Ձեր վստահելի աղբյուրը

Ադրբեջանի ՊՆ պաշտոնական հաղորդագրության համաձայն, մարտական դիրքեր կատարած այցի շրջանակներում, Ադրբեջանի պաշտպանության նախարարն առաջնագծում ծանոթացել է ծանր տեխնիկայի մարտունակությանը և դրա հնարավորություններին:

Panorama.am­ի հետ զրույցում, ռազմական փորձագետ Դավիթ Սոֆիյանը նշեց, որ սահմանին ծանր տեխնիկա կուտակելով` Ադրբեջանը փորձում է ճնշում գործադրել:

«Ծանր տեխնիկայի կուտակումը կարծում եմ պայմանավորված է նաև հունվարի 19-ի լույս 20-ի գիշերը հայկական դիրքերի ուղղությամբ իրականացված ագրեսիվ գործողություններով, ինչն էապես ծանրացրեց իրավիճակն առաջին գծում: Վախենալով հայկական կողմի պատասխան գործողություններից Ադրբեջանը ծանր տեխնիկա է կուտակել` փորձելով պաշտպանվել մեծ կորուստներից»,- նշեց նա:

Հարցին, թե ինչ կարելի է հասկանալ «ծանր տեխնիկայի» անվան տակ, ռազմական փորձագետը նշեց. «Տանկեր, զրահափոխադրիչներ, հետևակի մարտական մեքենաներ, ինչ­որ առումով նաև հրետանի: Այս պահի դրությամբ, ադրբեջանական կողմը պաշտոնապես հերքել է միայն սահմանին տանկերի առկայության փաստը»:

Վերոնշյալի շուրջ Panorama.am­ը զրուցեց նաև ԼՂՀ ՊԲ Լրատվության ծառայության ղեկավար Սենոր Հասրաթյանի հետ, ով նշեց, թե այս պահին զերծ կմնա մեկնաբանություններից:

«Ամեն դեպքում, եթե մտահոգության առիթը ռազմական գործողությունների վերսկսումն է, ապա պետք է նշեմ, որ սահմանագծին ծանր տեխնիկա կուտակելն առիթ չի տալիս պնդելու, որ հակառակորդը լայնամասշտաբ ռազմական գործողությունների է պատրաստվում»,­ եզրափակեց նա:

Նախորդիվ`
Ծանր տեխնիկայի կուտակումներ սահմանագծին