Ձեր վստահելի աղբյուրը

 ՀՀ կառավարությունն իր պաշտոնական էջում տեղադրել է հունվարի 23-ին Կառավարության 61–Ն որոշումը, որով ներկայացվում է Հայաստանի` Մաքսային միությանը անդամակցելու նպատակով միջոցառումների ծրագրի (ճանապարհային քարտեզ) իրականացմանն ուղղված գործողությունների ժամանակացույցը:

Հրապարակված ճանապարհային քարտեզի, ինչպես նաև Հայաստանի` Մաքսային միությանը անդամակցելու վերաբերյալ panorama.am-ը զրուցեց քաղաքագետ Սերգեյ Մինասյանի հետ:

Վերջինիս կարծիքով` հրապարակված փաստաթուղթը վկայում է այն մասին, որ Մաքսային միությանը Հայաստանի անդամակցության գործընթացը մտնում է լուրջ իմաստավորված մի փուլ:

«Դա տեխիկական փաստաթուղթ է: Հրապարակված 262 միջոցառումների քանակը խոսում է այն մասին, որ մենք իսկապես տեսնում ենք` Մաքսային միության Հայաստանի անդամակցության գործընթացը մտնում է լուրջ իմաստավորված մի փուլ: Այս փաստաթղթի ձևը խոսում է այն մասին, որ եթե հայկական կողմը առաջ քաշի և ՄՄ-ի համապատասխան կառույցների հետ քննարկի և ընդհանուր հայտարարի գա որոշ տնտեսական հարցերի շուրջ, ապա Հայաստանի անդամակցության որևէ տնտեսական կամ տեխնիկական խնդիր չի լինի»,- ասաց Ս. Մինասյանը:

Հայաստանի` Մաքսային միությանը միանալու` 2013թ սեպտեմբերի 3-ի որոշումից ի վեր շրջանառվում է, այն տեսակետը, թե Մաքսային միությանը անդամակցելով Հայաստանը որոշակիորեն կորցնում է իր սուվերենությունը. Ի՞նչ կասի սրա մասին Ս.Մինասյանը:

Քաղաքագետի կարծիքով, այս մտքին և՛ կողմ և՛ դեմ արտահայտվողները առաջին հերթին առաջնորդվում են սեփական քաղաքական մոտեցումներով:

«Ես հասկանում եմ այդ խոսակցությունների կոնտեքստը: Այս մտքին և՛ կողմ,  և՛ դեմ արտահայտվողները առաջին հերթին առաջնորդվում են սեփական քաղաքական մոտեցումներով և նրանց հայտարարությունը չափազանց քաղաքականացված են: Նման հայտարարությունները առաջին հերթին խոսում են դրանք հնչեցնողի քաղաքական կողմնորոշման մասին»,- ասաց Ս. Մինասյանը: