Ձեր վստահելի աղբյուրը

 Ադրբեջանի պաշտպանության նախարարության մամուլի ծառայությունը պաշտոնական հաղորդագրություն է տարածել Մամիկոն Խոջոյանի մասին, ով ըստ Ադրբեջանի ՊՆ-­ի, «հայկական դիվերսիոն խմբի կազմում փորձել է հատել հայ­ադրբեջանական սահմանը, սակայն սահմանի այդ հատվածում տեղակայված զորամասերի զգոնության շնորհիվ առաջխաղացումը կասեցվել է»:

Նշենք, որ Վերին Կարմիր Աղբյուր գյուղի բնակիչ Մամիկոն Խոջոյանը այսօր դուրս է եկել տանից և մինչև այժմ նրա գտնվելու վայրի մասին ստույգ տեղեկություններ չկան: Նրան վերջին անգամ սահմանագծի մերձակայքում տեսել է նույն գյուղի հովիվներից մեկը: Ոստիկանությունից արդեն հայտնել են, որ Խոջոյանը առողջական խնդիրներ է ունեցել (հոգեկան) և վերջին 2-3 տարիներին հաշվառված է եղել ու գտնվել բժիշկների վերահսկողության տակ:

Ըստ Ադրբեջանի ՊՆ-­ի, «Խոջոյանը (77 տարեկան) եղել է հայկական դիվերսիոն խմբի ուղեկցողը և նահանջի պահին ձերբակալվել է Ադրբեջանի ԶՈՒ զինծառայողների կողմից. վերջինս եղել է զինված, իսկ ձերբակալման պահին` վիրավոր»:

Նկատենք, որ ավելի վաղ, ադրբեջանական մի շարք լրատվամիջոցները, և մասնավորապես, «Հաքքին.ազ» լրատվականը կայքը, տեղեկացրել էին, որ Խոջոյանին նկատել են ոչ թե «զգոն զինծառայողները», ինչպես պնդում է Ադրբեջանի ՊՆ-­ն, այլ տեղի բնակիչները, ովքեր վերջինիս հանձնել են զինծառայողներին:

Մեկ նկատառում ևս. ադրբեջանական լրատվամիջոցները նախապես ներկայացնելով միջադեպը, որևէ տեղեկություն չէին հայտնել Խոջոյանի վիրավոր լինելու հանգամանքի վերաբերյալ, սակայն Ադրբեջանի ՊՆ վերջին հաղորդագրությունում նշվում է, որ վերջինիս վիրավոր է:

Panorama.am­ի հետ զրույցում, պաշտպանության նախարարի մամուլի խոսնակ Արծրուն Հովհաննիսյանը կտրականապես հերքեց դիվերսիոն գործության մասին լուրը, նշելով, որ հայկական ստորաբաժանումներն այդ ուղղությամբ որևէ գործողություն չեն իրականացրել:

Ոստիկանությունը հայտնում է անհետ կորածի, ադրբեջանցիները` վերջինիս սահմանը հատելու մասին