Ձեր վստահելի աղբյուրը

 Ադրբեջանում 2013թ.-ին խոսքի, հավաքների և միավորման ազատությունների վիճակը կտրուկ վատացել է: Այս մասին ասվում է «Human Rights Watch» միջազգային իրավապաշտպան կազմակերպության ամենամյա զեկույցում (World Report-2014):

Ադրբեջանի իշխանությունները կեղծ մեղադրանքներով ձերբակալել են մի քանի տասնյակ քաղաքական ակտիվիստների, քննադատող լրագրողների, ցրել են մի քանի խաղաղ ցույցեր և ընդունել են օրենսդրություն, որն ավելի է սահմանափակել հիմնարար ազատությունները:

Ընդ որում այդ ամենը տեղի է ունեցել Ադրբեջանում հոկտեմբերին կայացած նախագահական ընտրությունների նախաշեմին: ԵԱՀԿ մոնիթորինգային ծառայությունը քննադատել է Ադրբեջանի նախագահական ընտրությունները` անվանելով այն միջազգային ստանդարտներին անհամապատասխան: Ըստ ականատեսների` ընտրատեղամասերի 58%-ում լուրջ խախտումներ են գրանցվել:

Ադրբեջանի կառավարությունը Բաքվի քաղաքացիներին հանել է իրենց իսկ տներից առանց համարժեք փոխհատուցման: Անօրինության միջավայրում շարունակվել է խոշտանգումների և դաժան վերաբերմունքի կիրառումը ոստիկանությունում:

Զեկույցում ասվում է, որ մի շարք ընդդիմադիր գործիչներ են ձերբակալվել կեղծ մեղադրանքներով, ինչպիսիք են թմրադեղերի և զենքի առկայություն, խուլիգանություն, դավադրության կազմակերպում և նույնիսկ դավաճանություն: «NIDA» երիտասարդական շարժման 7 անդամ է ձերբակալվել:

ԶԼՄ-ների ազատության առումով 2013թ.-ին Ադրբեջանի խորհրդարանը մի շարք փոփոխություններ է արել օրենքում, ըստ որի` նույնիսկ համացանցում կառավարությանը զրպարտելը քրեական պատասխանատվության է ենթարկվում:

«Անցած տարվա ընթացքում առնվազն 5 լրագրող կեղծ մեղադրանքերով ձերբակալվել է կառավարության հասցեին հնչեցրած քննադատության կամ լրագրողական հետաքննություններ անցկացնելու պատճառով»,- գրում է «Human Rights Watch»-ը:

Ինչպես նշել է «Human Rights Watch»-ի Հարավային Կովկասի հարցերով ավագ հետազոտող Գեորգի Գոգիան, վերջին տարվա ընթացքում Ադրբեջանում խոսքի ազատությունը աննախադեպ կերպով ճնշվում է:

«Սակայն բոլոր նրանց, ովքեր քննադատում են կառավարությունը, բանտարկելը դժվար թե օգնի կառավարությանը բարձրացնել իր վարկանիշը թե ներքին, և թե արտաքին լսարանի համար»,- ասել է նա:

Զեկույցում ասվում է, որ Ադրբեջանի իշխանությունները 2013թ-ի ընթացքում քրեական պատասխանատվության են ենթարկել 23 քաղաքական ակտիվիստների, լրագրողների, բլոգերների և կառավարության քննադատող մարդու իրավունքերի պաշտպանների: Նրանք բոլորը մինչ այսօր ճաղերի հետևում են: «Կառավարությունը պետք է քաղաքական դրդապատճառներով ձերբակալվածներին ազատ արձակի»,- կոչ է անում «Human Rights Watch»-ը:

Քաղաքական դրդապատճառներով դատապարտվածների շարքին են պատկանում «Ընտրությունների մոնիթորինգի և ժողովրդավարական հետազոտությունների կենտրոնի» նախագահ Անար Մամեդլին, ինչպես նաև ընդդիմության ներկայացուցիչներ` «REAL» ընդդիմադիր խմաբվորման նախագահ Իլգար Մամադովը և «Մուսավաթ» կուսակցության փոխնախագահ Տոֆիգ Յագումբլուն:

Զեկույցում նշվում է, որ Ադրբեջանի միջազգային գործընկերները քննադատել են Ադրբեջանի կառավարությունը` նշելով, որ այն լուրջ խնդիրներ ունի մարդու իրավունքների պաշտպանության ոլորտում, սակայն չեն կարողացել օգտագործել ամբողջ ներուժը, որպեսզի ստիպեն կառավարությանը բարեփոխումներ կատարել:

«Պարզ է, որ Ադրբեջանի կառավարությունը հոգ է տանում իր միջազգային իմիջի մասին, սակայն դեռ շատ բան պետք է փոխվի երկրի ներսում, որպեսզի հնարավոր լինի ասել, որ երկիրը ի կատար է ածում մարդու իրավունքների պաշտպանության իր ստանձնած պարտավորությունները»,- ասել է Գոգիան: