Ձեր վստահելի աղբյուրը

Ամենօրյա ճեպազրույցի ընթացքում ԱՄՆ պետդեպարտամենտի մամուլի խոսնակի տեղակալ Մարի Հարֆն հայտարարել է, որ տեղյակ չէ ադրբեջանական դիվերսիայի մանրամասներին և խոստացել է ուսումնասիրել փաստերը: Այս մասին տեղեկացնում  է ԱՄՆ պետդեպարտամենտի պաշտոնական կայքը:

Լրագրողը խնդրել է Պետքարտուղարութան դիրքորոշումը ներկայացնել հունվարի 19-ի լույս 20-ին ադրբեջանական դիվերսիոն խմբերի հարձակման և հայ զինվոր Արմեն Հովհաննիսյանի սպանության կապակցությամբ:

«Ես տեղյակ չեմ կոնկրետ միջադեպին: Ուրախ կլինեմ այն ստուգել և մեկնաբանություն ստանալ ձեզ համար»,-նշել է Հարֆը:

Լրագրողը ներկայացրել է ԱՄՆ-ի հայկական կազմակերպությունների և վերլուծաբանների այն հայտարարությունը, թե ադրբեջանական սպառնալիքների կամ հարձակումների պարագայում, ինչպես տեղի էր ունեցել մի քանի օր առաջ, Պետդեպարտամենտը, բռնության գործողությունը և հրադադարը խախտած կողմին քննադատելու փոխարեն, հանդես է գալիս շատ ընդհանրական հայտարարություններով:

«Մենք կոչ ենք անում կողմերին խուսափել բռնությունից և խնդիրները լուծել խաղաղ ճանապարհներով»,-ասել է վերջինս:

Հիշեցնենք, որ հունվարի 19-ի լույս 20-ի գիշերը ժամը 23:50-ից մինչև 00:15-ի սահմաններում ղարաբաղա-ադրբեջանական հակամարտ զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններում արձանագրվել են հակառակորդի դիվերսիոն խմբերի ներթափանցման միաժամանակյա փորձեր:

«ԼՂՀ զինված ուժերի առաջապահ ստորաբաժանումները հավաստանշելով ադրբեջանական դիվերսիոն խմբերի գործողությունները, երկու ուղղություններում էլ անցել են կազմակերպված պաշտպանության և հակառակորդին պատճառելով զգալի մարդկային և նյութական կորուստ՝ հետ շպրտել իր ելման դիրքերը: Բռնկված փոխհրաձգության արդյունքում հակառակորդի կողմից ստացած հրազենային վիրավորումից՝ հյուսիսարևելյան ուղղությամբ տեղակայված մարտական դիրքում իր առջև դրված մարտական խնդիրը արիաբար կատարելու ժամանակ զոհվել է կրտսեր սերժանտ Ա. Հովհաննիսյանը»-հայտարարել էր ԼՂՀ ՊԲ մամուլի ծառայությունը: