մեր ծրագրերի ու սեփական քայլերի տրամաբանության համատեքստում:

-Ի՞նչ սպասելիքներ ունեք նոր տարվա առթիվ:

Հավատում եմ, որ գալիք տարին լինելու է ավելի լավը մեր պատմության մեջ և խորապես համոզված եմ, որ Նոր տարում մեր երկիրը կդառնա ավելի ուժեղ և մրցունակ: