Ձեր վստահելի աղբյուրը

ՀՀ ֆինանսների նախարարությունը Սոցիալական ապահովության պետական ծառայությունում և Պետական եկամուտների կոմիտեում կատարված ուսումնասիրությունների արդյունքում արձանագրել է, որ ՊԵԿ-ի կողմից խախտվել են «Ժամանակավոր անաշխատունակության նպաստի հաշվարկման, նշանակման և վճարման» կարգի պահանջները: Այսօր լրագրողների հետ հանդիպման ժամանակ ասաց ֆինանսների նախարարության ֆինանսական վերահսկողության տեսչության պետ Սոնա Ղարիբյանը:

Նրա խոսքերով` սոցծառայությանը ներկայացրած գումարների վճարման հայտերում ՀՀ պետական բյուջեից փոխհատուցման ենթակա բյուլետենների գումարներում ներառվել են նաև գործատուների միջոցների հաշվին վճարված նպաստների գումարները:

Արդյունքում, ըստ Ս.Ղարիբյանի, 2013թ. հունվար-հունիս ամիսների համար կոմիտեի կողմից ծառայությանը ներկայացված «Հղիության և ծննդաբերության նպաստ» և «Ժամանակավոր անաշխատունակության նպաստ» ծրագրերով փոխհատուցման ենթակա գումարներն ավելի է ներկայացվել 584.7 մլն. դրամով:

Ներկայացնելով բացահայտված դեպքերից մի քանիսը, Ս.Ղարիբյանը նշեց, որ, օրինակ` տնտեսավորղ սուբյեկտը կնոջը աշխատանքի է ընդունել հղիության վերցերորդ ամսում գտնվելու ժամանակ: Դրանից հետո աշխատողը ընդամենը մեկ ամիս աշխատելուց հետո նեկայացրել է Ժամանակավոր անաշխատունակության թերթիկ` բյուլետեն և այլևս չի գնացել աշխատանքի` արդյունքում պետությունից ստանալով 150 կամ 220 հազար դրամից ավել նպաստի գումար:

«Ստացվում է, որ աշխատողը մեկ ամիս աշխատելուց հետո բավականին շոշափելի գումար է ստանում պետությունից: Այսպիսի դեպքերը մեր կողմից դիտարկվել են կասկածելի և ռիսկային»,- ասաց նա:

Նշվեց նաև, որ բացահայտել են դեպքեր, երբ նպաստառուն համատեղության կարգով աշխատել է երկու կազմակերպությունում: Դրանք երկուսն էլ փողկապակցված են եղել. նպաստառուն մի կազմակերպությունում աշխատել է առավոտյան 9-ից մինչև 18:30-ը, իսկ մյուսում աշխատաժամանակը սահմանված է եղել 17:30-ից մինչև 21:30: Ստացվում է, որ աշխատողը աշխատել է 9:30-ից մինչև 21:30-ը, ընդորում` 17:30-ից մինչև 18:30-ը վարձու աշխատողը պարտավորված է եղել աշխատել երկու կազմակերպությունների համար միաժամանակ:

«Ի դեպ, առաջին ընկերությունում աշխատողի եկամտի չափը եղել է 1.6 անգամ ավելի, քան ամբողջ կազմակերպության աշխատակիցների միջին ամսական եկամուտը, իսկ երկրորդ կազմակերպությունում եկամուտը ավելի է եղել 2.3 անգամ: Այսպիսով, վարձու աշխատողը նեկայացրել է Ժամանակավոր անաշխատունակության` հղիության թերթիկ և 2 կազմակերպություններում համատեղելու արդյունքում հաշվարկվել և նրան վճարվել է 2 մլն 565 հազար դրամի նպաստ: Առաջինից` 1 մլն 139 հազար դրամ, երկրորդից` 1 մլն 426 հազար դրամի նպաստ»,- ասաց Ս.Ղարիբյանը` հավելելով, որ նմանատիպ դեպքերը դիտարկվում են ռիսկային:

Նրա խոսքերով` ուսումնասիրության արդյունքում նաև պարզվել է, որ անձը աշխատանքի ընդունվելուց հետո 1-ին տարվա ընթացքում 65 հազ. դրամից ավելի ամսական եկամուտ չի ունեցել, հաջորդ տարվա մեջ նրա ամսական աշխատավարձը լրավճարների հետ չի գերազանցել 174.6 հազ. դրամը, սակայն նա այդ տարի ստացել է 2 մլն 835 հազար դրամ պարգևատրում, արդյունքում նրա հղիության նպաստի գումարը կազմել է 2 մլն 32 հազար դրամ: Ավելին՝ այս նույն անձը համատեղության կարգով աշխատել է այլ կազմակերպությունում, ստացել է 303.5 հազար դրամ: Այս կազմակերպությունից նրան վճարվել է պետության հաշվին 1 մլն 237 հազար դրամ հղիության նպաստ: Պարզվել է նաև, որ նրան փոխարինող անձի համար սահմանվել է 187.5 հազար դրամ աշխատավարձ:

Ս.Ղարիբյանը նշեց, որ ավելի քան 170 գործատու 2013թ հունվար-մայիս ամիսներին «Ժամանակավոր անաշխատունակության նպաստ» ծրագրով` գործատուի միջոցների հաշվին վճարման ենթակա նպաստի գումարները ներկայացրել է որպես պետական բյուջեի միջոցների հաշվին վճարման ենթակա նպաստների գումար:

«Վերոգրյալ փաստերը լրացուցիչ քննության ենթարկելու նպատակով ուսումնասիրությունների նյութերը` բաղկացած 338 թերթից, ուղարկվել են ՀՀ գլխավոր դատախազություն»,- հայտնեց Ս.Ղարիբյանը:

Նշենք, որ ժամանակավոր անաշխատունակության, այսինքն՝ հիվանդության դեպքում, կամ հղիության և ծննդաբերության դեպքում նպաստը` բյուլետենի գումարը, վճարվում է ՀՀ կառավարության կողմից հաստատված «Ժամանակավոր անաշխատունակության նպաստի հաշվարկման, նշանակման և վճարման» կարգով: Որպեսզի պետությունը այդ նպաստի գումարները փոխհատուցի` տնտեսվարող սուբյեկտը ՊԵԿ-ին համապատասխան հաստատված ձևով հաշվետվություն է ներկայացնում վարձու աշխատողների եկամտի չափի, պետական բյուջե վճարման ենթակա եկամտային հարկի գումարի և անաշխատունակության` բյուլետենի գումարի վերաբերյալ: Այնուհետև ՊԵԿ-ը հաշվետվություններից դուրս բերելով պետությունից փոխհատուցման ենթակա բյուլետենի և պետությանը վճարման ենթակա եկամտային հարկի գումարների վերաբերյալ տեղեկատվությունը` այն ներկայացնում է ՀՀ սոցիալական ապահովության պետական ծառայություն: Սոցիալական ապահովության պետական ծառայությունը, ՊԵԿ-ից ստանալով պետությունից փոխհատուցման ենթակա բյուլետենի գումարների վերաբերյալ տեղեկատվությունը, նշված գումարի չափով պետական բյուջեի «Ժամանակավոր անաշխատունակության նպաստ» և «Հղիության և ծննդաբերության նպաստ» ծրագրերով կատարում է վճարում: