Ձեր վստահելի աղբյուրը

Սիրիահայերի համար կառուցվող «Նոր Հալեպ» թաղամասում դեռ շենքեր չեն բարձրանում, սակայն դրա շուրջ քննարկումներն ու հակասական կարծիքները գնալով թեժանում են:

Մի կողմից Սփյուռքի նախարարությունը տարածում է կոչ անող գովազդներ, որպեսզի բարերարներն աջակցեն սիրիահայերի համար թաղամասի կառուցմանը, մյուս կողմից` նախնական պայմանագիր կնքածներին հորդորում` սկսել վճարումներ անել: Թաղամասը կկառուցվի ապագա բնակարանատերերի ընթացիկ վճարների և բարերարների հանգանակած գումարներով:

Panorama.am-ի թղթակցի հետ զրույցում շատ սիրիահայեր կարծիք հայտնեցին, որ իրենք ֆինանսապես ի վիճակի չեն վճարումներ անել:

Սիրիահայ Ալին Յուղաբերյանը, ով այս պահին բնակվում է Հայաստանում, ասաց. «Շատ լավ է, իրենք ուզում են մեզ աջակցել, բայց ամեն մեկն իր պայմաններն ունի, երանի տան վարձի համար օգտակար լինեին, ավելի լավ կլիներ, մինչև որոշենք` ինչպես պիտի շարունակենք այստեղ: Դեռ հայտնի չէ` կմնա՞նք այստեղ, թե` ոչ: Իրենք բավական օգտակար լինում են, բայց տուն գնելու գումարը մեծ է… դժվար է»:

Սոնա Պարտիզպանյան-Թաթարյանը կարծում է, որ «Նոր Հալեպ» թաղամասում տուն ձեռք բերելը շատ դժվար կլինի, բացի այդ` հեռու է: «Եթե այստեղ աշխատանք և կացարան լինի, մենք կնախընտենք Հայաստանում մնալ: Բայց աշխատանք չունենք, ամեն ամիս էլ մեծ գումարներ ենք վճարում տան վարձի համար: Մի քիչ դժվար է զրոյից սկսելը»,- ասաց սիրիահայը:

Մեկ այլ սիրիահայ Աբրահամ Խնկիկյանի բնորոշմամբ, ավելի լավ կլիներ, որ պետությունն օգներ արդեն պատրաստի բնակարան ձեռք բերել. «Մեզ համար դժվար կլինի բնակարանի վարձի հետ մի քանի տարի նոր բնակարանի կառուցման գումարներ տալ: Սա է իրականությունը: Տրամաբանական չէ: Երևանին ավելի մոտ ուրիշ շրջաններում շատ ավելի էժան կարելի է բնակարան գնել»,- ասաց նա:

Սիրիահայը նաև կարծում է, որ այսպիսով իրենք առանձնանում են հայաստանբնակներից. «Մեր իտեգրումն էլ այդպես կդժվարանա: Սիրիայում հարցն այլ էր, մենք ունեինք մեր շրջապատը, մենք շատ հանգիստ ապրում էինք: Բայց այստեղ մի հատվածում ապրելու խնդիր չկա, բոլորս էլ հայեր ենք, քրիստոնյաներ ենք»:

Հալեպահայ Պարգևն էլ մեզ հետ զրույցում կասկածներ հայտնեց, որ առաջիկայում թաղամասը կկառուցվի. «Ես չեմ կարծում, որ հինգ տարուց շուտ պատրաստ կլինեն բնակարանները: Մենք չենք կարող և վարձ տալ, և հինգ տարի վճարել բնակարանի գումարը: Ուղղակի ֆինանսապես ի վիճակի չենք: Հետո աշխատանքը հիմնականում Երևանում է, իսկ թաղամասը հեռու է»:

Հրաչ Քալսահակյանն, ով համակարգում է «Հալեպահայեր» ֆեյսբուքյան խումբը, լավ գիտի, թե ինչ մտահոգություններ ունեն սիրիահայերը: Էջում քննարկված թեմաների շարքում է նաև «Նոր Հալեպ» թաղամասը, իսկ սոցցանցում հնչած կարծիքները շատ տարբեր են: «Անձնական կարծիքս այն է, որ լավագույնը պետք է արվի մարդկանց համար: Անշուշտ կան անհատներ, որ առհասարակ կարողություն չունեն այդ ծրագրին մասնակցելու, չքավոր վիճակի մեջ են: Կան մարդիկ, որ որոշ նյութական կարողություն ունեն: Ինչ-որ բարեսիրական է, տարբեր է, վաճառքի ենթակա է, տարբեր է: Նույնիսկ վաճառքի դեպքում եթե նպաստավոր պայմաններ են միջին դասակարգի մարդու համար, դա էլ օգտակար կլինի»,- ասաց նա:

Նախօրեին Սփյուռքի նախարար Հրանուշ Հակոբյանը տեղեկացրել էր, որ այս պահին բնակարան ձեռք բերելու համար նախնական գրանցվել է 625 մարդ: «Հետագայում արդեն կերևա, թե կուզենան, արդյո՞ք, 6 տոկոսով հիփոթեքային վարկեր վերցնել և բնակարաններն ունենալ, թե` ոչ: Որևէ մեկին պարտադրել, հանձնարարել չենք կարող: Այն, ինչ մեր հնարավորությունների սահմանում էր, մենք արեցինք»,- ասել էր նախարարը:

Թե ինչպիսին կլինի սիրիահայերի ակտիվությունը, ցույց կտա ժամանակը: Հարկ է նշել, որ քիչ չեն սիրիահայերը, ովքեր իսկապես հնարավորություն ունեն նոր թաղամասում բնակարան ունենալ: Բայց փաստ է նաև այն, որ մի զգալի հատված ֆինանասապես ոչ միայն ի վիճակի չէ, այլև անապահով վիճակում է գտնվում: Հայաստանում այս պահին գտնվող 11 հազար սիրիահայերից 3000 հազարը սոցիալապես անապահով են:

Նկատենք, որ թաղամասը սոցիալական ծրագրով չի կառուցվում, այն բարեգործական ծրագիր չէ: Թաղամասի համար Հայաստանի Հանրապետությունն անվճար հողատարածք է տրամադրել, իսկ ճարտարապետական նախագիծն անվճար արել են ճարտարապետների համահայկական ընկերակցության համանախագահներ Վահե և Գոհար Թութունջյանները:

«Նոր Հալեպ» թաղամասը լինելու է Աշտարակում՝ դեպի Էջմիածին գնացող մայրուղու վրա: Ըստ նախագծի, թաղամասն ընդհանուր 488 միավոր բնակելի տարածք է, որտեղ կլինեն մեկից երեք սենյականոց բնակարաններ` մոտ 2000 մարդու համար նախատեսված:

Հատկացված 4,8 հեկտար տարածքը նախագծվել է որպես քաղաքատիպ թաղամաս՝ 4-5 հարկանի շենքերով, կանաչապատված բակային տարածքներով:

Հարդարված և վերջնական տեսքի բերված բնակարանների քառակուսի մետրը, ըստ նախնական հաշվարկների կարժենա 500-550 ԱՄՆ դոլար, իսկ ոչ հարդարված վիճակում՝ 350-400:

Նախորդիվ`

«Նոր Հալեպ» թաղամասում բնակարան ձեռք բերելու համար նախնական 625 սիրիահայ է գրանցվել

Սիրիահայերին ներկայացվեցին «Նոր Հալեպ» թաղամասի ամբողջականացված հատակագիծն ու պայմանները

«Որքան շատ բարերարներ լինեն, այնքան «Նոր Հալեպ» թաղամասի բնակարանների արժեքը կարող է նվազել»