Ձեր վստահելի աղբյուրը

Երբ դպրոցների վարկանիշավորման գաղափարն առաջ քաշվեց ու ամրագրվեց օրենքով, Կրթության ազգային ինստիտուտի փոխտնօրեն, այն ժամանակ ԱԺ պատգամավոր Անահիտ Բախշյանը ևս կողմ էր դրան:

«Բայց, կարծում եմ, թե ես էլ եմ սխալվել: Մեր արժեքազուրկ իրականությունն է պատճառը և քանի դեռ դպրոցի գնահատումն, ըստ կառավարման համակարգի արդյունավետության և դպրոցի, այլ ոչ կրկնուսույցի, տված գիտելիքների օբյեկտիվ գնահատականներով, որակներով չի որոշվում, շատ սխալ բան է ստացվում: Ես այն ժամանակ չընդվզեցի այդ կետի դեմ` մտածելով, որ ինչ-որ բան կփոխվի մեր երկրում: Հուսով էի, որ մինչ այս գաղափարը կդրվի գործածության մեջ, իրականությունը կփոխվի, կապաքաղաքականացվի, սակայն եղավ հակառակը»,- Panorama.am-ի հետ զրույցում ասաց ԿԱԻ փոխտնօրենը:

Անահիտ Բախշյանը խոստովանում է` ցանկանում էինք լավ լիներ, ստացվեց ինչպես միշտ. «Ես չգիտեմ ինչպես է իրականացվել արդեն հրապարակված վարկանիշավորման գործընթացը այդ դպրոցներում, որտեղ այս պիլոտային ծրագիրն է արվել, որքանով է այն համապատասխանում օրենքին և 2010-ին կառավարության ընդունած շատ թերի կարգին»:

ՀՀ հանրակրթական դպրոցների ներքին և արտաքին գնահատման չափանիշները սահմանելու կարգն անընդհատ Անահիտ Բախշյանի ձեռքի տակ է:

«Ըստ սրա, դպրոցը պիտի ունենա ներքին գնահատում, որը պետք է հրապարակվեր մինչև 2013-ի սեպտեմբերի 5-ը: Այն պետք է իրականացվի տարեկան մեկ անգամ և արդյունքները հրապարակվեն հանրապետական մամուլում, նախարարության պաշտոնական կայքում, որպեսզի ծնողական և աշակերտական համայնքները ծանոթանան: Ոչ մի տեղ ոչ մի նման հրապարակում չեղավ ու հանկարծ 2014-ի հունվարին նախարարը հայտարարում է վարկանիշավորման մասին: Այս կարգի մեջ շատ բաներ կան, որ իրարամերժ են ու տվյալ դպրոցում կրթության հանրակրթական չափորոշիչներին համապատասխան կազմակերպված կրթության որակի մասին չեն վկայում»,- ասաց Անահիտ Բախշյանը:

ԿԱԻ փոխտնօրենը նշեց, որ բացի ներքին գնահատումից պետք է նաև արտաքին գնահատում լինի, վարկանիշավորման պատկերը երկուսի արդյունքում է ստացվում: Արտաքին գնահատում կարող են անել Կրթության պետական տեսչությունը և ԳԹԿ-ն:

«Եղե՞լ է, չի՞ եղել: Ո՞ր կազմակերպությունը ո՞ր դպրոցում է արտաքին գնահատում արել, չգիտենք: Մեկ էլ ահա՝ արդյունքներն ենք իմանում: Հիմա ես պետք է նստեմ, տեսնեմ այդ դպրոցներում արվե՞լ է գնահատում, ե՞րբ է արվել, հատուկ այդ նպատակո՞վ է արվել, թե՞ չգիտեմ, որ թվականի արտաքին գնահատման արդյունքներն են դրել: Այս բոլոր հարցերն օդի մեջ են, պատասխաները չկան»,- մանրամասնեց ԿԱԻ փոխտնօրենը:

Անահիտ Բախշյանի բնորոշմամբ, վարկանիշավորումը մրցակցություն է ենթադրում, որի տակ պիտի համագործակցություն լինի: Դա նշանակում է, որ դպրոցը, Կրթության ազգային ինստիտուտը, Մանկավարժական համալսարանը, պետական տեսչությունը, Գիտելիքների թեստավորման կենտրոնն ու մարզպետարանը պետք է համագործակցեն այս հարցում:

«Ինչքան ազնիվ ու արհեստավարժ պիտի լինեն գնահատողները, որպեսզի վարկանիշավորման ներկայացված արդյունքները վստահելի լինեն, վիճահարույց չլինեն, ու համոզիչ՝ տվյալ համայնքի համար: Այստեղ շատ կասկածներ են լինելու: Այս ճանապարհը, որով գնում է գործընթացը, արդեն ստվերվում է՝ կրթության ոլորտի չափազանց քաղաքականացված լինելու պատճառով: Օրենքի պահանջը, որն այլ նպատակներ էր դրել, միանգամից խեղաթյուրում է: Չգիտեմ արդյունքում ինչ կլինի»,- ասաց նա:

Անահիտ Բախշյանը մեկ անգամ ևս կարևորեց կրթության ոլորտը քաղաքականությունից զերծ պահելու անհրաժեշտությունը, ինչպես պահանջում է թե «Կրթության մասին», թե «Հանրակրթության մասին» ՀՀ օրենքները: «Անկախ նախարարի անձից, քանի դեռ Հանրապետական կուսակցության փոխնախագահը կրթության նախարար է, իսկ տնօրենները՝ նույն կուսակցական կրծքանշաններով, որոնք կրում են շատ ցուցադրական կերպով, ուրեմն ոչ մի վարկանիշի հասարակությունը չի հավատա»:

Կարդացեք նաև`

Ինչ խնդիրներ է կոծկում դպրոցների վարկանիշավորումը

ԿԳՆ-ն ներկայացրեց դպրոցների վարկանիշավորման պիլոտային ծրագիրը