Ձեր վստահելի աղբյուրը

«Ես այնքան ազդված եմ երեկ տեղի ունեցածից. այս տարիներին եղել են դժվարություններ, բայց որևէ մեկը չի իմացել, ինչպես ասում են, տանից դուրս չի եկել խնդիրը», -քիչ առաջ լրագրողների հետ ճեպազրույցում հայտարարեց Օպերայի և բալետի ակադեմիական թատրոնի տնօրեն Կամո Հովհաննիսյանը` անդրադառնալով երեկ տեղի ունեցած «Անուշ» օպերայի ներկայացման տապալմանը և աշխատակիցների բողոքի ցույցին:

Հիշեցնենք` աշխատակիցները երեկ երեկոյան դուրս էին եկել բողոքի` պահանջելու իրենց աշխատավարձից պարտադիր բաղադրիչի շրջանակներում 5 տոկոս պահումները չանել:

Ասուլիսում Հովհաննիսյանը տեղեկացրեց, որ այսօր մշակույթի նախարարի տեղակալ Արթուր Պողոսյանի մասնակցությամբ տեղի է ունեցել ժողով, իրենք բացատարական աշխատանքներ են տարել կոլեկտիվի հետ և հույս հայտնեց, որ նրանք կհասկանան իրավիճակը:

Կամո Հովհաննիսյանը նշեց, որ աշխատավարձերից պահումները արվել են, բայց դրանք չեն փոխանցվել ֆոնդերի կառավարչին և գտնվում են թատրոնում: Նրա հավաստմամբ, միայն Սահմանադրական դատարանի` մարտի 28-ին կայանալիք նիստում կայացրած որոշումից հետո իրենք կորոշեն իրենց անելիքը:

Նա նաև նկատեց, որ ստեղծագործական կոլեկտիվների մեծ մասի աշխատավարձերը 20 տոկոսով բարձրացել են, սակայն փոխանցումները արվելու են փետրվարից, քանի որ հաշվարկների հետ կապված տեխնիկական խնդիրներ են առաջացել և փոխանցումը ձգձգվել է:

Ըստ Հովհաննիսյանի, ինքը սիրով կկատարեր փոխանցում, եթե այդ տարիքում գտնվեր և հորդորեց իր աշխատակիցներին պահպանել օրենքները:

Նկատենք, որ թատրոնում կա 200-ից ավել աշխատող, ում վրա տարածվում է կենսաթոշակային կուտակային համակարգի մասին օրենքը: