Ձեր վստահելի աղբյուրը

 Ադրբեջանի կողմից իրականացված դիվերսիոն գործողությունների, հետագայում դրանց կանխարգելման, առաջնագծում կորուստները նվազագույնին հասցնելու վերաբերյալ Panorama.am-ը զրուցել է  ռազմական փորձագետների ու գործիչների հետ:

ԱԺ պաշտպանության, ազգային անվտանգության և ներքին գործերի մշտական հանձնաժողովի անդամ Կարեն Սարիբեկյանը կարծում է, որ Ադրբեջանը նման քայլերով ընդգծում է իր վերաբերմունքը բանակցային գործընթացի վերաբերյալ`ցույց տալով «թքած ունի» այն ամենի վրա, ինչն արվում է միջնորդների կողմից` խնդրի խաղաղ կարգավորման ուղղությամբ:

«Դիվերսիոն գործողություններն իրականացվում են Ադրբեջանի ղեկավարության քաղաքական որոշումների հիման վրա և դրա դեմը հնարավոր կլինի առնել` Ալիևի նկատմամբ ճնշումներ իրականացնելու միջոցով»,- նշեց Կ. Սարիբեկյանը` հավելելով, որ մինչ այդ, հայկական զորքերի մարտունակությունը պետք է անընդհատ բարձրացնել, ինչը թույլ կտա նվազագույնի հասցնել հնարավոր կորուստները:

Կ. Սարիբեկյանը  վստահ է, որ հակառակորդին խիստ պատժի ենթարկումն այլընտրանք չունի և նրանք իրենց քայլերի համար պետք է պատասխան տան:

Այս առնչությամբ, ռազմական փորձագետ Սամվել Պետրոսյանը նշեց, որ անկախ այն հանգամանքից, թե հնարավոր կլինի արդյոք դիվանագիտական ճանապարհով կարգավորել սահմանագծին տեղի ունեցող նմանատիպ միջադեպեր, հայկական կողմը պետք է անըդհատ բարձրացնի առաջապահ ստորաբաժանումների զգոնությունը:

«Մարտական հերթապահություն իրականացնող ստորաբաժանումները համապատասխան ուսուցում և հրահանգավորում մշտապես ստանում են, սակայն հաշվի առնելով Ադրբեջանի կողմից հաճախակի իրականացվող սադրանքները, մանավանդ, բանակցությունների մակարդակով տեղի ունենալիք հանդիպումների առաջ ու կարևոր տարածաշրջանային այցերի ընթացքում պետք է առավել ուժեղացված ծառայություն իրականացնեն առաջնագծում»,-հավելեց Ս. Պետրոսյանը:

«Ցավոք, հակառակորդի դիվերսիոն գործողությունը հնարավոր եղավ կասեցնել հայ զինծառայողի զոհվելու գնով, սակայն ամեն դեպքում հայ դիրքապահները ի վիճակի եղան, իրենց մի քանի անգամ գերազանցող հակառակորդին ոչ միայն դիմադրել, այլ ետ շպրտել հայկական դիրքից: Որքան էլ հակառակորդը փորձում է թաքցնել իր զոհերի ու վիրավորների իրական թիվը, ամեն դեպքում, վերջին օրերին նկատելի է, որ ադրբեջանական լրատվամիջոցները տեղեկացնումե ն տարբեր միւադեպերի արդյունքում մահացած կամ վիրավորված` մեկ տասնյակի հասնող միջադեպերի մասին»,- նշեց նա:

«Ամեն դեպքում, անհրաժեշտ է հակառակորդին անհամաչափ հարված հասցնել, որպեսզի հակառակորդի մարտական դիրքերում կանգնածները հասկանան, որ ցանկացած նման դեպք անպատիժ չի մնալու»,- եզրափակեց բանախոսը:

Նախորդիվ` 

Ադրբեջանը դիվերսիոն խմբերի ներթափանցման փորձեր է իրականացրել, հայ զինծառայող է զոհվել

Ադրբեջանը հաղորդում է 4 վիրավորների առկայության մասին

Պնախարարը՝ Ադրբեջանի դիվերսիոն խմբերի հարձակումը կասեցրած զինվորների մասին

Նոր դիվերսիա` ազդանշան քաղաքական նահանջի մասին