ՌԴ պատրաստ է արտահանել «Իսկանդեր» հրթիռային համակարգերը, ՀՀն հետաքրքրված է այդ համակարգերի ձեռք բերմամբ

Քաղաքական 15:28 07/02/2014

Կոլոմնայի մեքենաշինության բյուրոն պատրաստ է արտահանման հանձնել «Իսկանդեր» օպերատիվա-մարտավարական հրթիռային համակարգերը: Այս մասին տեղեկացնում է «Իտար-տասս» լրատվական գործակալությունը՝ հղում անելով ընկերության գլխավոր տնօրեն Վալերի Կաշինի հայտարարությանը:

Վալերի Կաշինի խոսքով, սկզբնական շրջանում որոշ գործոններով պայմանավորված ընկերությունը դադարեցրել էր հրթիռային համակարգերի արտասահմանյան վաճառքը և հիմնական մատակարարումները իրականացնում էր ՌԴ Պաշտպանության նախարարությանը: Զինատեսակով հետաքրքրված արտասահմանյան գնորդներին տեղեկացվել էր, որ վաճառքը կվերսկսվի 2015 թվականից:

«Այժմ, երբ մենք հասել ենք «Գոսոբոռոնզակազ»-ի սահմանած պահանջները բավարարող արտադրական չափանիշների, «Ռոսոբոռոնէկսպորտի»-ի հետ մեկտեղ ձեռնամուխ ենք եղել արտահանումը առաջ տանելուն: Զենքի ձեռք բերման համար էլ հայտերն արդեն ներկայացված են»:

Նկատենք, որ նախորդ տարվանից, ինտենսիվորեն տեղեկություններ են շրջանառվում Հայաստանի կողմից, «Իսկանդեր» հրթիռային համակարգեր ձեռք բերելու մտադրության մասին:

Այդ հարցի առնչությամբ պաշտպանության նախարար Սեյրան Օհանյանը հավելել է, որ ՀՀ-ն մեծ ուշադրություն է դարձնում հատկապես հեռահար և գերճշգրիտ հրթիռային համակարգերի ձեռքբերմանը.

«Ասեմ, որ մեր պայմանավորվածություններն ուժի մեջ են և արդեն այս տարի վերջնականապես ավարտին կհասցվի հեռահար և գերճշգրիտ միջոցների ձեռքբերումը»,- ասել էր նախարարը:

Նախորդիվ`
ՊՆ. Այսօր մեծ ուշադրություն ենք դարձնում հեռահար և գերճշգրիտ հրթիռային համակարգերի ձեռքբերմանը

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: