Ձեր վստահելի աղբյուրը

«Կարիք չկա 1998-2008 թթ.-ի ժամանակահատվածի վերլուծությունների գնահատականների հետ կապված ունենալ նման սուր արձագանք, քանի որ որևէ ենթատեքստ այդ գնահատականների ու վերլուծականների մեջ չկա»: Այս մասին այսօր լրագրողների հետ հանդիպման ժամանակ հայտարարեց ՀՀ կրթության և գիտության նախարար Արմեն Աշոտյանը` անդադառնալով ՀՀ երկրորդ նախագահ Ռոբերտ Քոչարյանի և վարչապետ Տիգրան Սարգսյանի հեռակա բանավեճին:

Նրա խոսքերով` այդ թվականներին էլ ՀՀԿ-ը եղել է պետական կառավարման համակարգի հիմնասյուներից մեկը: «1998թ-ի ՀՀ նախագահական ընտրություններից հետո իշխանության կոնֆիգուրացիան ՝ Ռոբերտ Քոչարյան, Վազգեն Սարգսյան, Սերժ Սարգսյան, երեքից երկուսը հանրապետականամետ կամ հետո հանրապետական դարձած մարդիկ էին: Իսկ 2003թ-ի նախագահական ընտրություններից հետո հիշում եք իշխանության կոնֆիգուրացիան` Ռոբերտ Քոչարյան, Անդրանիկ Մարգարյան, Սերժ Սարգսյան: Այդ տարիները նաև մեր տարիներն են` հաջողությունների, խնդիրների, տնտեսական վերելքի, հասարակաքաղաքական փոփոխությունների, և կարիք չկա նման սուր արձագանքի, քանի որ դա մեր ընդհանուր պատմությունն է և զարմանալի է այդ գնահատականը հատկապես երկրի երկրորդ նախագահի կողմից»,-ասաց Ա.Աշոտյանը:

Անդրադառնալով շրջանառվող լուրերին, թե Ռ.Քոչարյանը փորձ է անում վերադառնալու քաղաքականություն, ԿԳ նախարարը նշեց. « Ես չեմ կարծում, որ այս հարցերը այսօր քննարկման ենթակա են, քանի որ նախ՝ Քոչարյանը հայտարարել է, որ երեք պայման է պետք՝ երկրում օրհասական վիճակ, ժողովրդի կողմից պահանջ և անձնական որոշում: Երրորդի հետ կապված` չգիտեմ, իսկ առաջին երկուսը ակնհայտ է, որ չկան: Սա քաղաքական դիսկուրս է, տնտեսությունը ընդամենը առիթ է խոսելու քաղաքականության մասին: Կյանքը ցույց է տալիս, որ խոշոր քաղաքական գործիչները տնտեսությունից խոսում են այն ժամանակ, երբ քաղաքական խնդիրներ են ուզում լուծել»,- ընդգծեց Ա.Աշոտյանը:

Իսկ թե ինչու չի կարծում, որ սա նաև երկրորդ նախագահի վերադարձի ճանապարհ է, Ա.Աշոտյանը որոշ զուգահեռներ անցկացրեց: «2007թ-ի օգոստոսին Լևոն Տեր-Պետրոսյանը հրապարակավ հայտարարեց, որ վերադառնում է մեծ քաղաքականություն: Պատահական ընտրված ժամկետ չէր, առաջին նախագահը լավ գիտակցում էր, որ իր քաղաքական ռեսուրսով 6 ամսից ավելի չի դիմանալու և չի դիմակալելու: Չեմ կարծում, որ երկրորդ նախագահի պարագայում 2014թ-ի հունվարը այն ժամկետն է, որից պետք է սկսել 2018թ-ի փետրվարի նախագահական ընտրությունների նախապատրաստությունը: Բացի այդ, Ռոբերտ Քոչարյանին սատարող ուժերը, որոնք բարձրաձայն չեն հայտարարում այդ մասին, սակայն «մտքով ու հոգով ուրախանում են», այնքան թույլ էին, որ չկարողացան լուծել իրենց առջև դրած խնդիրները»,- ասաց Ա.Աշոտյանը և հավելեց. «Հետևաբար, եթե անգամ Ռ.Քոչարյանը ուզում է վերադառնալ, ապա այս քաղաքական թիմով չի կարող վերադառնալ: Նա է ստիպված մտել ու սկսել ինքը հարցերը լուծել»,- ասաց նա:

Ըստ նրա` չկա նաև արտաքին քաղաքական պահանջ: Արևմտահայ ընդդիմությունը, Ա.Աշոտյանի խոսքերով, կտրուկ արձագանքել է Ռ.Քոչարյանի հարցազրույցին: Նա նշվեց նաև, որ իշխանությունների հարաբերությունները Ռուսաստանի հետ փայլուն են: «Տարածաշրջանային արտաքին քաղաքականություն ասվածը չի ենթադրում մինչև 2018թ-ը աշխարհաքաղաքական լուրջ փոփոխություններով պայմանավորված ներքին քաղաքական վերադասավորումների խնդիր: Ես չեմ տեսնում այդ խնդիրը»,- նշեց նա:

Ըստ Ա. Աշոտյանի` իր համար հաճելի է, որ ՀՀ երկրորդ նախագահը հիշատակել է նախկին վարչապետ Անդրանիկ Մարգարյանի անունը, բայց չգիտի, թե որքանով էր այն անկեղծ: «Հետաքրքիր է, թե երբ է Ռ.Քոչարյանը վերջին անգամ այցելել պանթեոն, չգիտեմ, գուցե սխալ եմ»,- ասաց նա` հավելելով, որ ՀՀԿ-ն գնահատում է անցյալը, բայց կառուցում է ապագան. «Կարիք չկա սեփական ցավդ դարձնել ուրիշի հիվանդություն, մենք նման խնդիր չունենք»: