Եվրամիությունը կոչ է անում Վրաստանին երկխոսություն ծավալել Ռուսաստանի հետ

Տարածաշրջան 17:15 04/02/2014

Եվրամիությունը կոչ է անում Վրաստանին երկխոսություն ծավալել Ռուսաստանի հետ

Եվրոպական հանձնաժողովի նախագահ Ժոզե Մանուել Բարոզուն ողջունել է ռուս-վրացական հարաբերությունները կարգավորելու ողղությամբ պաշտոնական Թբիլիսիի որդեգրած մոտեցումը և ընդգծել, որ Ռուսաստանի հետ Վրաստանի երկխոսությունն անհրաժեշտություն է: Այս մասին գրում է «Գռուզիա Օնլայն» պարբերականը:

«Մենք հարգում ենք Վրաստանի տարածքային ամբողջականությունը, և միաժամանակ, կարծում ենք, որ Ռուսաստանի հետ երկխոսությունը հակամարտության լուծման միակ ուղին է»,- ասել է Ժ. Բարոզուն:

Աղբյուր նաև գրում է , որ Վրաստանի նախկին վարչապետ Բիձինա Իվանիշվիլին հնարավոր է համարում ԵՄ-ին Վրաստանի միանալուն զուգահեռ կարգավորել հարաբերությունները Ռուսաստանի հետ: Նրա խոսքով՝ Վրաստանը պետք է դրական հիմքով կառուցի հարաբերությունները Ռուսաստանի հետ:

«Հարաբերությունների կարգավորման քայլերից մեկը Սոչիի Օլիմպիադային մասնակցությունն է, և մեր թիմը պետք է մասնակցի: Ես ողջունում եմ իշխանությունների գործողությունները»,- հայտարարել է Բ. Իվանիշվիլին:

Հիշեցնենք, որ Վրաստանի և Ռուսաստանի միջև դիվանագիտական հարաբերությունները դադարեցվել են 2008թ.-ի օգոստոսյան պատերազմից հետո, ինչի արդյունքում Ռուսաստանը ճանաչել է Աբխազիայի և Հարավային Օսեթիայի անկախությունը: 2000թ.-ին Ռուսաստանը վիզային ռեժիմ է հաստատել Վրաստանի հետ՝ հայտարարելով Վրաստանի տարածքից, Պանկիսի կիրճից դեպի Ռուսաստան ահաբեկիչների տեղափոխման վտանգի մասին:

2012թ.-ի հոկտեմբերի խորհրդարանական ընտրություններից հետո Վրաստանում իշխանության է եկել «Վրացական երազանք» դաշինքը: Ընտրությունների արդյունքում ձևավորված կառավարությունը առաջնահերթություն է հռչակել Ռուսաստանի հետ հարաբերությունների կարգավորումը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: