Ձեր վստահելի աղբյուրը

Միացյալ Արաբական Էմիրությունների Շարժա քաղաքի Արվեստների թանգարանում հունվարի 27-ին բացվելու է կին ստեղծագործողների աշխատանքների բիենալե՝ «Women and Art Biennial 2014»: Հայաստանը ներկայացնելու է քանդակագործ Նունե Թումանյանը: Ներկայացված մի քանի հայ այլ թեկնածուների աշխատանքներից ընտրվել են իր աշխատանքները: Panorama.am-ի հետ զրույցում արվեստագետն ասաց. «Հայաստանն այնտեղ ունենալու է իր առանձին տաղավարը: Ես ներկայացնելու եմ յոթ բրոնզե քանդակ»:

Բիենալեն, որի խորագիրն է «Interpreting Peace» («Մեկնաբանելով խաղաղությունը»), կազմակերպում է Շարժայի կանանց ակումբը: «Ներկայացվող ստեղծագործություններից գոնե մեկը պարտադիր պիտի առնչվի խաղաղության թեմայի հետ, իսկ մնացածն արդեն ստեղծագործողի ընտրությամբ»,- ասաց Ն. Թումանյանը:

Պատասխանելով հարցին, թե ի՞նչ կտա Ձեզ բիենալեին մասնակցությունը, արվեստագետն ասաց. «Հպարտության և պատասխանատվության զգացում եմ ապրում, քանի որ ներկայացնելու եմ Հայաստանը: Բիենալեն տարբեր երկրներից ժամանած արվեստագետների և նրանց ստեղծագործությունների հետ ծանոթանալու լավ հնարավորություն կընձեռի: Կարծում եմ` վերադարձից հետո հիշելու և պատմելու շատ բան կունենամ: Կզրուցենք…»:

«Լույսի ճանապարհ»

 
«Խաղաղություն»

«Բեռ»

«Երազանքների ծառ»

«Հմայիլ»

«Վերելք»

«Խաբկանք»