Ձեր վստահելի աղբյուրը

«Քննադատությունները նորմալ երևույթ են»,- ճեպազրույցում  ՀՀ էկոնոմիկայի նախարար Վահրամ Ավանեսյանը անդրադարձավ ՀՀ երկրորդ նախագահ Ռոբերտ Քոչարյանի կողմից հնչեցրած քննադատություններին: Նրա խոսքերով` շատ խնդիրներ, որոնք բարձրացվել են` դժվար է գնահատել, բայց կան բաներ, որոնք կարող է գնահատել:

«Օրինակ` ՀՆԱ-ում շինարարության 25 տոկոս մասնաբաժին Հայաստանում կամ որևէ այլ երկրում, ընդհանրապես անհնարին է, որ դա երկարատև կամ նույնիսկ միջնաժամկետ հեռանկար ունենա»,- ասաց նախարարը: Լրագրողի` դա «փուչիկ» էր հարցին, նախարարը պատասխանեց, թե` ամենավատն էլ հենց այն է, որ կիրառվում են բառեր, որոնք, կարծես, վիրավորանք լինեն: Ըստ նրա` խնդիրն այն չէ, թե որևէ մեկը փչել կամ պայթեցրել է այդ փուչիկը, պարզապես պետք է փաստերը գնահատվեն: Իսկ այդ տեսանկյունից 25 տոկոս մասնաբաժինը անհնարին է պահպանել:

«Դեռևս 2006-2007թթ-ին, այդ թվում` իմ կողմից` համեստ տնտեսագետիս, գնահատվում էր, որ, անկախ ճգնաժամից, պետք է շինարարության ոլորտում բացասական աճ լինի»,- ասաց նա:

Վ.Ավանեսյանը նշեց նաև, որ Ռոբերտ Քոչարյանի կողմից բարձրացված որոշ դիտարկումների հետ համաձայն է: Մասնավորապես, ըստ նրա, խոսքը վերաբերում է հիփոթեքային վարկերին, թե ինչքանով պետք է հիփոթեքային վարկերի ընդհանուր աճի գնահատականը համարվի հենց բացարձակ գնահատականներով, թեև այս դեպքում ևս, ըստ Վ.Ավանեսյանի, խոր վերլուծություններ են հարկավոր, որպեսզի հասկանան, թե ինչ է կատարվում: «Բայց ակնհայտ է, որ Հայաստանում հիփոթեքային վարկերը դեռևս չեն գտնվում այն մակարդակի վրա, որ կարողանանք ասել, որ դրանք էականորեն ազդում են շինարարության ոլորտի վրա: Պատճառները շատ են, բայց տոկոսադրույքները բոլորի համար ակնհայտ են, որ թույլ չեն տալիս, որպեսզի հիփոթեքի շուկան Հայաստանում զարգանա»,- ընդգծեց Վ.Ավանեսյանը:

Ինչ վերաբերում է 8 տոկոս կամ 12 տոկոս տնտեսական աճը լա՞վ է, և պե՞տք է գնահատվի, թե՞ ոչ, ապա Վ. Ավանեսյանի խոսքերով, միանշանակ պետք է գնահատվի: «Նաև պետք է գնահատվի, որ միայն այդ ժամանակաշրջանի բարեփոխումներով չի եղել, այսինքն` առաջին նախագահից սկսած է այդ բարեփոխումները եղել: Բազմաթիվ բարեփոխումներ կան, որոնք նույնիսկ 5 կամ 10 տարվա ընթացքում չեն կարողանում արդյունքներ տալ: Դրանց արդյունքներն ավելի հեռանկարային են»,- նշեց էկոնոմիկայի նախարարը:

Վ.Ավանեսյանի գնահատմամբ` բազմաթիվ բարեփոխումներ, որոնք արվել են` 90-ական թվականներից սկսած, իրենց ազդեցությունն ունեցել են, բայց նաև այն խնդիրներն ու բարեփոխումները, որոնք հաջողված չեն եղել, դրանք էլ իրենց հերթին խնդիրներ են ստեղծել:

Ինչ վերաբերում է գազային համաձայնագրերի և կուտակային կենսաթոշակային համակարգի վերաբերյալ Ռոբերտ Քոչարյանի դիտարկումներին, ապա Վ. Ավանեսյանի գնահատմամբ, կարևորագույն խնդիրն այն է, որ այսօր գազի սակագնի եղած պայմանագրերը Հայաստանի համար ամենաշահավետն են, և չի կարծում, որ կար որևէ այլ հնարավորություն` ավելի շահավետ պայմաններով պայմանագիր ունենալու համար: