Ձեր վստահելի աղբյուրը

«Միգրացիոն օրենսդրությունը խստացվել ու խստացվելու է հետագայում ևս, ինչը ճիշտ է ու որոշակիորեն ուշացած: Երկար տարիներ այն եղել է չափազանց լիբերալ, ինչը հնարավորություն էր տալիս ցանկացած մարդու գալ Ռուսաստան և աշխատանք գտնել, ինչն էլ իր հերթին մի շարք խնդիրներ էր ծնում: Ժամանակն էր խստացնել»,-Panorama.am-ի հետ զրույցում ասաց ռուս քաղաքագետ-կովկասագետ Անդրեյ Եպիֆանցևը` անդրադառնալով այն տրամադրություններին, որոնք տիրում են Հայաստանում ՌԴ միգրացինո օրենսդրության խստացման առումով:

Հիշեցնենք, ըստ այդ փոփոխությունների` օտարերկրյա քաղաքացիները, այդ թվում և ՀՀ քաղաքացիները ՌԴ տարածքում կարող են գտնվել վեց ամիսների ընթացքում ընդամենը 90 օր, լքել տարածքն ու վերադառնալ միայն 90 օր անց:

Քաղաքագետի խոսքով` այլ բան է, որ Մաքսային միությանն անդամակցելու շրջանակում, եթե նույնիսկ սահմանափակումներ լինեն օտարերկրյա քաղաքացիների համար, ապա դա չի վերաբերի Հայաստանի, Բելառուսի և Ղազախստանի քաղաքացիներին. «Այդ երկրների  քաղաքացիները կկարողանան հանգիստ մեկնել ՌԴ օրինական հիմքով աշխատելու համար»:

«Սա  հիմնական փաստարկներից մեկն էր Հայաստանի` Մաքսային միությանն անդամակցելու հարցում, քանի որ ի տարբերություն ՄՄ-ի, ԵՄ հետ ասոցացումը նման պայմաններ Հայաստանի քաղաքացիներին չէր առաջարկում»,- հիշեցրեց նա:

Ինչ վերաբերում է ամենագլխավոր հարցին` արդյո՞ք տրամաբանական էր նման խստացումները տարածել նաև ՀՀ քաղաքացիների վրա, երբ շատերը երկար տարիներ աշխատել, ապրել են Ռուսաստանում կամ մեկնել սեզոնային աշխատանքի, այն էլ այսօր, երբ անդամակցության մասին ՀՀ որոշումը հստակ արտահայտված է, Եպիֆանցևը նշեց.

«Ճիշտ և տրամաբանակա՞ն էր խստացնել միգրացիոն քաղաքականությունը նաև հայերի համար այսօր, երբ բանակցություններ են ընթանում հարցին կպատասխանեմ` այո: Գուցե դա փոքր-ինչ տհաճ էր, բայց այդուհանդերձ տրամաբանական: Եվ թող սա լինի մոտիվացիոն փաստարկ` բանակցությունների ակտիվացման համար»,- շեշտեց քաղաքագետը:

Նշենք, որ Panorama.am-ի հետ զրույցում Արամ Սաֆարյանն այսօր կարծիք հնչեցրեց` մեր սխալը այն է, որ չենք բարձրաձայնում խնդիրների ու դժգոհությունների մասին ու կոնկրետ միգրացիոն քաղաքականության խստացման մասին էլ հարկավոր է բարձրաձայնել:

Մինչդեռ, նրա խոսքով,  նման հարցեր քննարկելու փոխարեն հասարակությունում դեռ շարունակում են քննարկել, թե ինչու է լավ կամ վատ Մաքսային միությանն անդամակցելը:

«Գործն արդեն ավարտված է, հիմա մենք բանակցությունների փուլում ենք գտնվում, ի՞նչ է նշանակում անընդհատ նույն սիրողական մակարդակում քննարկել` սա լավ է, թե վատ»,- շեշտել էր նա:

Նախորդիվ`

Ա.Սաֆարյան. Ինչո՞ւ չեն բարձրաձայնում խնդիրները, որոնք հուզում են հասարակությանը