Ձեր վստահելի աղբյուրը

Լալա Տեր-Ղազարյան

Մաղթում եմ, որ 2014-ին իրականան մեր` եթե ոչ բոլոր, ապա գոնե ցանկությունների մեծ մասը: Լինենք առողջ, հաջողակ, ավելանանք ու չպակասենք, ամենակարևորը` չարտագաղթենք ու չսպառնանք դա անել:
Ուզում եմ` բերիության ու առատության տարի լինի հատկապես գյուղացիների համար, կարողանան ամբարել ու իրացնել ցորենի մինչև վերջին հատիկը, ծառին մնացած վերջին միրգը, դաշտում մնացած վերջին լոլիկը, կարողանան ապրել արժանավայել…

Ուզում եմ` երեխաներն էլ չհիվանդանան, հիվանդներն ապաքինվեն, պանդուխտները տուն գան, զինվորները ողջ-առողջ տուն վերադառնան, մայրիկները չարտասվեն…

Ուզում եմ` տիկին Աշխենի խնդիրը լուծվի, աշխատելու ձգտում ունեցող մարդու համար խոչընդոտներ չպետք է լինեն…
Չեմ ասում` այնքան փող ունենանք, որ ամանորին սեղանին կոկորդիլոս դնենք,  բայց ունենանք, որպեսզի վատառողջ լինելու դեպքում առաջինը գումարի մասին չմտածենք…

Ուզում եմ, մարդիկ ժպտան, վերանա կամ գոնե քչանա ագրեսիվությունն ու դժգոհությունը, վերականգնվի վստահությունը մարդկանց, բարեկամի, հարևանի, ինստիտուտների նկատմամբ…

Ուզում եմ` 2014-ին ամուսնալուծություններ չլինեն, իսկ հայրիկները սիրահոժար վճարեն իրենց բալիկներին օրենքով հասանելիք գումարը...

Տաթև Մանուկյան

Յուրաքանչյուր ազգի պահպանման հիմքն ազգային մշակույթն է: Դարերի ընթացքում շատ են եղել դեպքերը, որ մեր մշակույթը, մեր լեզուն պահպանելու համար հայ մարդը արյուն է թափել: Իզուր չի եղել: Այսօր հայ ազգը, Հայաստան աշխարհը իր տեղն ունի քարտեզի վրա:

Ցավոք, այսօր դարերի խորքից եկած մեր մշակույթը երկրոդ, երրորդ,... պլան է մղված: Պատճառները տարբեր են՝ սկսած մշակութային քաղաքականությունից, կառավարումից, սոցիալ-տնտեսական վիճակից մինչև պետական պաշտոնյայի, սովորական քաղաքացու վերաբերմունք:

Իհարկե, տարվա ընթացքում մշակութային տարբեր իրադարձություններ են անցկացվել ինչպես հայ մշակույթի գործիչների, արվեստագետների մասնակցությամբ, այնպես էլ օտարազգի: Սակայն այն, ինչ կատարվել է մշակույթի ոլորտում, առհասարակ՝ մշակութային ժառանգության պահպանման, մշակութային ժառանգության հանրահռչակման, բացերը շատ-շատ են: Պատասխանատուները թերացել են, սրտացավ մոտեցում չեն դրսևորել: Բայց մեր մշակույթը նման վերաբերմունքի արժանի չէ:

Անհայտ է, թե ինչպիսին կլինի 2014-ը մշակույթի ոլորտի համար, բայց մշակույթի ոլորտի պատասխանատուների պատասխանատվությունը որ մի քիչ բարձրանա, 2014-ի վերջի ամփոփումն ավելի լավատեսական շեշտադրումներով կներկայացնենք ընթերցողին:

Բոլորին...
Խաղաղություն... Երջանկություն... Լավատեսություն... Հարգանք... 2014-ին թող իրականանան բոլորի երազանքներն ու ցանկությունները:
 

Մարի Թարյան

Panorama.am-ի հետ 2013-ին ես անցա աշխատանքային չորս ամիս ճանապարհ: Իմ լուսաբանած թեմաները հիմնականում սոցիալական, մշակութային և կրթական էին:

Այս չորս ամիսների ընթացքում ամեն առավոտ, թերթերի էջերից ձեր համակարգիչների մեջ օրվա մամուլի ամենաթարմ քննարկումները բերեցի ես: Ռադիոմամուլն ամենազբաղված, հետաքրքրասեր ու պահանջկոտ մարդկանց հաղորդումն է:
Չորս ամիսներին ես ընթերցողներին ներկայացրեցի երկու հեղինակային շարք` Հայրենիքում ապաստանած սիրիահայերի և գյուղական դպրոցների մասին:

Հետ հայացք գցելով կրթական ոլորտին. երկու կարևոր բան, որ ամենաշատն էր քննարկվում անցնող տարի բուհերում ուսման վարձավճարների թանկացնումն էր և Հայաստանում ռուսական ուսումնական հաստատությունների բացման նախապատրաստությունները, որոնց Panorama.am-ն ու ես փորձեցինք անդրադառնալ մարդկանց հետաքրքրություններին ուղիղ համեմատական:

Կրթության ոլորտի մասին խոսելիս իմ աչքի առաջ անընդհատ այն դպրոցների լուսանկարներն են, որտեղ աշակերտները կրթություն են ստանում սարսափելի պայմաններում: Ուզում եմ, որ 2014-ին հերթով նորից անդրադառնամ այդ նույն դպրոցներին ու տխուր լուսանկարներին փոխարինեն ուրախները` երեխաների գոհ ժպիտով, իրենց երազած պայմաններում, ցելոֆանների փոխարեն երկինք տեսնեն ու ստիպված դասի ընթացքում չփոխեն նստարանի տեղը, որպեսզի կաթոցը իրենց վրա չլինի:
Ուզում եմ, որ եկող տարի որևէ մեկը ստիպված չթողնի սեփական տունն ու չկարոտի իր տան պատերը: Տան կարոտը ամենից հաճախ էր պտտվում Սիրիահայերի մասին պատմությունների շարքում:

Ուզում եմ, որ 2014-ին մի քիչ ավելի սիրենք մեր երկիրն ու տունը, անկախ ամեն բանից` պինդ կպած ապրենք այս հողին:
Ես շատ սպասելիքներ ունեմ այս տարվանից ու այդ սպասելիքները նաև իմ ընթերցողների համար են: Ես խոստանում եմ եկող տարի պատմել ամենասիրուն պատմությունները: Շնորհավոր Նոր տարի և Սուրբ Ծնունդ:

(շարունակելի)