Ձեր վստահելի աղբյուրը

Նոր Հալեպ թաղամասում բնակարան ունենալը կախված է սիրիահայերի ցանկությունից: Այս մասին այսօր Սփյուռքի նախարարությունում տեղի ունեցած ֆեյսբուքյան սիրիահայ խմբերի պատասխանատուների, ներկայացուցիչների հանդիպում-քննարկման ժամանակ ասաց նախարար Հրանուշ Հակոբյանը:

Նախարարը նշեց, որ այս պահին բնակարան ձեռք բերելու համար նախնական գրանցվել է 625 մարդ. «Հետագայում արդեն կերևա, թե կուզենան, արդյո՞ք, 6 տոկոսով հիփոթեքային վարկեր վերցնել և  բնակարաններն ունենալ, թե` ոչ: Որևէ մեկին պարտադրել, հանձնարարել չենք կարող: Այն, ինչ մեր հնարավորությունների սահմանում էր, մենք արեցինք»,- ասաց նախարարն ու հիշեցրեց, որ տարածքն անվճար տրամադրել է պետությունը: Ճարտարապետական նախագիծը ևս արվել է անվճար:

Թաղամասի կառուցումը տարբեր հակասական կարծիքների և քննարկումների տեղիք է տվել, որոնց Panorama.am-ը կանդրադառնա առաջիկայում:

Որոշ սիրիահայեր կարծիք են հայտնում, որ ավելի լավ կլինի այդ գումարներով իրենց համար թեկուզ Աշտարակ քաղաքում արդեն պատրաստի բնակարաններ գնեին: Դա պատճառաբանում են նրանով, որ իրենք վարձով են ապրում և տան վարձին զուգահեռ նոր բնակարան ձեռք բերելու գումարները չեն կարող վճարել:

Նկատեք, որ թաղամասում տներն ի սկզբանե վաճառքի համար են եղել, իսկ նվիրատվությունները կարող են նվազեցնել վաճառքի գինը:

Նշենք, որ «Նոր Հալեպ» թաղամասը լինելու է Աշտարակում՝ դեպի Էջմիածին գնացող մայրուղու վրա: Ըստ նախագծի, թաղամասն ունի երկու շենք և ակումբային շենք: Ընդհանուր 488 միավոր բնակելի տարածք է, որտեղ կլինեն մեկից երեք սենյականոց բնակարաններ` մոտ 2000 մարդու համար նախատեսված:

Հարդարված և վերջնական տեսքի բերված բնակարանների քառակուսի մետրը, ըստ նախնական հաշվարկների կարժենա 500-550 ԱՄՆ դոլար, իսկ ոչ հարդարված վիճակում՝ 350-400:

Նախորդիվ`

Սիրիահայերին ներկայացվեցին «Նոր Հալեպ» թաղամասի ամբողջականացված հատակագիծն ու պայմանները

«Որքան շատ բարերարներ լինեն, այնքան «Նոր Հալեպ» թաղամասի բնակարանների արժեքը կարող է նվազել»