Ձեր վստահելի աղբյուրը

Մայր Աթոռի կողմից այսօր իրականացվում են սոցիալական տարբեր ծրագրեր, աջակցություն է ցուցաբերվում սոցիալապես անապահով ընտանիքներին, կարիքավորներին: Սոցիալական ծրագրերն առավել համակարգելու նպատակով Մայր Աթոռում արդեն գործում է Սոցիալական ծառայությունը, որի տնօրեն օրեր առաջ Գարեգին Բ Ամենայն Հայոց Կաթողիկոսի կողմից նշանակվեց Մայր Աթոռի միաբան Տ. Իսահակ վարդապետ Պողոսյանը:

Իրականացվող ծրագրերի, ինչպես նաև առաջիկա ձեռնարկների մասին Panorama.am-ը զրուցեց ծառայության նորանշանակ տնօրեն Տեր Իսահակ վարդապետ Պողոսյանի հետ:

-Ի՞նչ նպատակ և առաքելություն ունի Սոցիալական ծառայությունը: Արդյոք մինչև այժմ սոցիալական ծրագրեր չի՞ իրականացրել Մայր Աթոռը:

-Մայր Աթոռի սոցիալական ծրագրերի մասին ես չէ, որ պիտի խոսեմ, որովհետև դրանց առկայության ապացույցները որքան շատ, այնքան էլ խոսուն են: Բայց եթե հարցն ինձ եք ուղղում, կամ եթե ինձ եք վերապահում Սոցիալական ծառայության նպատակի և առաքելության մեկնաբանությունը` կապված իմ նշանակման հետ, ապա պետք է ասել, որ Սոցիալական ծառայության կազմավորումը կամ համակարգումը ի շարս Մայր Աթոռի ոչ պակաս կարևոր ու բազմաբովանդակ բաժինների, եղել է Վեհափառ Հայրապետի վաղեմի մտածումներից, չեմ սխալվի, եթե ասեմ անհանգստություններից մեկը:

Ծառայության ոլորտն ինքնին բավական ընդգրկուն է և էության մեջ ներառում է հանրության գրեթե բոլոր ոլորտները: Առաքելության նպատակը` կրկին ծառայությունը: Օգնությունների գրասենյակի գործառույթի հիմնական բաղադրատարրն է կազմում մասնավորաբար աջակցումը մեր ժողովրդի առավել անապահով խավերին: Սույն ճանապարհին, մի դեպքում` պետք է ծրագրեր, առաջարկներ երևան բերել, հավաքագրել միջոցներ, և մի դեպքում էլ` իրականացնել դրանց առավել նպատակային կենսագործումը:

Մայր Աթոռի` մինչև այժմ սոցիալական ծրագրեր իրականացնելու ամենամեծ վկայությունը, նախ` մեր ժողովրդի մեջ արմատացած մտածումն է. այն որ բառիս բուն նշանակությամբ` ամեն տեսակ օգնություն կարելի է ակնկալել «Եկեղեցուց», ինչը թերևս շատ պատճառաբանություններ ունի: Բայց որոնց մեջ էականն ու ամենից ավելի պատճառաբանվածը`մեր ժողովուրդը, ելնելով իր հավատքից ու հավատքի վստահությունից, միշտ էլ իր տագնապներն ու ուրախությունները տարածել է իր Սուրբ Եկեղեցու վրա, համարելով, որ այն Աստծո և աստվածայինի տեսանելի, շոշափելի վկայությունն է երկրի վրա և դրա մեջ մեծ ու անթաքույց ճշմարտություն կա:

Առավել պատկերավոր պատասխանելու համար հարցին, թե` արդյոք մինչև այժմ սոցիալական ծրագրեր չի իրականացրել Մայր Աթոռը: Պետք է ասել, որ Մայր Աթոռի սոցիալական ծրագրերի և մասնավորապես Հայոց Հայրապետի բազմեռանդ ջանքերի արդյունքում են կյանքի կոչվել արդեն տասը տարիներ ի վեր գործող Մալաթիայի, Նորքի, Արաբկիրի, Էջմիածնի, Վանաձորի բարեգործական ճաշարանները, ուր անխափան օրը երեք անգամ սնվում են թվով մոտ հազար տարեցներ, օրավուր աճող հայորդաց տները, որտեղ մեր մատաղ սերնդին`վաղվա զինվորին ու բանաստեղծին են փոխանցում լուսավոր գալիքի հունդերը հարյուրավոր մանկավարժներ. Էջմիածնի «Քյուրքչյան» և Երևանի «Նագգաշյան» մանուկների տները, «Գարեգին Բ» տնաշինական ծրագիրը, «Շնորք Գասպարյան» երիցաց տունը և այլն և այլն:

- Ի՞նչ սոցիալական ծրագրեր են իրականացվում այսօր Մայր Աթոռի կողմից:

- Ամանորի և Սուրբ Ծննդյան տոներին ընդառաջ Ս. Էջմիածնի և «Սիրիահայերի հիմնախնդիրները համակարգող կենտրոնի» համագործակցության արդյունքում Վեհափառ Հոր կողմից հարյուր հազարական դրամ է փոխանցվել սիրիահայ առավել կարիքավոր մոտ հիսուն ընտանիքների: Հունվար ամսից սկսյալ դրամական օգնություններ են տրվել կարիքավոր ուսանողների, բազմանդամ կարիքավոր ու ազատամարտիկների ընտանիքների: Եկող ամիս Մայր Աթոռի երիտասարդ միաբանների և «Մանանա» երիտասարդական ծրագրի հետ համատեղ ծրագրված են տնօրհնեքներ և բազմակի այցելություններ բազմանդամ կարիքավոր ընտանիքների, որոնց ընթացքում Մայր Աթոռի կողմից աջակցություն կցուցաբերվի հիշյալ ընտանիքների երեխաներին:

- Կարծեք ծառայության նպատակն է ավելի համակարգել Եկեղեցու կողմից իրականացվող տարբեր ծրագրեր: Ի՞նչ ծրագրեր եք նախատեսում իրագործել առաջիկայում:

-Միանգամայն ճիշտ եք: Ու թեև Սոցիալական ծառայությունը նոր է կազմավորվում, այդուհանդերձ ծրագրերը շատ են: Նախատեսում ենք համագործակցության ձևավորում մարզային և եկեղեցական կառույցների, բարեսիրական կազմակերպությունների և մանավանդ երիտասարդների հետ: Առիթ պիտի ընձեռենք, որ յուրաքանչյուր հայորդի իր կարելվույն չափով մասնակիցը դառնա սույն ձեռնարկների: Անձնապես Ինձ համար սա մի առանձին խանդավառության առիթ պիտի լինի: Ինչ վերաբերում է հառաջիկային, պետք է նշել, որ գործող բազմաբնույթ ծրագրերը կշարունակեն իրենց բնականոն ընթացքը` առավել ընդլայնելով իրենց ուղեծիրը: Կլինեն նաև նոր նախաձեռնություններ, որոնց անդարդարձ կկատարվի ժամանակի մեջ: