Ձեր վստահելի աղբյուրը

«Կովկաս» իստիտուտի տնօրեն, քաղաքագետ Ալեքսանդր Իսկանդարյանն այսօր լրագրողների հետ զրույցում տեսակետ հայտնեց, որ ԼՂ հակամարտության կարգավորման մեջ փոփոխություններ չեն լինի. «Ղարաբաղում ոչինչ տեղի ունենալ չի կարող: ԼՂ հակամարտության կարգավորման մեջ ոչ մի փոփոխություն չի լինի, դա անհնար է, ո՛չ այս, ո՛չ այն կողմ: Առնվազն կարճաժամկետ հեռանկարում ներկայիս իրավիճակը կպահպանվի: Մասնավորապես` համանախագահները կշարունակեն փորձել չսպանել Մինսկի գործընթացը: Գործընթացի պահպանման համար կարվի ամեն ինչ, այն պատճառով որ այն կողմերի համար անվտանգության որոշակի ձևաչափ է»:

«Միսկի խմբի հիմնական խնդիրը այս փուլում բանակցային գործընթացի պահպանում է: Դա ամենևին վատ խնդիր չէ: Իմ կարծիքով, Մինսկի գործընթացը պետք է պահպանվի, այն պարզ պատճառով, որ այն ստատուս-քվոյի պահպանման ձևաչափերից մեկն է»,- հավելեց բանախոսը:

Ինչ վերաբերում է Մինսկի խմբի համանախագահների կողմից հրադադարի ռեժիմի խախտման դեպքերին մշտապես հավասարակշռված գնահատական տալուն,ապա դա, ըստ քաղաքագետի, բնական գործընթաց է: «Համանախագահների նպատակը Մովսես Առաքյալ լինելն ու ճիշտը ասելը չէ: Նրանց գործը գործընթացի շարունակականության ապահովումն է»:

Անդրադառնալով շփման գծում վերջին շրջանում արձանագրվող լարվածությանը` քաղաքագետը նշեց, որ սադրանքները իրականացվում են Բաքվի ուղիղ հրամանով: «Ադրբեջանական կողմը նման քայլերի գնալու հստակ դրդապատճառ ունի և դա անկասկած լարվածության պահպանումն է»:

Միևնույն ժամանակ բանախոսը գրեթե ի սպառ բացառում է պատերազմի վերսկսման հնարավորությունը:

«Պատերազմի վերսկսման համար անհրաժեշտ է, որ այն վերսկսող կողմը ցանկալի է 80, իսկ ամենաքիչ 50-60 տոկոսով վստահ լինի, որ հաղթանակը իրական է: Ղարաբաղում նման հավանականությունը կարճաժամկետ և երկարաժամկետ հեռանկարում բացառվում է»,- նշեց Ա. Իսկանդարյանը: