Եվրոպայի խորհրդում Ադրբեջանի դեմ ստորագրահավաք է կազմակերպվել

Հասարակություն 19:14 30/01/2014

Եվրոպայի խորհրդում Ադրբեջանի դեմ ստորագրահավաք է կազմակերպվել

Ստրասբուրգում անցկացող Եվրոպայի խորհրդի խորհրդարանական վեհաժողովի շրջանակներում տարածվել է Ադրբեջանի դեմ ուղղված հռչակագիր, որի տակ ստորագրում են ԵԽԽՎ պատգամավորները։

Ինչպես հայտնում է Ստրասբուրգում Panorama.am-ի թղթակիցը, հռչակագրում ԵԽԽՎ պատգամավորները կոչ են անում Ադրբեջանին՝ ազատ արձակել Մարդու իրավունքների պաշտպան և ընտրական դիտորդ Անար Մամմադլիին։

Տարածված փաստաթղթում ասվում է, որ Անար Մամմադլին մարդու իրավունքների հարգված պաշտպան է, ով միջազգային կառույցների, այդ թվում նաև Եվրոպայի խորհրդի հետ միասին իրականացրել է Ադրբեջանում մոնիտորինգ։

Նրա կազմակերպությունն իրականացրել է Ադրբեջանի համապետական ընտրական գործընթացների դիտարկում՝ սկսած 2001թ․-ից։

2013թ․-ի հոկտեմբերի 9-ին Ադրբեջանում տեղի ունեցած նախագահական ընտրություններից հետո «Ժողովրդավարական ընտրությունների եվրոպական պլատֆորմը» ներկայացրեց ընտրությունների վերաբերյալ քննադատական զեկույցներ։

Անար Մամմադլին «Ժողովրդավարական ընտրությունների եվրոպական պլատֆորմի» վարչության անդամ է ընտրվել 2013թ․-ի դեկտեմբերի 10-ին։

«Մենք կոչ ենք անում Ադրբեջանի իշխանություններին՝ ապահովել Անար Մամմադլիի արդար և թափանցիկ դատավարությունը՝ համապատասխան Մարդու իրավունքների եվրոպական կոնվենցիային։ Բացի այդ, մենք կոչ ենք անում անհապաղ վերացնել նրա նկատմամբ նախնական կալանքը։ Անար Մամմադլին ողջ ընթացքում լիովին համագործակցել է քննություն իրականացնող մարմնի հետ և մենք համարում ենք, որ կալանքի համար որևէ արդարացում չի տրվել»,-մասնավորապես նշում են նրանք։

Փաստաթղթի տակ արդեն ստորագրել են 60-ից ավելի պատգամավորներ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: