Ձեր վստահելի աղբյուրը

Արցախյան ազատամարտի մասնակից, «Արամո» ջոկատի անդամ և 1992 թվականին թեժ մարտերում զոհված Արամայիս Մնացյանի ընտանիքը կորցրել է բնակարանը: Նրա կինը` Զվարթ Մնացյանը դեռ 2009-ին վիրահատության համար 450 հազար դրամ գումար ստանալու դիմաց բնակարանը գրավադրել է «Ա. Բաղրամյան» գրավատանը: Սակայն որոշ ժամանակ հետո պարզվում է, որ տիկին Մնացյանի ու նրա նման ևս 40 անձանց բնակարանը նշված գրավատան տնօրեն Արսեն Բաղրամյանի 600 մլն պարտավորության համար գրավադրված է BTA (ԲՏԱ) բանկում:

«Ես բանկ չեմ գնացել, ես գնացել եմ էդ Արսենի գրավատուն, ինձ ասել են նոտարական վավերացումով ինչ-որ փաստաթուղթ ստորագրի, ես էլ ստորագրել եմ: Սա խաբեություն է, ինչպե՞ս կարելի է ինձ խաբեությամբ հանել իմ բնակարանից», Panorama.am-ի թղթակցի հետ զրույցում հուսահատված ասում էր հաշմանդամություն ունեցող կինը: Նրա երկու որդիները արդեն չափահաս են, մեկը սովորում է Երևանի պետական համալսարանում, մյուսն էլ սոցիալական ծանր վիճակի պատճառով կիսատ է թողել ուսումը Ֆիզիկական կուլտուրայի համալսարանում:

Նշված գրավատան տնօրեն Արսեն Բաղրամյանը, փոխտնօրենը և գլխավոր հաշվապահը խարդախություն կատարելու համար դատապարտվել են և այժմ կրում են իրենց պատիժը: Սակայն ընտանիքը շարունակում է մնալ առանց բնակարանի, քանի որ բնակարանները այդպես էլ մնում են ԲՏԱ (BTA) բանկի տնօրինության տակ:

Այս ամենի հետևանքով տուժած Զվարթ Մնացյանի և նույն ճակատագրին արժանացած Արշավիր Սամուելյանի ու Համբարձում Դավթյանի ներկայացուցիչ, Փաստաբանների պալատի փաստաբան Լուսինե Վիրաբյանը Panorama.am-ի թղթակցի հետ զրույցում ներկայացրեց մանրամասներ, ըստ որի` BTA բանկը դիմել է «խորամանկության» և ցեսիայի (իրավունքի զիջման) պայմանագրով բանկը զիջել է այդ պարտավորությունը «ՍԱՐ Կապիտալ» ՍՊԸ-ին:

Փաստաբանն ասաց, որ այն նոր հիմնադրված ՍՊԸ է, ոչ մեկ տեղյակ չէ՝ ինչով է զբաղվում, ինչ գործունեություն է իրականացնում, արդյոք լիցենզիա ունի՞ վարկային գործունեությամբ զբաղվելու համար, թե ոչ: Ավելին, իրավաբանական անձանց պետական ռեգիստրում «ՍԱՐ Կապիտալ» ՍՊԸ-ն և ԲՏԱ բանկը նույն հասցեում են գրանցված ու այն պայմանագիրը, որը ԲՏԱ բանկի անունից կնքվել է քաղաքացիների հետ, ստորագրել է այն անձը, որը հանդես է եկել որպես «ՍԱՐ կապիտալի» տնօրեն:

«Ես չեմ ցանկանում խախտել անմեղության կանխավարկածը, բայց ակնհայտ է, որ ԲՏԱ բանկը իր անունը չերևալու համար ինքն իրենով ստեղծել է ինչ-որ Սար կապիտալ ՍՊԸ ու էդ պարտավորությունը զիջել է այդ ՍՊԸ-ին»,- կարծիք հայտնեց փաստաբան Վիրաբյանը:

Փաստաբանը ներկայացրեց գործում ներգրավված ևս մի անձի` սնանկության կառավարիչ Հրանտ Ղամբարյանին, ով սնանկության գործընթաց է սկսել` «ՍԱՐ կապիտալ»-ը` Արսեն Բաղրամյանին սնանկ ճանաչելու դիմումով:

«Հրանտ Ղամբարյանի հետ այդ ՍՊԸ-ն սկսում է իր ակտիվ գործողությունները, մտնում են դատարան ու առանց աճուրդ նշանակելու, առանց մարդկանց տեղյակ պահելու միջնորդություն է ներկայացնում հանցագործությամբ ձեռք բերված յոթ քաղաքացիների գույքը 19 մլն դրամի փոխարեն զիջում է «ՍԱՐ կապիտալ»-ին: Դատարանն էլ առանց տեղյակ պահելու այս մարդկանց, գոնե որպես երրորդ անձ, որոշում է կայացրել ու բավարարել»,-ասաց Լուսինե Վիրաբյանը:

Զոհված ազատամարտիկի կնոջ` տիկին Զվարթի, պատմելով` Ղամբարյանը վիրավորել է իրեն ՝ «ինձ չի հետաքրքրում, թե զոհվածի կին ես»:

2013-ի օգոստոսի 14-ին փաստաբանը ոստիկանության կենտրոնականի բաժին հաղորդում է տվել այն մասին, որ ԲՏԱ բանկի, «ՍԱՐ կապիտալ»-ի և Հրանտ Ղամբարյանի ոչ իրավաչափ գործողություններից մարդիկ են տուժել և 2013-ի հոկտեմբերի 1-ին հարուցվել է քրեական գործ: Սակայն մինչև այժմ փաստաբանի համար անհայտ պատճառներով բնակիչները տուժող չեն ճանաչվել, իսկ նախաքննությունը վարող ոստիկանության քննիչ Էդգար Այվազյանին փաստաբան Վիրաբյանի դիմումը արդեն մեկ ամսից ավել է` պատասխան չի ստացել:

Այժմ դեռ բնակիչներն ապրում են իրենց բնակարաններում, սակայն արդեն անվանափոխություն է արված: Տիկին Մնացյանն պատմեց, որ Հրանտ Ղամբարյանը գրեթե ամեն օր առավոտյան զանգում է ու ստիպում դուրս գալ տներից:

Այս մասով` փաստաբանը panorama.am-ին հայտնեց, որ իրենք դատարանի միջոցով կասեցրել են վտարման գործընթացը՝ հարուցված քրեական գործը ընթացքում լինելու պատճառով.

«Երբ արդեն որոշվի, որ այս քաղաքացիները իրոք կրել են վնաս, որպես նոր երևան եկած հանգամանք, կդիմենք, որ այդ պայմանագիրը անվավեր ճանաչվի ու նրանց սեփականության իրավունքը վերականգնվի: Բնակիչներին հետաքրքրում է իրենց բնակարանը: Մենք տվել ենք հաղորդումը թող նախաքննությունը պարզի՝ ինչպես է այս շղթան կազմվել, ինչպես է բանկը ձեռք բերել բնակարանները», -մեզ հետ զրույցում հավելեց փաստաբանը:

Նշենք նաև, որ փաստաբանը դիմել է Կենտրոն և Նորք Մարաշ վարչական շրջանների ընդհանուր իրավասության դատարան, որպեսզի գոնե դատարանի միջոցով բնակիչները տուժող ճանաչվեն: Այդ գործով նիստը կկայանա հունվարի 23-ին: