Ձեր վստահելի աղբյուրը

Կրթության ազգային ինստիտուտի փոխտնօրեն Անահիտ Բախշյանը կարծում է, որ բանակում պետք է ծառայեն անխտիր բոլոր տղաները: Անդրադառնալով Զինապարտության մասին օրենքում կառավարության նախաձեռնած փոփոխություններին, նա կարծիք հայտնեց, որ պետք է ծառայեն նաև այն տղաները, որոնք պատրաստվում են շարունակել ուսումը արտասահմանյան այն բուհերում, որոնց կառավարությունը հավանություն կտա:

Panorama.am-ի թղթակցի հետ զրույցում նա հարց հնչեցրեց, թե ինչու պիտի Հարվարդի համալսարանում սովորող ուսանողը չծառայի իր երկրին, իսկ Երևանի պետական համալսարանում սովորողը` ծառայի. «Ինչո՞ւ այսպիսի խտրականություն: Հարվարդ կլինի, ֆլետչեր կլինի… մի խոսքով, կարևոր չէ: Այդ բոլոր տղաները թող ծառայեն բանակում, իրենց պարտքը տան երկրին, պահեն սահմանները, երկու տարի իրենց մաշկի վրա զգան այդ պատասխանատվությունը, որ «ես գնացի, իմ երկրի սահմանները պաշտպանեցի, հետևաբար ես իմ երկիրը չեմ լքի, կգնամ կսովորեմ, լավ մասնագետ կդառնամ: Հետ պիտի գամ և ծառայեմ իմ երկրին, որի սահմանները պաշտպանել եմ»»:

Անահիտ Բախշյանը շեշտեց, որ ոչ մեկին չպետք է տրվի արտոնություն: Զինապարտության մասին օրենքի հետ նա համաձայն է` բացառությամբ այդ կետի:

«Այո, կարող է լինել կառավարության որոշում, որ փայլուն ջութակահար կա, նրան չի կարելի տանել բանակ»,- կարծում է Անահիտ Բաշխյանը:

Ըստ նրա, կան մասնագիտություններ, որտեղ երիտասարդն իրեն դրսևորում է, կարող է բոլորի պարծանքը լինել, նրան պետք է արտոնել:

Նշենք, որ նախաձեռնած փոփոխության մասին խոսելիս ԿԳ նախարարն ասել էր, որ նախապատվությունը տրվելու է բուհերի որակին և մասնագիտություններին: Նախարարությունը ցանկանում է գործուղել այն մասնագիտություններով, որոնք անհրաժեշտ են երկրի տնտեսությանը, այն մասնագիտություններով, որոնք այստեղ թույլ են զարգացած կամ ընդհանրապես բացակայում են:

Ըստ Կրթության ազգային ինստիտուտի փոխտնօրենի, փոփոխության նախագծում, սակայն, սողանքի տեղ են թողել: «Նախագահի և վարչապետի նախաձեռնած «Լույս» հիմնադրամով հովանավորվող համապատասխան ցանկում առկա համալսարաններ ընդունված ուսանողներին կառավարությունն անխոս տալիս է տարեկետման իրավունք: Հիմա տողատակերում երևում է, որ այս Զինապարտության մասին օրենքը չի վերաբերելու այս հիմնադրամի հովանավորած ուսանողներն»,- ասաց Անահիտ Բախշյանը:

Կրթության ազգային ինստիտուտի փոխտնօրենը կոչ արեց բոլոր պատգամավորներին, որ օրենքի նախագծի քննարկման և ընդունման ժամանակ ուշադրություն դարձնեն իր նշած սողանքի վրա և այնպես անեն, որ այդ կետը չանցնի:

Ավելի վաղ Panorama.am-ի թղթակցի հետ զրույցում ԿԳ նախարարության արտաքին կապերի և սփյուռքի վարչության պետ Տիգրան Սահակյանն ասել էր, որ մինչ օրս պետությունը փակում էր հնարավոր բոլոր սողանքները, որոնց միջոցով կարելի էր անհիմն խուսափել զինվորական ծառայությունից:

«Սա այն տեղերից մեկն էր մնացել, որտեղ մարդիկ փորձում էին մանևվրել: Նպատակը հաճախ ոչ թե կրթություն ստանալն էր, այլ բանակից խուսափելը: Դա երևում էր ուսանողների դիմումների ձևերից: Գալիս էին մեզ մոտ շատ մարդիկ և ասում էին` կարևոր չէ, թե որտեղ կընդունվենք: Եղել են բազմաթիվ ուսանողներ, ովքեր դիմել են բոլոր ծրագրերին: Իրենց չի հետաքրքրում, թե ինչ երկրի և ինչ բուհեր են: Այսինքն, իրենց համար կարևորը տարկետում ստանալն է»,- պարզաբանել էր նա:

Կառավարությունը հավանություն է տվել «Զինապարտության մասին» օրենքում փոփոխություն կատարելու օրենքի նախագծին, որի ընդունման դեպքում կձևավորվեն օրենսդրական հիմքեր` օտարերկրյա բուհերում ուսում ստանալը պարտադիր զինվորական ծառայությունից խուսափելու միջոցի վերածելու դեպքերը բացառելու նպատակով:

Ակնկալվում է, որ օտարերկրյա բուհում սովորելը ուղղված կլինի անձի` միայն կրթական կարիքները բավարարելուն: Ըստ այս պահին գործող կարգի, բանակից տարկետում են ստանում բոլոր նրանք, ովքեր հաղթում են մրցույթներում: Հիմա արդեն տարկետումը կտրամադրվի անհատական մոտեցմամբ, որոշումները կկայացվեն անհատապես:

Նախորդիվ`

Տարկետման նոր կարգի, պայմանագրի, գրավի և արտերկրից չվերադառնալու ռիսկերի մասին

Ա.Աշոտյան. Տարկետման իրավունքից կօգտվեն ուսանողները որոշակի վերապահումներով

Տարկետման իրավունքը կվերանա