Ձեր վստահելի աղբյուրը

 «Հրավերքի դեպքում Իրանը կմասնակցի Սիրիայի հարցով «Ժնև 2» համաժողովին»,- իրանական «ՄԵՀՐ» լրատվական գործակալության հաղորդմամբ՝ հայտարարել է ԻԻՀ ԱԳ նախարար Մոհամմադ Ջավադ Զարիֆը:

Իրանի արտաքին գերատեսչության ղեկավարը այսօր ՌԴ ԱԳ նախարար Սերգեյ Լավրովի հետ ունեցած համատեղ մամլո ասուլիսի ընթացքում, անդրադառնալով հունվարի 22-ին Սիրիայի հարցով գումարվելիք «Ժնև 2» համաժողովին Իրանի մասնակցության հավանականությանը, մասնավորապես նշել է. «Հուսով եմ, որ «Ժնև 2»-ը դրական արդյունք կտա. Եթե Իրանին հրավիրեն սույն համաժողովին, ապա կմասնակցենք, հակառակ պարագայում նախապայմանները Թեհրանի համար անընդունելի են և մենք չենք մասնակցի»:

«Իրանը տարածաշրջանում խաղաղության հաստատման գործում կարևոր դեր ունի. Նախկինում Աֆղանստանում և Իրաքում կայունության հաստատման գործում հաջոված դերակատարություն ենք ունեցել. Տարածաշրջանում կայունության հաստատումը բխում է մեր ազգային շահերից»,-հավելել է Իրանի ԱԳ նախարարը:

ՌԴ ԱԳ նախարարն էլ, անդրադառնով Իրանի մասնակցության հարցին, նշել է. «ԱՄՆ-ի և Ռուսաստանի միջև ձեռք բերված պայմանավորվածության համաձայն՝ համաժողվին մասնակցության հրավերքն ուղարկում է ՄԱԿ-ի գլխավոր քարտուղարը, որը պատասխանատու քաղաքական գործիչ է և տարածաշրջանային զարգացումները լավ է ընկալում: Ռուսաստանը կարծում է, որ Իրանն ու Սաուդյան Արաբիան ևս պետք է մասնակցեն «Ժնև 2»-ին»:

Հիշեցնենք, որ օրերս ԻԻՀ նախագահ Հասան Ռոհանին ՌԴ նախագահ Վլադիմիր Պուտինի հետ ունեցած հեռախոսազրույցի ընթացքում, անդրադառնալով հունվարի 22-ին կայանալիք «Ժնև 2» համաժողովին, մասնավորապես նշել էր. «Ժնևում բանակցության ցուցադրման փոխարեն պետք է հետամուտ լինել սիրիական ճգնաժամի իրական լուծմանը: Արտատարածաշրջանային որևէ համաժողով, որը զուրկ կլինի ազդեցություն գործելու բաղադրիչներից, ի վիճակի չի լինի լուծել սիրիական ճգնաժամը, հետևաբար «Ժնև 2»-ը դեռ չսկսված կարող է տապալվել»:

Հավելենք, որ Իրանի ԱԳ նախարարը մինչ Մոսկվա մեկնելը՝ տարածաշրջանային այց էր կատարել Իրաք, Հորդանան և Լիբանան: Նախօրեին իրանական «իրդիփլոմասի.իռ» կայքը հաղորդել էր, որ այսօր Մոսկվայում կկայան Իրանի, Ռուսաստանի և Սիրիայի ԱԳ նախարարների եռակողմը հանդիպումը, սակայն Սերգեյ Լավրովն այսօրվա ասուլիսում հայտարարել է, որ եռակողմ ձևաչափի փոխարեն երկկողմ ձևաչափով հանդիպում կկայանա. Լավրովը վաղն էլ կհանդիպի Սիրիայի ԱԳ նախարար Վալիդ Մոալեմին: