Պուտինը շնորհակալություն է հայտնել արտասահմանյան գործընկերներին

Հասարակություն 18:37 05/02/2014

Պուտինը շնորհակալություն է հայտնել արտասահմանյան գործընկերներին

Ռուսաստանի Դաշնության նախագահ Վլադիմիր Պուտինը օլիմպիական ավան կատարած այցի ժամանակ շնորհակալություն է հայտնել արտասահմանյան գործընկերներին՝ Սոչիի ձմեռային օլիմպիական խաղերի անվտանգությունը ապահովելու հարցում ցուցաբերած օգնության համար: Այս մասին տեղեկացնում է «Взгляд» թերթը:

«Ցանկանում եմ շնորհակալություն հայտնել բոլոր երկրներին, որ ակտիվ կերպով համագործակցում են ռուս գործընկերների հետ»,- նշել է Պուտինը՝ միաժամանակ ավելացնելով,- «Օլիմպիական խաղերի ժամանակ գործելու է արագ արձագանքման շտաբ, որում ամենօրյա ռեժիմով աշխատելու են հատուկ ծառայությունների ներկայացուցիչներ՝ նաև այլ երկրներից»:

Պուտինի խոսքով` խոշոր միջազգային նախագծերի ժամանակ անվտանգային հարցերը միշտ էլ առաջին պլանում են լինում և մտահոգում բոլորին: Այս համատեսքտում Պուտինը հիշատակել է վերջին տարիներին այդ միջոցառումների ժամանակ տեղի ունեցած որոշ ողբերգական դեպքեր:

Նկատենք, որ Սոչիի օլիմպիական խաղերի ժամանակ անվտանգության ապահովման խնդիրները դարձել են լուրջ քննարկման առարկա, հատկապես վերջին շրջանում Վոլգոգրադ քաղաքում տեղի ունեցած ահաբեկչական գործողություններից հետո:

Այս տարվա հունվար ամսին ԱՄՆ նախագահ Բարաք Օբաման ևս հայտարարությամբ էր հանդես եկել՝ ընդգծելով, որ «Սոչիի օլիմպիական խաղերի ժամանակ անվտանգությունը ապահովված է բարձր մակարդակով, թեև որոշակի ռիսկեր այնուամենայնիվ շարունակում են մնալ»:

Միաժամանակ տեղեկություններ հրապարակվեցին՝ ըստ որոնց դեպի Սև ծով են մոտենում ամերիկյան երկու ռազամական նավ, որոնք Օլիմպիական խաղերի ժամանակ հնարավոր արտակարգ իրավիճակներում կարող են օգնություն ցուցաբերել ռուս գործընկերներին:

Արտասահմանյան լրատվամիջոցները արդեն իսկ Սոչիի օլիմպիական խաղերը բնութագրել են որպես «նախագահ Պուտինի կարևոր փորձություններից մեկը»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: