Ձեր վստահելի աղբյուրը

Panorama.am-ը վերջերս անդրադարձել էր Էկոնոմիկայի նախարարության կողմից շուրջ 7 մլն դրամի հասնող գնումներին, որոնք կատարվել էին 2013 թվականի ընթացքում և տեղեկացրել, որ նախարարությունն այդքան գումար է վճարել մոտ երկու տասնյակ ռեստորաններին, հուշանվեր արտադրող ընկերություններին, ինչպես նաև իր աշխատակիցների համար գնել է սպորտային համազգեստներ:

Ի դեպ, այդ տվյալները տեղադրված էին կառավարության պաշտոնական կայքէջում:

Մենք գրավոր հարցում ուղարկեցինք նախարարություն և խնդրեցինք պարզաբանել, թե ինչո՞ւ են նման ծախսեր արվել, ի՞նչ նպատակով է սննդի ամենամեծ գումարը՝ 386 հազար դրամ վճարվել «Արմենիա հյուրանոցային համալիր» ՓԲ ընկերությանը անցած տարվա հունիսին, ինչպես նաև փորձեցինք հասկանալ` ի՞նչ նպատակով են նախարարության աշխատակիցները սպորտային հանդերձանք ձեռք բերել և ինչո՞ւ պետական բյուջեի հաշվին: Հնարավոր չէ՞ր այդ հանդերձանքը ձեռք բերել ոչ թե բյուջեի (այսինքն` հարկատուներիս), այլ հենց պաշտոնյաների հաշվին: Հիշեցնենք` ՀՀ էկոնոմիկայի նախարարությունն՝ անցած տարվա հոկտեմբերի 25-ին «Hummel» ՍՊ ընկերության հետ կնքած պայմանագրով ձեռք է8 բերել 18 զույգ սպորտային կոշիկ, 20 զույգ գուլպա և մեկ ամբողջ սպորտային հանդերձանք, իսկ այդ ամենի համար վճարել են 368 հազար դրամ:

Ի պատասխան մեր հարցմանը, Էկոնոմիկայի նախարարությունից տեղեկացնում են, որ 2013 թվականի ընթացքում ՀՀ էկոնոմիկայի նախարարության կողմից կազմակերպված պաշտոնական պատվիրակությունների ընդունելությունների հիմնական մասը կազմել են Մաքսային միությանը Հայաստանի Հանրապետության անդամակցության հետ կապված տեխնիկական կանոնակարգերի մշակման և դրանց կիրառման խնդիրների վերաբերյալ արտասահմանյան և հայաստանյան պաշտոնատար անձանց, մասնագետների և աշխատանքային խմբերի հետ անցկացված քննարկումները (ընդ որում, ոչ միայն ՀՀ էկոնոմիկայի նախարարության, այլև մյուս պետական կառավարման մարմինների կողմից հրավիրված պատվիրակությունների մասով): Դրանք, ըստ նախարարության պատասխանի, իրականացվել են ՀՀ էկոնոմիկայի նախարարության տնտեսված միջոցների հաշվին:

«Միջոցառումները պատշաճ կազմակերպելու համար անհրաժեշտություն է առաջացել քննարկումների համար վարձակալել կոնֆերանս դահլիճներ և սարքավորումներ, քննարկումների ընթացքում կազմակերպվել են սուրճի ընդմիջումներ, պաշտոնական ճաշկերույթներ, ինչպես նաև ձեռք են բերվել և հյուրերին հանձնվել հուշանվերներ», -ասված է նախարարության գրավոր պատասխանի մեջ:

Ինչ վերաբերում է «Արմենիա Մարիոթ» հյուրանոցում կազմակերպված հյուրասիրությանն ու մարզական հագուստ գնելուն, ապա նախարարությունից ներկայացրել են հետևյալը.

«2013թ. մարտի 14-ից 15-ը Մտավոր սեփականության համաշխարհային կազմակերպության (WIPO) և Հեղինակների և կոմպոզիտորների ընկերությունների միջազգային կոնֆեդերացիայի (CISAC) հետ համատեղ կազմակերպվել է «Հեղինակային իրավունքի, հարակից իրավունքների պաշտպանությունը և կոլեկտիվ հիմունքներով կառավարումը» վերնագրով սեմինար, որը տեղի է ունեցել «Մարիոթ Արմենիա» հյուրանոցում: Սեմինարին հրավիրված էին Վրաստանի, Մոսկվայի, Տալլինի պետական և հասարակական կառույցների ներկայացուցիչներ, ինչպես նաև մասնագետներ Ժնևից (WIPO) և Բուդապեշտից (CISAC): Սեմինարին հրավիրված էին նաև հայաստանցի հեղինակներ, կատարողներ, հեղինակային և հարակից իրավունքներով պահպանվող օբյեկտների օգտագործողներ, հեռուստատեսության և ռադիոյի աշխատակիցներ (մասնակիցների ընդհանուր թիվը` ավելի քան 40 անձ):

Սեմինարի հետ կապված ծախսերի մի մասը (դահլիճի վարձակալություն, սուրճի ընդմիջում) հոգացել է Մտավոր սեփականության համաշխարհային կազմակերպությունը (WIPO), իսկ ճաշի հետ կապված ծախսերը (386.400 դրամ) «Արմենիա հյուրանոցային համալիր» ՓԲ ընկերությանը վճարվել են ՀՀ էկոնոմիկայի նախարարության արտաբյուջետային միջոցներից:

«ՀՈՒՄԼ» ՍՊ ընկերությունից գնված սպորտային համազգեստը ձեռք է բերվել միջգերատեսչական գավաթային խաղերին ՀՀ էկոնոմիկայի նախարարության ֆուտբոլային թիմի պատշաճ մասնակցությունն ապահովելու համար:

Ձեր հարցին, թե հնարավոր չէ՞ր այդ ծախսերն իրականացնել ոչ ՀՀ պետական բյուջեից, տեղեկացնում ենք, որ վճարումն իրականացվել է ՀՀ էկոնոմիկայի նախարարության արտաբյուջետային միջոցներից, որի ձևավորման աղբյուրը հարկատուների կողմից կատարված վճարները չեն»:

Նախորդող հրապարակում`

Գուլպա և կոշիկ` էկոնոմիկայի նախարարության համար