Ձեր վստահելի աղբյուրը

«Մենք դեմ ենք բաժանարար գծերի քաղաքականությանը, ուստի գտնում ենք որ Արևելյան գործընկերությունը պետք է բնական կամուրջ դառնա` տարածելով տնտեսական ինտեգրումը Ատլանտյանից մինչև Խաղաղ Օվկիանոս: Մենք շարունակում ենք հանձնառու լինել Արևելյան գործընկերության շրջանակում մեր պարտավորություններին: Հավատում ենք, որ 2014 թվականը կնախանշի Արևելյան գործընկերության նոր փուլի սկիզբ՝ ավելի արդյունավետ քաղաքական գործընկերության զարգացմամբ»,- Եվրանեսթ խորհրդարանական վեհաժողովի քաղաքական հարաբերություննրի, մարդու իրավունքների և ժողովրդավարության հարցերով հանձնաժողովի նիստում նախօրեին ունեցած իր ելույթում ասել է ՀՀ Ազգային Ժողովի արտաքին հարաբերությունների մշտական հանձնաժողովի նախագահ Արտակ Զաքարյանը: Այս մասին հայտնում են ԱԺ Արտաքին հարաբերությունների մշտական հանձնաժողովից:

«Ցանկանում եմ շնորհակալություն հայտնել Եվրոպառլամենտի մեր գործընկերներին մեր հանդիպումը պատշաճ կերպով կազմակերպելու և կառուցողական աշխատանքային մթնոլորտի ապահովման համար: Ողջունում եմ ներկայացված զեկույցի նախագծի հեղինակներին` պարոն Դոլիձեին և պարոն Պրոտասևիչին հետաքրքիր ու օգտակար զեկույցի նախագիծ պատրաստելու համար:

Գործընկերային խորը և ընդլայնված հարաբերությունները ԵՄ-ի և Արևելյան գործընկերության անդամ-պետությունների հետ եղել և մնում են ՀՀ արտաքին քաղաքականության կարևոր վեկտորներից մեկը: Եվրոպական երկրների հետ քաղաքական երկխոսության, տնտեսական համագործակցության և մշակութային կապերի ամրապնդումը շարունակելու է մնալ Հայաստանի արտաքին քաղաքականության գերակայությունների շարքում:

Նոյեմբերի 29-ին ՀՀ Նախագահի մասնակցությամբ Վիլնյուսում կայացած Արևելյան գործընկերության երրորդ գագաթաժողովի շրջանակներում երկուստեք վերահաստատվել է փոխադարձ հետաքրքրություն ներկայացնող բոլոր ոլորտներում Հայաստան-ԵՄ համապարփակ համագործակցությունը զարգացնելու և ամրապնդելու հանձնառությունը: Այդ կապակցությամբ ընդունվել է Հայաստան - Եվրոպական Միություն համատեղ հայտարարությունը, և ՀՀ ԱԳ նախարարի ու ԵՄ արտաքին գործերի և անվտանգության քաղաքականության բարձր ներկայացուցչի միջև նամակներ են փոխանակվել, որոնք ուրվագծում են ապագային միտված Հայաստանի և Եվրամիության միջև համագործակցության օրակարգը։

Հայաստանի և Եվրոպական Միության ակտիվ համագործակցությունը, այսուհետ ևս ուղղված է լինելու ժողովրդավարական հաստատությունների և դատական համակարգի շարունակական բարելավմանը, մարդու իրավունքների և օրենքի գերակայության ամրապնդմանը, արդյունավետ կառավարմանը, կոռուպցիայի դեմ պայքարին, քաղաքացիական հասարակության ամրապնդմանը, առևտրի ու ներդրումների ընդլայնման համար միջավայրի հետագա կատարելագործմանը, շարժունակության գործընկերության շարունակական իրականացմանը և ոլորտային համագործակցության ընդլայնմանը:

Անդրադառնալով Հայաստանի սուվերեն որոշմանը անդամագրվելու Մաքսային միությանը, նշեմ, որ քաղաքական այս որոշումն ավելի շատ պայմանավորվում են ազգային պետական մի շարք կենսական նշանակություն ունեցող շահերով:
Ռուսաստանը եղել և մնում է Հայաստանի ռազմավարական դաշնակիցը, և մենք միշտ այս մասին բաց ու անկեղծ խոսել ենք Եվրոնեսթի ԽՎ բոլոր հանդիպումների ժամանակ տեղի ունեցած քննարկումներում: Իսկ Մաքսային միությանը մեր անդամակցելու հանգամանքը որևէ կերպ չի կարող ազդեցության ունենալ Եվրոպայի հետ մեր հանձնառություններն իրականացնելու ճանապարհին»,- ասել է Ա. Զաքարյանը:

Աղբյուրը հայտնում է, որ փետրվարի 11-ից 13-ը Բրյուսելում, Եվրանեսթ խորհրդարանական վեհաժողովի հայաստանյան պատվիրակությունը մասնակցում է վեհաժողովի քաղաքական, էներգետիկ և սոցիալական հարցերով հանձնաժողովների նիստերի աշխատանքներին: Հայկական պատվիրակությունը նաև ակտիվ քննարկումներ է ունեցել Լեռնային Ղարաբաղի կապակցությամբ՝արդյունավետ և հաջող կերպով հակադարձելով ադրբեջանական պատվիրակության մի շարք անհիմն մեկնաբանություններին և մեջբերումներին:

Նիստի արդյունքում քննարկման են ընդունվել նաև հայկական պատվիրակության առաջարկները՝ խնայողական էներգիայի և փոքր ավիացիայի ֆինանսավորման խնդիրների և հնարավորությունների շուրջ: Այսօր հայկական պատվիրակությունը կմասնակցի Եվրանեսթ խորհրդարանական վեհաժողովի էներգետիկ անվտանգության հանձնաժողովի աշխատանքներին: