Ձեր վստահելի աղբյուրը

Այսօր ԵԽԽՎ լիագումար նիստում, ԵԽ գլխավոր քարտուղար Թյորբորն Յագլանդի ելույթի ժամանակ, ԱԺ պատգամավոր Նաիրա Զոհրաբյանը հիշեցրել է, որ այսօր հայ ռազմագերի Հակոբ Ինջիղուլյանի ծննդյան օրն է, ով արդեն տևական ժամանակ է ռազմագերի է Ադրբեջանում:

Դիմելով ԵԽ գլխավոր քարտուղարին, Նաիրա Զոհրաբյանն ասել է. «Ահա արդեն քանի ամիս է Ադրբեջանում պատանդի կարգավիճակով պահվում է հայ զինվոր Հակոբ Ինջիղուլյանը, ով տեղանքում մոլորվելով, հայտնվել էր ադրբեջանական գերության մեջ: Ամբողջ այս ընթացքում Ադրբեջանի կողմից խախտվել են միջազգային բոլոր հնարավոր կոնվենցիաները: Կարմիր Խաչը անում է հնարավորը, Հակոբին տուն, կամ գոնե երրորդ երկիր տեղափոխելու համար, սակայն առ այս պահը ապարդյուն: Հապաղումը կարող է ճակատագրական լինել Հակոբի կյանքի համար: Ինչո՞ւ մեր Վեհաժողովը որևէ կոնկրետ քայլ չի ձեռնարկում, որպեսզի Ադրբեջանը սկսի հարգել իր իսկ ստանձնած միջազգային պարտավորությունները և հայ զինվորին պատանդ չպահի»:

Ի պատասխան հայ պատգամավորի հարցի, ԵԽ գլխավոր քարտուղար Յագլանդն ասել է. «Ինձ համար մի քիչ դժվար է կոնկրետ այդ դեպքի համար որևէ մեկնաբանություն անելը, սակայն մենք աշխատում ենք Կարմիր Խաչի հետ և պաշտպանում ենք նրանց քայլերը: Ցավոք սրտի, կոնֆլիկտներով զբաղվելը մեր կառույցի իրավասության մեջ չէ և կողմերից որևէ մեկը մեզ չի դիմել, որ մենք զբաղվենք այդ կոնֆլիկտով: Սակայն, մենք պետք է անենք հնարավորը, որ ԵԽ անդամ երկրները կարողանան լուծել վիճահարույց հարցերը»: