Ձեր վստահելի աղբյուրը

«Հարևան, բայց ոչ բարեկամ երկրում կատարվածը, ամենայն հավանականությամբ, պետք է դիտարկեն ոչ թե հրադադարի ռեժիմի խախտման, այլև ս.թ. հունվարի 19-ի լույս 20-ի գիշերը Մարտակերտի պաշտպանական ուղղությամբ ադրբեջանական դիվերսանտների կողմից ձեռնարկված նախահարձակ գործողության համատեքստում»,- մեկնաբանելով ադրբեջանական ԶԼՄ-ների լուրերն այն մասին, թե այսօր, հայկական կողմից արձակված գնդակից ադրբեջանցի կապիտան է սպանվել, ասվում է ԼՂՀ ՊՆ մամուլի ծառայության տարածած հաղորդագրությունում:

«Հարկ ենք համարում հիշեցնել, որ միայն ս.թ. հունվարի 20-ից 23-ն ընկած ժամանակահատվածում Բաքվի լրատվամիջոցների հաղորդմամբ, ադրբեջանական բանակում (իբր տարբեր հանգամանքներում) արձանագրվել է մահվան 2 և վիրավորման 6 դեպք… Իսկ այս ամենից արվելիք հետևությունը, թերևս, մեկն է. Ադրբեջանի ռազմական "ագիտպրոպը" նրբանկատորեն փորձում է ներկայացնել այն, ինչի մասին պետք է խոստովաներ օրեր առաջ…»,- նշվում է հաղորդագրությունում:

ԼՂՀ ՊՆ հաղորդագրության համաձայն, տեղեկատվությունն այն մասին, թե հունվարի 23-ին, հայկական կողմից կրակոցից զոհվել է ադրբեջանական բանակի կապիտան Էլնուր Ջաֆարովը, իրականությանը չի համապատասխանում:

«ՊԲ առաջապահ ստորաբաժանումները շարունակում են պահպանել հրադադարի ռեժիմը, և միայն պատասխան քայլերի են դիմում խիստ անհրաժեշտության դեպքում»,- նշված է  հաղորդագրության մեջ:

Ադրբեջանը հաղորդում է շփման գծում կապիտանի սպանվելու մասին