Ձեր վստահելի աղբյուրը

Հայաստանը շահագրգռված է ԵՄ-ի հետ հարաբերությունների ընդլայնմամբ և ի դեմս Իտալիայի ակնկալում է ակտիվ գործընկերոջ աջակցությունն այդ հարցում: Այս մասին հայտարարել է վարչապետ Տիգրան Սարգսյանը Իտալիայի Հանրապետության նորանշանակ արտակարգ և լիազոր դեսպան Ջովաննի Ռիչուլլիի հետ հանդիպմանը:

Կառավարության տեղեկատվության և հասարակայնության հետ կապերի վարչության հաղորդմամբ, զրուցակիցներն անդրադարձել են ինչպես երկկողմ, այնպես էլ Եվրոպական միության շրջանակում համագործակցության հեռանկարներին: Կառավարության ղեկավարը բարձր է գնահատել ԵՄ տեխնիկական և ֆինանսական օժանդակությունը մեր երկրում բարեփոխումների իրականացման գործընթացում:

Տիգրան Սարգսյանը նշել է, որ հայ-իտալական դարավոր բարեկամական հարաբերությունների հիմքում ընկած են հարուստ պատմական և մշակութային կապերը և հույս հայտնել, որ դեսպանն իր գործունեությամբ նոր թափ կհաղորդի դրանց:

Դեսպան Ռիչուլլին շնորհակալություն է հայտնել ջերմ ընդունելության համար՝ հավաստիացնելով, որ պաշտոնավարման ընթացքում կանի հնարավորինս՝ երկկողմ հարաբերությունները տարբեր ոլորտներում ամրապնդելու և խորացնելու ուղղությամբ:

Երկուստեք անհրաժեշտ է համարվել առևտրատնտեսական համագործակցության ոլորտում առկա ներուժի լիարժեք իրացումը: Այդ համատեքստում կարևորվել է հայ և իտալացի գործարարների միջև կապերի ակտիվացումը, համատեղ բիզնես ծրագրերի իրականացումը: