Ձեր վստահելի աղբյուրը

Երկուշաբթի օրը Ստրասբուրգում մեկնարկում է ԵԽԽՎ ձմեռային նստաշրջանը: Օրակարգում Հայաստանին ուղղակիորեն առնչվող հարց չկա, փոխարենը դրա մեկնարկը, ըստ կանխատեսումների, կարող է ոչ այնքան հաճելի լինել հայկական պատվիրակության համար` «Ժառանգություն» խմբակցության ղեկավար, պատվիրակության նախկին անդամ Զարուհի Փոստանջյանը «անակնկալ» է պատրաստել:

Այդ մասին Panorama.am-ը զրուցեց պատվիրակության անդամ, ԲՀԿ խմբակցության քարտուղար Նաիրա Զոհրաբյանի հետ:

-Տիկին Զոհրաբյան, շրջանառվող լուրերի համաձայն հունվարի 27-ին մեկնարկելիք ԵԽԽՎ ձմեռային նստաշրջանում հայկական պատվիրակության նախկին անդամ Զարուհի Փոստանջյանին հաջողվել է պայմանավորվածություն ձեռք բերել առնվազն 10 պատգամավորների հետ, որոնք կվիճարկեն ՀՀ պատվիրակության լիազորությունները: Եթե, այդուհանդերձ, նման բան լինի, ապա ինչ հետևանք կարող է ունենալ և արդյոք դա նշանակում է, որ հայկական պատվիրակությունը այս նստաշրջանում կզրկվի ելույթներ ունենալու և հարցեր բարձրացնելու հնարավորությունի:

-Ոչ, այդպես չի նշանակում: Այո, ես չեմ բացառում, որ Զարուհի Փոստանջյանը կգտնի տասը պատգամավորների` դա բացարձակապես դժվար խնդիր չի, ովքեր նստաշրջանի բացման օրը կվիճարկեն ՀՀ պատվիրակության լիազորությունների հարցը:

-Այդ դեպքում ի՞նչ է դա ենթադրում:

-Հայկական պատվիրակությունը կշարունակի աշխատել այնպես, ինչպես աշխատել է: Խնդրին պետք է անդրադառնա ԵԽԽՎ կանոնակարգի հանձնաժողովը` կարծում եմ նստաշրջանի ընթացքում, սովորաբար դա լինում է չորեքշաբթի կամ հինգշաբթի օրը, հանձնաժողովը կանդրադառնա խնդրին: Բայց ես այս պահին արդեն վստահաբար կարող եմ ասել, որ որևէ հետևանք այդ հարցի արծարծումը չի կարող ունենալ, որովհետև հայկական պատվիրակության կազմավորման սկզբունքը բացարձակապես համահունչ է ԵԽԽՎ կանոնակարգին և երկու հիմնարար սկզբունքները` իշխանություն-ընդդիմություն հավասարություն, ինչն ապահովված է պատվիրակության և հիմնական կազմում` երկու իշխանության ներկայացուցիչ, երկու ընդդիմության և երկրորդ հիմնարար պահանջն է գենդերային բալանսը, որը ևս պահպանված է: Այնպես, որ ես վստահ եմ, որ կանոնակարգի հանձնաժողովը կհաստատի, որ հայկական պատվիրակությունը կազմավորված է բացառապես ԵԽԽՎ կանոնակարգի համաձայն:

-Ի դեպ, պատվիրակության անդամ ՀԱԿ խմբակցության ղեկավար Լևոն Զուրաբյանը հայտարարել է, որ եթե նման հարց բարձրացվի Զարուհի Փոստանջյանի կողմից, ապա ինքը, ի նշան համերաշխության, ևս ոտքի է կանգնելու և վիճարկելու է հայկական պատվիրակության լիազորությունների հարցը: Ստացվում է, որ Լ. Զուրաբյանն ինքը վիճարկելու է իր իսկ մանդատի օրինականության հարցը…

-Ես տեղյակ չեմ պարոն Զուրաբյանի նման հայտարարությանից, բայց եթե նման բան ասվել է, ապա երևի թե պարոն Զուրաբյանը զուտ ընդդիմության համերաշխությունից ելնելով է նման հայտարարություն արել: Ավելին ասել չեմ կարող, քանի որ լրացուցիչ պարզաբանումների համար ճիշտ է դիմել հենց պատգամավորին:

-Տիկին Զոհրաբյան, վերադառնալով առաջին հարցին` հայկական պատվիրակությունը կզրկվի՞ ելույթ ունենալու հնարավորությունից մինչև հանձնաժողովը քննարկի հարցը, արդյոք դա այդպես է:

-Ոչ, դա կարող էր լինել միայն այն դեպքում, եթե ԵԽԽՎ տվյալ նստաշրջանի օրակարգում ընդգրկված լիներ կոնկրետ Հայաստանին վերաբերվող հարց: Կրկնում եմ` այս նստաշրջանում Հայաստանին ուղղակիորեն առնչվող հարց չկա, ուստի պատվիրակությունը կշարունակի աշխատել այնպես, ինչպես աշխատել է:

Նախորդիվ`

Ն.Զոհրաբյան. Շատ հույսեր չենք կարող կապել ԵԽԽՎ նախագահների փոփոխության հետ