Ձեր վստահելի աղբյուրը

Հայաստանում Ավետարանական եկեղեցու, ապա նաև Ավետարանչական ընկերակցության հիմնադիր, այսօր արդեն անկախ` Երևանի Ավետարանական եկեղեցու խորհրդի նախագահ Լևոն Պարտակչյանը դիմել է Panorama.am-ի խմբագրություն և ցանկություն հայտնել արձագանքել օրերս այս եկեղեցու վերաբերյալ Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանի հայտարարություններին:

Լևոն Բարդակջյանը կտրականապես համաձայն չէ Ալեքսանդր Ամարյանի այն հայտարարությանը, թե «Ավետարանականը չի կարող լինել քույր եկեղեցի: Եթե Հայ Առաքելական եկեղեցուց է դուրս եկել, արդեն աղանդ է: Դա վկայակոչում է նաև իրենց հովիվը, ով ասում է, որ իրենց կառույցի գործունեությունն աղանդակերպ է»:

«Սա մեր համայնքը համարում է սխալ արտահայտություն: Մենք դեմ ենք, որ Ավետարանականն աղանդ է: Ես մասնագիտությամբ կրոնագետ եմ և Աստվածաբանության դոկտոր: Մենք նյութեր ենք պատրաստում այդ ամենի դեմ: Քանի տարի է հանդուրժող ենք եղել: Ինչ-որ Ամարյանն ասում է` շիտակ չէ: Որ Առաքելական եկեղեցուց դուրս եկողն աղանդ է, դա այդպես չէ: Նույնիսկ Հիսուս Քրիստոսին էին փարիսեցիներն աղանդ ասում: Սա վատաբանելու նպատակ ունի, թեկուզ աղանդ բառը սխալ, վատ բառ չէ, բայց մեր հասարակության մեջ այս բառը իմաստ է ստացել: Ոչ միայն Հայ Առաքելական եկեղեցին է, որ ճշմարտադավան է: Այլ եկեղեցիներ էլ Առաքելականից դուրս, ևս ճշմարտադավան են: Առաքելականին նման է Ավետարանականը: Եթե ասում են քույր եկեղեցի չեն, քույր եկեղեցի հասկացությունը աստվածաբանական շեշտադրում է, վարդապետական հիմք է: Երբ որ նույն հավատամքի մեջ են, քույր եկեղեցի են: Ամարյանը սխալ բան է ասում»:

Որպես աղանդ լինելու ապացույց Ալեքսանդր Ամարյանը խոսել էր նաև այն մասին, որ Ավետարանական եկեղեցին վերամկրտությամբ է զբաղվում: Լևոն Պարտակչյանը արձագանքեց այսպես. «Մեր եկեցեղում մենք վերամկրտություն չունենք»:

Ալեքսանդր Ամարյանի «Հայ ավետարանական եկեղեցին զբաղված է վերամկրտությամբ, որն արգելված է» հայտարարությունը ծիծաղ առաջացրեց Լևոն Պարտակչյանի մոտ. «Ո՞ւմ կողմից է արգելված»:

Մեր դիտարկմանը, որ ըստ Հայ Առաքելական եկեղեցու միայն մեկ անգամ են մկրտվում, Երևանի Ավետարանական եկեղեցու խորհրդի նախագահը նախ արձագանքեց, որ մկրտությունն այլ թեմա է: Երբ երկրորդ անգամ հնչեց հարցը` դո՞ւք վերամկրտություն անում եք, նա պատասխանեց. «Ավետարանական եկեղեցին երեխաներին նվիրում է անում փոքր տարիքից, որը մկրտություն չէ, մենք մկրտություն չենք կոչում: Մենք նվիրում ենք անում նորածին երեխային` ծնողների հավանությամբ և համայնքի ներկայությամբ, որովհետև ինքը չգիտի, թե ինչ է լինում: Մենք ուտել-խմել չունենք, մեր համար ավելի հոգևոր իմաստ ունի նվիրումը, քան թե ծիսական: Առանց կնքահոր և կնքամոր է արվում, որովհետև չի կնքվում երեխան փոքր տարիքից: Մենք առիթ ենք տալիս, որ երեխան երբ որ կմեծանա, ինքը որոշի որտեղ մկրտվել: Մեկ անգամ է մկրտությունը»:

Եթե, օրինակ, մարդ, ով արդեն չափահաս է, նախկինում եղել է Առաքելական եկեղեցու հետևորդ և մկրտված է, բայց որոշել է գալ Ավետարանական եկեղեցի: Այդ դեպքում Ավետարանական եկեղեցում նրան երկրորդ անգամ մկրտո՞ւմ են:

Այս հարցին Լևոն Պարտակչյանի պատասխանն այսպիսին էր. «Դուք նկատի ունեք, որ արդեն չափահա՞ս է»:

Մ.Թ. «Այո: Օրինակ մարդը երեք ամսականում մկրտվել է, բայց 18-ում որոշել գալ Ձեր եկեղեցի»:

Լևոն Պարտակչյան. «Հա, մենք չենք մկրտում նորից: Մեր հավատամքի մեջ էլ մեկ մկրտություն կա: Ես Ավետարանական եկեղեցուց տարել եմ Առաքելական եկեղեցու մեջ կնքել եմ մի քանի հարյուր մարդկանց»:

Ինչ վերաբերում է Ալեքսանդր Ամարյանի դիտարկմանը, թե Ավետարանչական կազմակերպությունը Հայաստանում տարածքներ է ձեռք բերում, որոնց սեփականատեր է դառնում Ամերիկայում գրանցված կազմակերպութունը, ապա Լևոն Պարտակչյանը նշեց, որ ինքը հիմնել է հայաստանյան ներկայացուցչությունը:

«Մերձավոր Արևելքում էլ մասնաճյուղեր ունի, Եվրոպայում էլ, միջազգային կազմակերպութուն է: Ի՞նչ խնդիր կա: Բան չկա, ընկերակցությունն այտեղի է, բայց Հայաստանի օրենքներով»,- ասաց նա:

Ըստ Երևանի Ավետարանական եկեղեցու ներկայացուցչի, նման հայտարարությունները թշնամանք են սերմանում հասարակության մեջ: Նա պնդում է, որ այդ հայտարարություններից հետո իրենց ներկայացուցիչների վրա հարձակումներ են եղել և ոտնձգություններ են արվել իրենց դեմ:

Այս հրաարակումներում ամենից հաճախ հնչում է Հայ Առաքելական Եկեղեցու անունը, ուստի   Panorama.am-ը հարկ համարեց հնչած հարցերի և մեկնաբանությունների համար դիմել նաև Առաքելական Եկեղեցու սպասավորի:

Բագրատ Սրբազան Գալստանյանը մեզ հետ զրույցում անդրադառնալով Հայ Ավետարանչական Եկեղեցու՝ Առաքելականին քույր լինել-չլինելու հարցին, ասաց. «Սկզբունքորեն, եթե Ավետարանական եկեղեցին, կամ որևէ այլ եկեղեցի զբաղվում են մարդոսրսությամբ և վերամկրտությամբ, չեն կարող կոչվել քույր եկեղեցի: Եվ հստակ է՝ որքան էլ որ իրենք ասեն՝ չեն զբաղվում, իրենք զբաղվում են դրանով: Եվ ոչ միայն իրենք, այլև իրենց բազմաթիվ այլ ճյուղեր: Խոսքով ասելով չի, գործով է: Իրենք անում են: Եվ, նույնիսկ քույր չէ, մայր են համարում մեր եկեղեցուն: Եվ եթե մայր են համարում, թող վերադառնան եկեղեցու ծոցը և վերջանա խնդիրը: Ավելորդ դերասանութուններ անելու ժամանակ չկա»:

Բագրատ Սրբազանի մեկնությամբ, Ավետարանական եկեղեցին բացարձակ Առաքելական հաջորդականություն, շարունակություն չունի: Նա նշեց, որ Ավետարանական եկեղեցին առաջ է եկել բողոքական շարժումից:

«Կտրված է ընդհանուր եկեղեցու արմատից: Չունի ձեռնադրության խորհուրդ, չունի պսակի խորհուրդ, այնպես, ինչպես կա: Իրենց համար պսակը սոսկ վկայություն է, ոչ մի խորհուրդ չունեն, ամբողջ ուղղափառ դավանանքից շեղված եկեղեցի է: Ես մինչև հիմա շատ մեղմ եմ խոսել այս առիթով, և ես ասում եմ՝ ժամանակը եկել է, որ իրենք իրենց դիրքերը ճշտեն, թե ով են իրենք ընդհանրապես, ինչ են իրենցից ներկայացնում: Եկեղեցի՞ են, եկեղեցի չե՞ն: Նրանք կտրված են, Առաքելական հաջորդականություն չունեն: Ծառի բնից ծուռ ծնված ճյուղ են: Ավելորդ են այդ արդարացումները, Հայ եկեղեցին համեմատել, ասել , որ շեղված է: Դա իրենց չի արդարացնում, իրենց արմատի արդարացումը չեն տա: Ես վարդապետական կողմն եմ ասում, դեռ չեմ ասում գործնականը, գետնի վրա: Ընդհանրապես զբաղվում են մարդորսությամբ: Իսկ դա դատապարտելի է: Ես սա սիրով եմ ասում, բայց երբ դերասանութուն են անում, խաբեբայությամբ են զբաղվում, սա լավ երևույթ չէ: Խաբեբայություն մի արեք, ուզում եք ապրել, ապրեք, ձեր գոյությունը պահեք, որքան կարող եք, բայց մի փորձեք դա անելով արդարացնել ձեզ»,- պարզաբանեց Սրբազանը:

Հայ Առաքելական Եկեղեցու սպասավորը պնդեց, որ Ավետարանական եկեղեցին զբաղվում է վերամկրտությամբ. «Եթե շատ են պնդելու, համառելու, որ վերամկրտություն չեն անում, ես մարդիկ կբերեմ վկայելու համար, որ իրենք վերամկրտել են այդ մարդկանց»:

Այսպիսով` փոքր ինչ անհասկանալի է մնում, թե ուրեմն ինչի դեմ է բողոքում Լևոն Բարդակջյանը: Նշենք, որ panorama.am-ը չի պատրաստվում խորանալ կրոնագիտական հարցերի մեջ և լրատվական հարթակը այն տեղը չէ, որտեղ այս հարցերը պիտի իրենց լուծումը գտնեն:

Նախորդիվ՝

Ամարյան. Կրոնական կառույցների ճամբարներում երեխաներին սեռական դաստիարակություն են տալիս