Ձեր վստահելի աղբյուրը

Այսօր Ազգային ժողովի նախագահի աշխատասենյակում խորհրդարանական խմբակցությունների ղեկավարների հետ քննարկումից հետո ԱԺ Հանրապետական խմբակցության ղեկավար Գալուստ Սահակյանն արդեն ԱԺ նիստերի դահլիճում առաջարկեց իր նախաձեռնությոն շուրջ քննարկումները շարունակել և քվեարկությունը կազմակերպել ԱԺ վաղվա նիստում:

Սակայն խորհրդարանական ընդդիմության ներկայացուցիչները հակադարձեցին, ասելով, որ դա ԱԺ կանոնակարգ օրենքի խախտում կարող է համարվել, քանզի ԱԺ Հաշվիչ հանձնաժողովը, ըստ օրենքի, պետք է ձևավորվի նստաշրջանի առաջին նիստում: Եվ ԱԺ նախագահին այլ բան չէր մնում, քան հարցը դնել քվեարկության:

Հիշեցնենք` Սահակյանն առաջարկում էր ԱԺ Հաշվիչ հանձնաժողովի նախկինում 7 հոգանոց կազմը դարձնել 11 հոգանոց, որից 5-ը Հանրապետական խմբակցությունից, 2-ը՝ «Բարգավաճ Հայաստան» և մեկական պատգամավոր էլ մյուս խմաբակցություններից:

ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը հայտարարեց, որ իրենք խմբակցությունում քննարկել են հարցը, և ԲՀ խմբակցությունը չի մասնակցում Սահակյանի առաջարկած հարցի քվեարկությանը:

«Մեզ համար ակնհայտ է խնդիրը` ունենալ տոտալ մեծամասնություն` մնացած այլ քաղաքական ուժերի ձայնը հաշվի չառնելու համար: Եթե ընդունվում է այս տարբերակը «Բարգավաճ Հայաստանը» չի մասնակցելու և անդամ չի ներկայացնելու այդ կերպ ձևավորված Հաշվիչ հանձնաժողովում», -հայտարարեց Զոհրաբյանը:

Քվեարկության արդյունքներով ձայների մեծամասնությամբ` 67 կողմ և 1 ձեռնպահ, որոշվեց փոփոխություն մտցնել ԱԺ Հաշվիչ հանձնաժողովի կազմում:

Խորհրդարանական ընդդիմության առաջարկությունը` Հաշվիչ հանձնաժողովի կազմի ձևավորման մեջ փոփոխություն չկատարել և հանձնաժողովի 7 հոգանոց կազմը թողնել նույնը, ԱԺ Դաշնակցություն խմբակցության անդամ Արմեն Ռուստամյանը հետ վերցրեց. «Ես անիմաստ եմ համարում դրա քվեարկությունը և այդ պատճառով էլ հանում եմ քվեարկությունից»:

ԱԺ «Ժառանգություն» խմբակցությունը ևս չմասնակցեց Հաշվիչ հանձնաժողովի ձևավորման հարցի քվեարկությանը, և այդ խմբակցության ղեկավար Ռուբեն Հակոբյանը հայտարարեց, որ իրենք հրաժարվում են անդամի թեկնածու ներկայացնել:

Քվեարկությունից հետո ԱԺ ՀԱԿ խմբակցության ղեկավար Լևոն Զուրաբյանը ևս հայտարարեց, որ ՀԱԿ խմբակցությունից որևէ ներկայացուցիչ չի ընդգրկվի Հաշվիչ հանձնաժողովի կազմում. «ՀԱԿ խմբակցությունը սա գնահատում է որպես փորձ ստեղծելու ապօրինությունների մեխանիզմ Ազգային ժողովում և խորացնելու դա»:

Խմբակցությունների տեսակետը լսելուց հետո ԱԺ նախագահ Հովիկ Աբրահամյանը հայտարարեց, որ իր կարծիքով կատարվածը ԱԺ բնականոն աշխատանքները խաթարելու և ԱԺ մեծամասնությանը ճնշելու փորձ է:

«Դա ձեզ չի հաջողվի»,- հավելեց խորհրդարանի խոսնակը:

ԱԺ ՀԱԿ խմբակցության պատգամավոր Նիկոլ Փաշինյանի պահանջով ԱԺ նախագահ Հովիկ Աբրահամյանը պահանջեց քվեարկության արդյունքները տրամադրել խմբակցություններին:

Նախորդող հրապարակում`

Տարաձայնություններ Ազգային ժողովում