Փարիզում կայացել է Լավրովի հանդիպումը ընդդիմության առաջնորդ Ջարբայի հետ

Աշխարհում 14:22 13/01/2014

Փարիզում կայացել է Լավրովի հանդիպումը ընդդիմության առաջնորդ Ջարբայի հետ

ՌԴ ԱԳ նախարար Սերգեյ Լավրովը Փարիզում հանդիպել է Սիրիայի ազգային կոալիցիայի առաջնորդ Ահմադ Ջարբայի հետ: Այս մասին հայտնում է «ՌԻԱ Նովոստին»:

«Ես հասկանում եմ, որ Ձեզ, առաջին հերթին, մտահոգում է Ձեր հայրենիքի ճակատագիրը: Մենք նույնպես անտարբեր չենք սիրիացի ժողովրդի ճակատագրի հանդեպ»,-ասել է Լավրովը` կոչ անելով մասնակցել հունվարի 22-ին նախատեսված «Ժնև-2» համաժողովին:

Սիրիայի ընդդիմությունը գտնում է, որ համաժողովի կազմակերպիչները` Ռուսաստանը և ԱՄՆ-ն, իրենց բավական երաշխիքներ չեն տալիս` կապված համաժողովի վերջնական դրական արդյունքների հետ: Ըստ նրանց` համաժողովի ժամանակ պետք է ձևավորվի ժամանակավոր կառույց, որին փոխանցվելու է իշխանությունը, իսկ ներկայիս նախագահ Բաշար Ասադը տեղ չունի ապագա Սիրիայում: Ազգային կոալիցիան իր մասնակության մասին կհայտարարի հունվարի 17-ին:

«Սիրիայի ընդդիմադիր առաջատար խմբավորման ղեկավարին կոչ ենք արել իր վրա վերցնել պատասխանատվությունը և ընդդիմության պատվիրակության կազմում ապահովել Ազգային կոալիցիայի մասնակցությունը կայանալիք ֆորումում, որի նպատակն է դադարեցնել զինված հակամարտությունը»,-ասվում է ՌԴ ԱԳՆ պաշտոնական էջում:

Նշենք, որ նախօրեին` «Ժնև-2» համաժողովի անցկացումից 10 օր առաջ, Ֆրանսիայում տեղի է ունեցել «Սիրիայի ընկերներ» խմբի 11 երկրների ԱԳ նախարարների հանդիպումը, որին ներկա էր նաև Ահմադ Ջարբան և Ազգային կոալիցիայի գլխավոր քարտուղար Բադր Ջամուսը:

Հանդիպման ժամանակ Ջարբան հայտարարել էր, որ Սիրիայի նախագահ Բաշար Ասադը և նրա ընտանիքի անդամները երկրի ապագայում չպետք է դեր ունենան:

Ի դեպ, այսօր նախատեսված է Լավրովի հանդիպումները ԱՄՆ պետքարտուղար Ջոն Քերիի, Սիրիայի հարցով ՄԱԿ և ԱՊԼ հատուկ բանագնաց Լախդար Բրահիմիի, Ֆրանսիայի ԱԳ նախարար Լորան Ֆաբիուսի և Հորդանանի ԱԳՆ ղեկավար Նասեր Ջոդի հետ, որի ժամանակ քննարկվում է համաժողովի անցկացման մանրամասները:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: