Ձեր վստահելի աղբյուրը

Դպրոցներում հաճախ խնդիրներ են ծագում, որոնց լուծման ականկալիքով մարդիկ միանգամից դիմում են Կրթության և գիտության նախարարություն և պարզում, որ խնդրով ոչ թե նախարարությունը, այլ տարածքային կառավարաման մարմիններին են զբաղվում:

Այն, որ մարդկանց գլխում առաջինը նախարարություն դիմելու միտքն է ծագում, զարմանալի չէ, քանի որ երկրում ամենաբաձր օղակը, որը պետք է զբաղվի կրթության հարցերով, հենց ԿԳՆ-ն է:

Այնուամենայնիվ, դպրոցներում ծագող խնդիրները լուծելու պարտականությունը նախ այն մարմիններինն է, որոնց ենթակայության տակ գտնվում են այդ դպրոցները:

Առկա են նաև Կրթության և գիտության նախարարության ենթակայության տակ գործող դպրոցներ: Դրանք ավագ դպրոցներն ու բուհերին կից վարժարաններն են: Այստեղ կրթության կազմակերպման հետ կապված բոլոր հարցերը կարգավորում է նախարարությունը:

Panorama.am-ը ՀՀ ԿԳՆ հանրակրթության վարչության պետ Նարինե Հովհաննիսյանին խնդրեց ներկայացնել, թե որոնք են նախարարության պարտականությունները: Նարինե Հովհաննիսյանը նախ մեզ տեղեկացրեց, որ այս պահին կան հատուկ դպրոցներ, որ գտնվում են մարզպետարանների ենթակայության տակ և այս տարվանից դրանք ևս կենթարկվեն ԿԳՆ-ին:

«Հսկողությունը կրթության նկատմամբ, աշակերտների և ուսուցիչների ընդունելությունը, տնօրենի նշանակումը... բոլոր հարցերով դրանք մեր ենթակայության տակ են: ԿԳՆ ենթակայության դպրոցների կառավարման խորհուրդներում, որպես լիազոր մարմին ԿԳՆ-ն երեք ձայ ունի, իսկ տարածքային կառավարման մարմինների լիազորության դպրոցներում` մեկ ձայն»,- ասաց վարչության պետը:

Եթե դպրոցներում բովանդակային հարցեր են առաջանում, որն առնչվում է կարգի, օրենքի հետ, ապա անկախ ենթակայությունից դրանով զբաղվում է նախարարությունը. «Եթե, օրինակ, թեժ գիծ է եկել դրամահավաքության մասին, դա ուղարկում ենք քաղաքապետարան»:

Եթե միջադեպ է տեղի ունենում աշակերտների միջև, այդ դեպքում նախարարությունը ահազանգն ուղարկում է քաղաքապետարան: Հարցին` ինչի՞ց է կախված, որ հարցով կզբաղվի նախարարությունը, Նարինե Հովհաննիսյանը պատասխանեց. «Համենայնդեպս, նայում ենք` ինչ բովանդակությամբ է: Կարող է լինել, որ օրինակ, դիմենք, և տեղում լավ լուծում չգտնվի, և մենք էլ զբաղվենք հարցով: Եթե մենք իրենց որևէ խնդրով ահազանգ ենք ուղարկում, նաև պատասխանի ենք սպասում: Հենց այնպես չենք շպրտում իրենց: Կամ, եթե երեխայի իրավունքները խիստ ոտնահարված են, մենք էլ ենք զբաղվում: Ոստիկանությունը, մենք, մարզերը, այդ դեպքում բոլորս միասին ենք աշխատում»:

Կրթության և գիտության նախարարությունն ամեն դեպքում գերակա դիրք ունի: Եթե հարցերը չեն լուծվում, նախարարությունը շարունակում է ուսումնասիրությունը: Նույնիսկ թեժ գծին եկած ահազանգը կարող են չուղարկել մարզպետարան, այլ անձամբ զբաղվել և հետո միայն առաջարկություններ ներկայացնել կառույցին, օրինակ` կարգապահական տույժ կիրառելու կամ խրախուսելու համար: «Եթե անգամ, ասենք, Երևանի դպրոցի տնօրենը կամ ուսուցիչը պիտի խրախուսվի, անպայման մեզ մոտ է դա տեղի ունենում»,- ասաց Նարինե Հովհաննիսյանը:

ԿԳՆ հանրակրության վարչության պետը տեղեկացրեց, որ վերջին շրջանում նախարարությունը թեժ գծին ստացել է անանուն նամակներ դպրոցներում առկա ինչ-ինչ խնդիրների վերաբերյալ. «Մենք գրել ենք, մարզում կամ քաղաքում գնացել ուսումնասիրել են: Հիմնականում անանուն նամակներն իրականությանը չեն համապատասխանել: Իսկ եթե համապատասխանել է, կարգապահական տույժեր են կիրառվել: Ընդհուպ, եղան դեպքեր, որ տնօրեններ հեռացվեցին»:

Հանրակրթության բնագավառում իրավասությունները սահմանում է Հանրակրթության մասին ՀՀ օրենքը, որը անդրադառնում է ինչպես կառավարության, այնպես էլ կրթության պետական կառավարման լիազորված մարմնի, տարածքային կառավարման մարմնի և Երևանի քաղաքապետի, տեղական ինքնակառավարման մարմնի լիազորություններին:

Օրենքի 6-րդ գլխի 30-րդ հոդվածը սահմանում է, որ Կրթության պետական կառավարման լիազորված մարմինը մշակում և հաստատում է հանրակրթական պետական ծրագրերը, սահմանում է մասնագիտացված հանրակրթական, արտակարգ ընդունակություններ դրսևորած երեխաների, կրթության առանձնահատուկ պայմանների կարիք ունեցող երեխաների և այլընտրանքային կրթական ծրագրերի իրականացման ժամկետները, հաստատում է երաշխավորված դասագրքերի ցանկը, սահմանում է պետական ուսումնական հաստատություններում արձակուրդների ժամկետները և տևողությունը և այլն:

Այն համարվում է պետական ավագ դպրոցների պետական լիազոր մարմինը: Հաստատում է պետական ուսումնական հաստատության և ծնողի միջև կնքվող պայմանագրերի օրինակելի ձևերը, հաստատում է ուսումնական հաստատությունից սովորողին այլ ուսումնական հաստատություն տեղափոխելու և ազատելու կարգը, ապահովում է առարկայական ծրագրերի, դասագրքերի և ուսումնական ձեռնարկների, դասամատյանների ձևերի մշակումը, փորձաքննությունը և հրատարակումը և այլն:

Հոդված 31-ը սահմանում է տարածքային կառավարման մարմնի և Երևանի քաղաքապետի իրավասությունները:

Մարզպետը (Երևան քաղաքում` քաղաքապետը) համակարգում և վերահսկում է դպրոցական տարիքի երեխաների հաշվառումը, ապահովում է նրանց ընդգրկումը ուսումնական հաստատություն, ապահովում է պետական ուսումնական հաստատություններին օգտագործման իրավունքով հանձնված շենքերի կառուցումը, շահագործումը և պահպանումը, Հայաստանի Հանրապետության կառավարության սահմանած կարգով անցկացնում է պետական ուսումնական հաստատության տնօրենի և մանկավարժական աշխատողի ատեստավորումը, աջակցում է ուսումնական հաստատություններում սովորողների և շրջանավարտների գիտելիքների գնահատման կամ թեստավորման գործընթացին և այլն:

Ուսումնական հաստատության գործունեության վերահսկողությունն իրականացնում են հիմնադիրը, կրթության պետական կառավարման լիազորված մարմինը, ինչպես նաև օրենքով նախատեսված պետական կառավարման այլ մարմիններ: