Ձեր վստահելի աղբյուրը

Այսօր Կոտայքի մարզի ընդհանուր իրավասության դատարանում (Աբովյանի նստավայր) կալանքի տակ գտնվող դերասան Վարդան Պետրոսյանի ձերբակալման որոշման բողոքարկման ժամանակ պարզվել է, որ այս գործով դատախազ Արմեն Առաքելյանը աշխատանքից ազատման դիմում է գրել:

Panorama.am-ի թղթակցի հետ զրույցում Վարդան Պետրոսյանի փաստաբան Նիկոլայ Բաղդասարյանը կարծիք հայտնեց, որ դատախազի` աշխատանքից ազատվելուն նպաստել է Հատուկ քննչական ծառայության վարած քննությունը: Նկատենք, որ ՀՔԾ-ն գործով նախկին քննիչ Հայկ Հակոբյանի գործողությունների կապակցությամբ նյութեր էր նախապատրաստել, սակայն հետո որոշել էր, որ հանցակազմ չկա և քրեական գործ չէր հարուցվել: Նյութերը նախապատրաստելու ժամանակ իր տված բացատրություններում դատախազ Առաքելյանը, ըստ Նիկոլայ Բաղդասարյանի, ասել է, որ քննության ժամանակ «թյուրիմացաբար է նշել, որ քննիչը այցելել է բնակարան և տեսնելով, որ Վարդան Պետրոսյանը տեղում չէ, դրա համար էլ ձերբակալման որոշում է կայացվել»:

Հիշեցնենք, որ Վարդան Պետրոսյանին ձերբակալելու մասին որոշման դեմ պաշտպանական կողմը բողոք էր ներկայացվել նույն դատախազին` ասելով, որ մարդուն կարելի է ձերբակալել, եթե անձը դիմել է փախուստի և նրա գտնվելու վայրը հայտնի չէ, մինչդեռ Վարդան Պետրոսյանը փախուստի չի դիմել: Սակայն դատախազը պաշտպանական կողմին պատասխանել էր, որ իրականում Վարդան Պետրոսյանի գտնվելու տեղը հայտնի չէ, քանի որ քննիչը այցելել է Վարդան Պետրոսյանի գտնվելու բնակավայր և նրան այնտեղ չի տեսել, ինչի պատճառով էլ Վարդան Պետրոսյանին ձերբակալելու մասին որոշում է կայացվել: Այդ ամենից հետո պաշտպան Բաղդասարյանը դիմել էր ՄԻՊ-ին` նշելով, որ այդ ամենը իրականությանը չի համապատասխանում: Դա ըստ էության, բացահայտվել է նաև ՀՔԾ վարած քննության արդյունքում:

«Օրերս ստանում ենք ՀՔԾ-ի որոշումը, որտեղից պարզ է դառնում, որ դատախազը բացատրություն է տվել, որ ինքը թյուրիմացաբար է նման բաներ գրել և ասել է, որ գործն առանց կարդալու է մեր բողոքը մերժել: Աշխատանքային պարտականությունները լավ չէր կատարել փաստորեն», -նկատելով, որ ՀՔԾ-ի քննությունը օգնել է, որ Վարդան Պետրոսյանի գործով դատախազը հրաժարական տա:

Միևնույն ժամանակ, Նիկոլայ Բաղդասարյանը այսօրվա դատական նիստում ևս դատավոր Յուրի Բաղդասարյանի գործողություններում խախտումներ է արձանագրել: Մասնավորապես, ըստ փաստաբանի, պաշտպանական կողմի` դատավորին հայտնած ինքնաբացարկի մասին որոշումը ոչ թե հրապարակվել է այսօրվա նիստում, այլ հետաձգվել է ու կհրապարակվի փետրվարի 13-ին:

Մինչդեռ ըստ Նիկոլայ Բաղդասարյանի, Քրեական դատավարության մասին օրենսգրքի համաձայն, դատավորը պետք է գնա խորհրդակցական սենյակ և այնտեղ էլ որոշի իր ինքնաբացարկի վերաբերյալ որոշումը ու անմիջապես հրապարակի այն:
«Սակայն դատավորը խորչհրդակցական սենյակ գնալու փոխարեն, դատարանի շենքից դուրս եկավ ու գնաց: Ես ինքնաբացարկ եմ հայտնում դատավորին, ինքը պետք է գար, որոշումը հայտներ ու նոր միայն գնար», -փոխանցեց փաստաբանը:

Բաղդասարյանը պնդում է, որ իր պաշտպանյալին ձերբակալելու, հետո կալանավորելու որոշումը անօրինական է և իր համար անհասկանալի է` ինչու է պետությունը այսքան խոչընդոտում կողմերի հաշտեցմանը:

«Ավելի լավ կլիներ` Վարդան Պետրոսյանին ազատ արձակեին, նա գնար տուժողների մոտ ու նրանց հետ խոսեր, քննարկեր անելիքը: Թե պետությունը ինչու է խանգարում, չեմ հասկանում: Լավ կլիներ իրենք հանդիպեին սեղանի շուրջ խոսեին գային ընդհանուր հայտարարի: Բայց պետությունը մտել է երկու մարդկանց միջև և թույլ չի տալիս իրար հետ շփվել», -նկատեց նա:

Ի դեպ, այսօրվա դատական նիստում նախկին դատախազին ներկայացրել է մեկ այլ դատախազ Վահե Սարգսյանը, որը, Նիկոլայ Բաղդասարյանի տպավորությամբ, երիտասարդ ու անփորձ էր: